ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ସପ୍ତଵିଂଶସ୍ସର୍ଗଃ ।
ଏଵମୁକ୍ତା ତୁ ଵୈଦେହୀ ପ୍ରିୟାର୍ହା ପ୍ରିୟଵାଦିନୀ ।
ପ୍ରଣୟାଦେଵ ସଂକ୍ରୁଦ୍ଧା ଭର୍ତାରମିଦମବ୍ରଵୀତ୍ ॥ 1 ॥
କିମିଦଂ ଭାଷସେ ରାମ ଵାକ୍ୟଂ ଲଘୁତୟା ଧ୍ରୁଵମ୍ ।
ତ୍ଵୟା ୟଦପହାସ୍ୟଂ ମେ ଶ୍ରୁତ୍ଵା ନରଵରାତ୍ମଜ ॥ 2 ॥
ଆର୍ୟପୁତ୍ର ପିତା ମାତା ଭ୍ରାତା ପୁତ୍ରସ୍ତଥା ସ୍ନୁଷା ।
ସ୍ଵାନି ପୁଣ୍ୟାନି ଭୁଂଜାନାଃ ସ୍ଵଂ ସ୍ଵଂ ଭାଗ୍ୟମୁପାସତେ ॥ 3 ॥
ଭର୍ତୁର୍ଭାଗ୍ୟଂ ତୁ ଭାର୍ୟୈକା ପ୍ରାପ୍ନୋତି ପୁରୁଷର୍ଷଭ ।
ଅତଶ୍ଚୈଵାହମାଦିଷ୍ଟା ଵନେ ଵସ୍ତଵ୍ୟମିତ୍ୟପି ॥ 4 ॥
ନ ପିତା ନାତ୍ମଜୋ ନାତ୍ମା ନ ମାତା ନ ସଖୀଜନଃ ।
ଇହ ପ୍ରେତ୍ୟ ଚ ନାରୀଣାଂ ପତିରେକୋ ଗତିସ୍ସଦା ॥ 5 ॥
ୟଦି ତ୍ଵଂ ପ୍ରସ୍ଥିତୋ ଦୁର୍ଗଂ ଵନମଦ୍ୟୈଵ ରାଘଵ ।
ଅଗ୍ରତସ୍ତେ ଗମିଷ୍ୟାମି ମୃଦ୍ନଂତୀ କୁଶକଂଟକାନ୍ ॥ 6 ॥
ଈର୍ଷ୍ୟାରୋଷୌ ବହିଷ୍କୃତ୍ୟ ଭୁକ୍ତଶେଷମିଵୋଦକମ୍ ।
ନୟ ମାଂ ଵୀର ଵିସ୍ରବ୍ଧଃ ପାପଂ ମୟି ନ ଵିଦ୍ୟତେ ॥ 7 ॥
ପ୍ରାସାଦାଗ୍ରୈର୍ଵିମାନୈର୍ଵା ଵୈହାୟସଗତେନ ଵା ।
ସର୍ଵାଵସ୍ଥାଗତା ଭର୍ତୁଃ ପାଦଚ୍ଛାୟା ଵିଶିଷ୍ୟତେ ॥ 8 ॥
ଅନୁଶିଷ୍ଟାଽସ୍ମି ମାତ୍ରା ଚ ପିତ୍ରା ଚ ଵିଵିଧାଶ୍ରୟମ୍ ।
ନାଽସ୍ମି ସଂପ୍ରତି ଵକ୍ତଵ୍ୟା ଵର୍ତିତଵ୍ୟଂ ୟଥା ମୟା ॥ 9 ॥
ଅହଂ ଦୁର୍ଗଂ ଗମିଷ୍ୟାମି ଵନଂ ପୁରୁଷଵର୍ଜିତମ୍ ।
ନାନାମୃଗଗଣାକୀର୍ଣଂ ଶାର୍ଦୂଲଵୃକସେଵିତମ୍ ॥ 10 ॥
ସୁଖଂ ଵନେ ନିଵତ୍ସ୍ୟାମି ୟଥୈଵ ଭଵନେ ପିତୁଃ ।
ଅଚିଂତୟଂତୀ ତ୍ରୀନ୍ଲୋକାଂଶ୍ଚ୍ଚିଂତୟଂତୀ ପତିଵ୍ରତମ୍ ॥ 11 ॥
ଶୁଶ୍ରୂଷମାଣା ତେ ନିତ୍ୟଂ ନିୟତା ବ୍ରହ୍ମଚାରିଣୀ ।
ସହ ରଂସ୍ୟେ ତ୍ଵୟା ଵୀର ଵନେଷୁ ମଧୁଗଂଧିଷୁ ॥ 12 ॥
ତ୍ଵଂ ହି ଶକ୍ତୋ ଵନେ କର୍ତୁଂ ରାମ ସଂପରିପାଲନମ୍ ।
ଅନ୍ୟସ୍ୟାପି ଜନସ୍ୟେହ କିଂ ପୁନର୍ମମ ମାନଦ ॥ 13 ॥
ସହ ତ୍ଵୟା ଗମିଷ୍ୟାମି ଵନମଦ୍ୟ ନ ସଂଶୟଃ ।
ନାହଂ ଶକ୍ୟା ମହାଭାଗ ନିଵର୍ତୟିତୁମୁଦ୍ୟତା ॥ 14 ॥
ଫଲମୂଲାଶନା ନିତ୍ୟଂ ଭଵିଷ୍ୟାମି ନ ସଂଶୟଃ ।
ନ ତେ ଦୁଃଖଂ କରିଷ୍ୟାମି ନିଵସଂତୀ ସହ ତ୍ଵୟା ॥ 15 ॥
ଇଚ୍ଛାମି ସରିତଶ୍ଶୈଲାନ୍ପଲ୍ଵଲାନି ଵନାନି ଚ ।
ଦ୍ରଷ୍ଟୁଂ ସର୍ଵତ୍ର ନିର୍ଭୀତା ତ୍ଵୟା ନାଥେନ ଧୀମତା ॥ 16 ॥
ହଂସକାରଂଡଵାକୀର୍ଣାଃ ପଦ୍ମିନୀସ୍ସାଧୁପୁଷ୍ପିତାଃ ।
ଇଚ୍ଛେୟଂ ସୁଖିନୀ ଦ୍ରଷ୍ଟୁଂ ତ୍ଵୟା ଵୀରେଣ ସଂଗତା ॥ 17 ॥
ଅଭିଷେକଂ କରିଷ୍ୟାମି ତାସୁ ନିତ୍ୟଂ ୟତଵ୍ରତା ।
ସହ ତ୍ଵୟା ଵିଶାଲାକ୍ଷ ରଂସ୍ୟେ ପରମନଂଦିନୀ ॥ 18 ॥
ଏଵଂ ଵର୍ଷସହସ୍ରାଣାଂ ଶତଂ ଵାଽହଂ ତ୍ଵୟା ସହ ।
ଵ୍ୟତିକ୍ରମଂ ନ ଵେତ୍ସ୍ୟାମି ସ୍ଵର୍ଗୋଽପି ନ ହି ମେ ମତଃ ॥ 19 ॥
ସ୍ଵର୍ଗେଽପି ଚ ଵିନା ଵାସୋ ଭଵିତା ୟଦି ରାଘଵ ।
ତ୍ଵୟା ମମ ନରଵ୍ୟାଘ୍ର ନାହଂ ତମପି ରୋଚୟେ ॥ 20 ॥
ଅହଂ ଗମିଷ୍ୟାମି ଵନଂ ସୁଦୁର୍ଗମଂ ମୃଗାୟୁତଂ ଵାନରଵାରଣୈର୍ୟୁତମ୍ ।
ଵନେ ନିଵତ୍ସ୍ୟାମି ୟଥା ପିତୁର୍ଗୃହେ ତଵୈଵ ପାଦାଵୁପଗୃହ୍ୟ ସଂୟତା ॥ 21 ॥
ଅନନ୍ୟଭାଵାମନୁରକ୍ତଚେତସଂ ତ୍ଵୟା ଵିୟୁକ୍ତାଂ ମରଣାୟନିଶ୍ଚିତାମ୍ ।
ନୟସ୍ଵ ମାଂ ସାଧୁ କୁରୁଷ୍ଵ ୟାଚନାଂ ନ ତେ ମୟାଽତୋ ଗୁରୁତା ଭଵିଷ୍ୟତି ॥ 22 ॥
ତଥା ବ୍ରୁଵାଣାମପି ଧର୍ମଵତ୍ସଲୋ ନ ଚ ସ୍ମ ସୀତାଂ ନୃଵରୋ ନିନୀଷତି ।
ଉଵାଚ ଚୈନାଂ ବହୁ ସନ୍ନିଵର୍ତନେ ଵନେ ନିଵାସସ୍ୟ ଚ ଦୁଃଖିତାଂ ପ୍ରତି ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ସପ୍ତଵିଂଶସ୍ସର୍ଗଃ ॥
