śrīmadvālmīkīya rāmāyaṇē ayōdhyākāṇḍam ।
atha saptaviṃśassargaḥ ।
ēvamuktā tu vaidēhī priyārhā priyavādinī ।
praṇayādēva saṅkruddhā bhartāramidamabravīt ॥ 1 ॥
kimidaṃ bhāṣasē rāma vākyaṃ laghutayā dhruvam ।
tvayā yadapahāsyaṃ mē śrutvā naravarātmaja ॥ 2 ॥
āryaputra pitā mātā bhrātā putrastathā snuṣā ।
svāni puṇyāni bhuñjānāḥ svaṃ svaṃ bhāgyamupāsatē ॥ 3 ॥
bharturbhāgyaṃ tu bhāryaikā prāpnōti puruṣarṣabha ।
ataśchaivāhamādiṣṭā vanē vastavyamityapi ॥ 4 ॥
na pitā nātmajō nātmā na mātā na sakhījanaḥ ।
iha prētya cha nārīṇāṃ patirēkō gatissadā ॥ 5 ॥
yadi tvaṃ prasthitō durgaṃ vanamadyaiva rāghava ।
agratastē gamiṣyāmi mṛdnantī kuśakaṇṭakān ॥ 6 ॥
īrṣyārōṣau bahiṣkṛtya bhuktaśēṣamivōdakam ।
naya māṃ vīra visrabdhaḥ pāpaṃ mayi na vidyatē ॥ 7 ॥
prāsādāgrairvimānairvā vaihāyasagatēna vā ।
sarvāvasthāgatā bhartuḥ pādachChāyā viśiṣyatē ॥ 8 ॥
anuśiṣṭā'smi mātrā cha pitrā cha vividhāśrayam ।
nā'smi samprati vaktavyā vartitavyaṃ yathā mayā ॥ 9 ॥
ahaṃ durgaṃ gamiṣyāmi vanaṃ puruṣavarjitam ।
nānāmṛgagaṇākīrṇaṃ śārdūlavṛkasēvitam ॥ 10 ॥
sukhaṃ vanē nivatsyāmi yathaiva bhavanē pituḥ ।
achintayantī trīnlōkāṃśchchintayantī pativratam ॥ 11 ॥
śuśrūṣamāṇā tē nityaṃ niyatā brahmachāriṇī ।
saha raṃsyē tvayā vīra vanēṣu madhugandhiṣu ॥ 12 ॥
tvaṃ hi śaktō vanē kartuṃ rāma samparipālanam ।
anyasyāpi janasyēha kiṃ punarmama mānada ॥ 13 ॥
saha tvayā gamiṣyāmi vanamadya na saṃśayaḥ ।
nāhaṃ śakyā mahābhāga nivartayitumudyatā ॥ 14 ॥
phalamūlāśanā nityaṃ bhaviṣyāmi na saṃśayaḥ ।
na tē duḥkhaṃ kariṣyāmi nivasantī saha tvayā ॥ 15 ॥
ichChāmi saritaśśailānpalvalāni vanāni cha ।
draṣṭuṃ sarvatra nirbhītā tvayā nāthēna dhīmatā ॥ 16 ॥
haṃsakāraṇḍavākīrṇāḥ padminīssādhupuṣpitāḥ ।
ichChēyaṃ sukhinī draṣṭuṃ tvayā vīrēṇa saṅgatā ॥ 17 ॥
abhiṣēkaṃ kariṣyāmi tāsu nityaṃ yatavratā ।
saha tvayā viśālākṣa raṃsyē paramanandinī ॥ 18 ॥
ēvaṃ varṣasahasrāṇāṃ śataṃ vā'haṃ tvayā saha ।
vyatikramaṃ na vētsyāmi svargō'pi na hi mē mataḥ ॥ 19 ॥
svargē'pi cha vinā vāsō bhavitā yadi rāghava ।
tvayā mama naravyāghra nāhaṃ tamapi rōchayē ॥ 20 ॥
ahaṃ gamiṣyāmi vanaṃ sudurgamaṃ mṛgāyutaṃ vānaravāraṇairyutam ।
vanē nivatsyāmi yathā piturgṛhē tavaiva pādāvupagṛhya saṃyatā ॥ 21 ॥
ananyabhāvāmanuraktachētasaṃ tvayā viyuktāṃ maraṇāyaniśchitām ।
nayasva māṃ sādhu kuruṣva yāchanāṃ na tē mayā'tō gurutā bhaviṣyati ॥ 22 ॥
tathā bruvāṇāmapi dharmavatsalō na cha sma sītāṃ nṛvarō ninīṣati ।
uvācha chaināṃ bahu sannivartanē vanē nivāsasya cha duḥkhitāṃ prati ॥ 23 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē saptaviṃśassargaḥ ॥
