શ્રીમદ્વાલ્મીકીય રામાયણે યુદ્ધકાંડમ્ ।
અથ ત્રયોદશસ્સર્ગઃ ।
રાવણંક્રુદ્ધમાજ્ઞાયમહાપાર્શ્વોમહાબલઃ ।
મુહૂર્તમનુસંચિંત્યપ્રાંજલિર્વાક્યમબ્રવીત્ ॥ 1 ॥
યઃખલ્વપિવનંપ્રાપ્યમૃગવ્યાલનિષેવિતમ્ ।
નપિબેન્મધુસંપ્રાપ્યસનરોબાલિશોભવેત્ ॥ 2 ॥
ઈશ્વરસ્યેશ્વરઃકોઽસ્તિતવશત્રુનિબર્હણઃ ।
રમસ્વસહવૈદેહ્યાશત્રૂનાક્રમ્યમૂર્ધસુ ॥ 3 ॥
બલાત્કુક્કુટવૃત્તેનપ્રવર્તસ્વમહાબલઃ ।
આક્રમ્યાક્રમ્યસીતાંવૈતાંભુઙ્ ક્ષ્વચરમસ્વચ ॥ 4 ॥
લબ્ધકામસ્યતેપશ્ચાદાગમિષ્યતિયદ્ભયમ્ ।
પ્રાપ્તમપ્રાપ્તકાલંવાસર્વંપ્રતિસહિષ્યતિ ॥ 5 ॥
કુંભકર્ણસ્સહાસ્માભિરિંદ્રજિચ્ચમહાબલઃ ।
પ્રતિષેધયિતુંશક્તૌસવજ્રમપિવજ્રિણમ્ ॥ 6 ॥
ઉપપ્રદાનંસાંત્વંવાભેદંવાકુશલૈઃકૃતમ્ ।
સમતિક્રમ્યદંડેનસિદ્ધિમર્થેષુરોચયે ॥ 7 ॥
ઇહપ્રાપ્તાન્વયંસર્વાન્ શત્રૂંસ્તવમહાબલઃ ।
વશેશસ્ત્રપ્રતાપેનકરિષ્યામોનસંશયઃ ॥ 8 ॥
એવમુક્તસ્તદારાજામહાપાર્શ્વેનરાવણઃ ।
તસ્યસંપૂજયન્વાક્યમિદંવચનમબ્રવીત્ ॥ 9 ॥
મહાપાર્શ્વનિબોધત્વંરહસ્યંકિંચિદાત્મનઃ ।
ચિરવૃત્તંતદાખ્યાસ્યેયદવાપ્તંપુરામયા ॥ 10 ॥
પિતામહસ્યભવનંગચ્છંતીંપુંજિકસ્થલામ્ ।
ચંચૂર્યમાણામદ્રાક્ષમાકાશેઽગ્નિશિખામિવ ॥ 11 ॥
સાપ્રસહ્યમયાભુક્તાકૃતાવિવસનાતતઃ ।
સ્વયંભૂભવનંપ્રાપ્તાલોલિતાનલિનીયથા ॥ 12 ॥
તચ્ચતસ્યતદામન્યેજ્ઞાતમાસીન્મહાત્મનઃ ।
અથસંકુપિતોદેવોમામિદંવાક્યમબ્રવીત્ ॥ 13 ॥
અદ્યપ્રભૃતિયામન્યાબલાન્નારીંગમિષ્યસિ ।
તદાતેશતધામૂર્ધાફલિષ્યતિનસંશયઃ ॥ 14 ॥
ઇત્યહંતસ્યશાપસ્યભીતઃપ્રસભમેવતામ્ ।
નારોહયેબલાત્સીતાંવૈદેહીંશયનેશુભે ॥ 15 ॥
સાગરસ્યેનમેવેગોમારુતસ્યેવમેગતિઃ ।
નૈતદ્દાશરથિર્વેદહ્યાસાદયતિતેનમામ્ ॥ 16 ॥
કોહિસિંહમિવાસીનંસુપ્તંગિરિગુહાશયે ।
ક્રુદ્ધંમૃત્યુમિવાઽસીનંસંભોધયિતુમિચ્છતિ ॥ 17 ॥
નમત્તોનિશિતાન્બાણાંદ્વિજિહ્વાન્પન્નગાનિવ ।
રામઃપશ્યતિસંગ્રામેતેનમામભિગચ્છતિ ॥ 18 ॥
ક્ષિપ્રંવજ્રસમૈર્બાણૈશ્શતથાકાર્મુકચ્યુતૈઃ ।
રામમાદીપયિષ્યામિઉલ્કાભિરિવકુંજરમ્ ॥ 19 ॥
તચ્ચાસ્યબલમાદાસ્યેબલેનમહતાવૃતઃ ।
ઉદિતસ્સવિતાકાલેનક્ષત્રાણામિવપ્રભામ્ ॥ 20 ॥
નવાસનેનાપિસહસ્રચક્ષુષાયુધાઽસ્મિશક્યોવરુણેનવાપુનઃ ।
મયાત્વિયંબાહુબલેનનિર્જિતાપુરાપુરીવૈશ્રવણેનપાલિતા ॥ 21 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે યુદ્ધકાંડે ત્રયોદશસ્સર્ગઃ ॥
