શ્રીમદ્વાલ્મીકીય રામાયણે અયોધ્યાકાંડમ્ ।
અથ સપ્તવિંશસ્સર્ગઃ ।
એવમુક્તા તુ વૈદેહી પ્રિયાર્હા પ્રિયવાદિની ।
પ્રણયાદેવ સંક્રુદ્ધા ભર્તારમિદમબ્રવીત્ ॥ 1 ॥
કિમિદં ભાષસે રામ વાક્યં લઘુતયા ધ્રુવમ્ ।
ત્વયા યદપહાસ્યં મે શ્રુત્વા નરવરાત્મજ ॥ 2 ॥
આર્યપુત્ર પિતા માતા ભ્રાતા પુત્રસ્તથા સ્નુષા ।
સ્વાનિ પુણ્યાનિ ભુંજાનાઃ સ્વં સ્વં ભાગ્યમુપાસતે ॥ 3 ॥
ભર્તુર્ભાગ્યં તુ ભાર્યૈકા પ્રાપ્નોતિ પુરુષર્ષભ ।
અતશ્ચૈવાહમાદિષ્ટા વને વસ્તવ્યમિત્યપિ ॥ 4 ॥
ન પિતા નાત્મજો નાત્મા ન માતા ન સખીજનઃ ।
ઇહ પ્રેત્ય ચ નારીણાં પતિરેકો ગતિસ્સદા ॥ 5 ॥
યદિ ત્વં પ્રસ્થિતો દુર્ગં વનમદ્યૈવ રાઘવ ।
અગ્રતસ્તે ગમિષ્યામિ મૃદ્નંતી કુશકંટકાન્ ॥ 6 ॥
ઈર્ષ્યારોષૌ બહિષ્કૃત્ય ભુક્તશેષમિવોદકમ્ ।
નય માં વીર વિસ્રબ્ધઃ પાપં મયિ ન વિદ્યતે ॥ 7 ॥
પ્રાસાદાગ્રૈર્વિમાનૈર્વા વૈહાયસગતેન વા ।
સર્વાવસ્થાગતા ભર્તુઃ પાદચ્છાયા વિશિષ્યતે ॥ 8 ॥
અનુશિષ્ટાઽસ્મિ માત્રા ચ પિત્રા ચ વિવિધાશ્રયમ્ ।
નાઽસ્મિ સંપ્રતિ વક્તવ્યા વર્તિતવ્યં યથા મયા ॥ 9 ॥
અહં દુર્ગં ગમિષ્યામિ વનં પુરુષવર્જિતમ્ ।
નાનામૃગગણાકીર્ણં શાર્દૂલવૃકસેવિતમ્ ॥ 10 ॥
સુખં વને નિવત્સ્યામિ યથૈવ ભવને પિતુઃ ।
અચિંતયંતી ત્રીન્લોકાંશ્ચ્ચિંતયંતી પતિવ્રતમ્ ॥ 11 ॥
શુશ્રૂષમાણા તે નિત્યં નિયતા બ્રહ્મચારિણી ।
સહ રંસ્યે ત્વયા વીર વનેષુ મધુગંધિષુ ॥ 12 ॥
ત્વં હિ શક્તો વને કર્તું રામ સંપરિપાલનમ્ ।
અન્યસ્યાપિ જનસ્યેહ કિં પુનર્મમ માનદ ॥ 13 ॥
સહ ત્વયા ગમિષ્યામિ વનમદ્ય ન સંશયઃ ।
નાહં શક્યા મહાભાગ નિવર્તયિતુમુદ્યતા ॥ 14 ॥
ફલમૂલાશના નિત્યં ભવિષ્યામિ ન સંશયઃ ।
ન તે દુઃખં કરિષ્યામિ નિવસંતી સહ ત્વયા ॥ 15 ॥
ઇચ્છામિ સરિતશ્શૈલાન્પલ્વલાનિ વનાનિ ચ ।
દ્રષ્ટું સર્વત્ર નિર્ભીતા ત્વયા નાથેન ધીમતા ॥ 16 ॥
હંસકારંડવાકીર્ણાઃ પદ્મિનીસ્સાધુપુષ્પિતાઃ ।
ઇચ્છેયં સુખિની દ્રષ્ટું ત્વયા વીરેણ સંગતા ॥ 17 ॥
અભિષેકં કરિષ્યામિ તાસુ નિત્યં યતવ્રતા ।
સહ ત્વયા વિશાલાક્ષ રંસ્યે પરમનંદિની ॥ 18 ॥
એવં વર્ષસહસ્રાણાં શતં વાઽહં ત્વયા સહ ।
વ્યતિક્રમં ન વેત્સ્યામિ સ્વર્ગોઽપિ ન હિ મે મતઃ ॥ 19 ॥
સ્વર્ગેઽપિ ચ વિના વાસો ભવિતા યદિ રાઘવ ।
ત્વયા મમ નરવ્યાઘ્ર નાહં તમપિ રોચયે ॥ 20 ॥
અહં ગમિષ્યામિ વનં સુદુર્ગમં મૃગાયુતં વાનરવારણૈર્યુતમ્ ।
વને નિવત્સ્યામિ યથા પિતુર્ગૃહે તવૈવ પાદાવુપગૃહ્ય સંયતા ॥ 21 ॥
અનન્યભાવામનુરક્તચેતસં ત્વયા વિયુક્તાં મરણાયનિશ્ચિતામ્ ।
નયસ્વ માં સાધુ કુરુષ્વ યાચનાં ન તે મયાઽતો ગુરુતા ભવિષ્યતિ ॥ 22 ॥
તથા બ્રુવાણામપિ ધર્મવત્સલો ન ચ સ્મ સીતાં નૃવરો નિનીષતિ ।
ઉવાચ ચૈનાં બહુ સન્નિવર્તને વને નિવાસસ્ય ચ દુઃખિતાં પ્રતિ ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે સપ્તવિંશસ્સર્ગઃ ॥
