શ્રીમદ્વાલ્મીકીય રામાયણે યુદ્ધકાંડમ્ ।
અથ ત્રિંશસ્સર્ગઃ ।
તતસ્તમક્ષોભ્યબલંલંકાધિપતયેચરાઃ ।
સુવેલેરાઘવંશૈલેનિવિષ્ટંપ્રત્યવેદયન્ ॥ 1 ॥
ચારાણાંરાવણશ્શ્રુત્વાપ્રાપ્તંરામંમહાબલમ્ ।
જાતોદ્વેગોઽભવત્કિંચિચ્છાર્દૂલંવાક્યમબ્રવીત્ ॥ 2 ॥
અયથાવચ્ચતેવર્ણોદીનશ્ચાસિનિશાચર ।
નાસિકચ્ચિદમિત્રાણાંક્રુદ્ધાનાંવશમાગતઃ ॥ 3 ॥
ઇતિતેનાનુશિષ્ટસ્તુવાચંમંદમુદીરયત્ ।
તદારાક્ષસશાર્દૂલંશાર્દૂલોભયવિહ્વલઃ ॥ 4 ॥
નતેચારયિતુંશક્યારાજન્વાનરપુંગવાઃ ।
વિક્રાંતાબલવંતશ્ચરાઘવેણચરક્ષિતાઃ ॥ 5 ॥
નાપિસંભાષિતુંશક્યાસ્સંપ્રશ્નોઽત્રનલભ્યતે ।
સર્વતોરક્ષ્યતેપંથાવાનરૈઃપર્વતોપમૈ ॥ 6 ॥
પ્રવિષ્ટમાત્રેજ્ઞાતોઽહંબલેતસ્મિન્નચારિતે ।
બલાદ્ગૃહીતોરક્ષોભિર્બહુધાઽસ્મિવિચાલિતઃ ॥ 7 ॥
જાનુભિર્મુષ્ટિભિર્દંતેસ્તલૈશ્ચાભિહતોભૃશમ્ ।
પરિણીતોઽસ્મિહરિભિર્બલવદ્ભિરમર્ષણૈઃ ॥ 8 ॥
પરિણીયચસર્વત્રનીતોઽહંરામસંસદમ્ ।
રુધિરાદિગ્ધસર્વાંગોવિહ્વલશ્ચલિતેંદ્રિયઃ ॥ 9 ॥
હરિભિર્વધ્યમાનશ્ચયાચમાનઃકૃતાંજલિઃ ।
રાઘવેણપરિત્રાતોજીવામીતિયદૃચ્છયા ॥ 10 ॥
એષશૈલૈશ્શિલાભિશ્ચપૂરયિત્વામહાર્ણવમ્ ।
દ્વારમાશ્રિત્યલંકાયારામસ્તિષ્ઠતિસાયુધઃ ॥ 11 ॥
ગરુડવ્યૂહમાસ્થાયસર્વતોહરિભિર્વૃતઃ ।
માંવિસૃજ્યમહાતેજાલંકામેવાભિવર્તતે ॥ 12 ॥
પુરાપ્રાકારમાયાતિક્ષિપ્રમેકતરંકુરુ ।
સીતાંવાસ્મૈપ્રયચ્છાશુયુદ્ધંવાપ્રદીયતામ્ ॥ 13 ॥
મનસાતંતદાપ્રેક્ષ્યતચ્છ્રુત્વારાક્ષસાધિપઃ ।
શાર્દૂલંસુમહદ્વાક્યમથોવાચસરાવણઃ ॥ 14 ॥
યદિમાંપ્રતિયુધ્યેરંદેવગંધર્વદાનવાઃ ।
નૈવસીતાંપ્રદાસ્યામિસર્વલોકભયાદપિ ॥ 15 ॥
એવમુક્ત્વામહાતેજારાવણઃપુનરબ્રવીત્ ।
ચરિતાભવતાસેનાકેઽત્રશૂરાઃપ્લવંગમાઃ ॥ 16 ॥
કીદૃશાઃ કિંપ્રભાઃ સૌમ્યવાનરાયેદુરાસદાઃ ।
કસ્યપુત્રાશ્ચપૌત્રાશ્ચતત્ત્વમાખ્યાહિરાક્ષસઃ ॥ 17 ॥
તથાત્રપ્રતિપત્સ્યામિજ્ઞાત્વાતેષાંબલાબલમ્ ।
અવશ્યંબલસઙ્ ખ્યાનંકર્તવ્યંયુદ્ધમિચ્છતામ્ ॥ 18 ॥
અથૈવમુક્તશ્શાર્દૂલોરાવણેનોત્તમશ્ચરઃ ।
ઇદંવચનમારેભેવક્તુંરાવણસન્નિધૌ ॥ 19 ॥
અથર્ક્ષરજસઃપુત્રોયુધિરાજાસુદુર્જયઃ ।
ગદ્ગદસ્યાથપુત્ત્રોઽત્રજાંબવાનિતિવિશ્રુતઃ ॥ 20 ॥
ગદ્ગદસ્યૈવપુત્ત્રોઽન્યોગુરુપુત્રઃ શતક્રતોઃ ।
કદનંયસ્યપુત્રેણકૃતમેકેનરક્ષસામ્ ॥ 21 ॥
સુષેણશ્ચાપિધર્માત્માપુત્રોધર્મસ્યવીર્યવાન્ ।
સૌમ્યસ્સોમાત્મજશ્ચાત્રરાજન્ દધિમુખઃકપિઃ ॥ 22 ॥
સુમુખોદુર્મુખશ્ચાત્રવેગદર્શીચવાનરઃ ।
મૃત્યુર્વાનરરૂપેણનૂનંસૃષ્ટસ્સ્વયંભુવા ॥ 23 ॥
પુત્ત્રોહુતવહસ્યાથનીલસ્સેનાપતિસ્સ્વયમ્ ।
અનિલસ્યચપુત્ત્રોઽત્રહનૂમાનિતિવિશ્રુતઃ ॥ 24 ॥
નપ્તાશક્રસ્યદુર્ધર્ષોબલવાનંગદોયુવા ।
મૈંદશ્ચદ્વિવિદશ્ચોભૌબલિનાવશ્વિસંભવૌ ॥ 25 ॥
પુત્ત્રાવૈવસ્વતસ્યાત્રપંચકાલાંતકોપમાઃ ।
ગજોગવાક્ષોગવયશ્શરભોગંધમાદનઃ ॥ 26 ॥
દશવાનરકોટ્યશ્ચશૂરાણાંયુદ્ધકાંક્ષિણામ્ ।
શ્રીમતાંદેવપુત્ત્રાણાંશેષંનાખ્યાતુમુત્સહે ॥ 27 ॥
પુત્ત્રોદશરથસ્યૈષસિંહસંહનોયુવા ।
દૂષણોનિહતોયેનખરશ્ચત્રિશિરાસ્તથા ॥ 28 ॥
નાસ્તિરામસ્યસદૃશોવિક્રમેભુવિકશ્ચન ।
વિરાધોનિહતોયેનકબંધશ્ચાંતકોપમઃ ॥ 29 ॥
વક્તુંનશક્તોરામસ્યનરઃકશ્ચિદ્ગુણાન્ ક્ષિતૌ ।
જનસ્થાનગતાયેનયાવંતોરાક્ષસાહતાઃ ॥ 30 ॥
લક્ષ્મણશ્ચાત્રધર્માત્મામાતંગાનામિવર્ષભઃ ।
યસ્યબાણપથંપ્રાપ્યનજીવેદપિવાસવઃ ॥ 31 ॥
શ્વેતોજ્યોતિર્મુખશ્ચાત્રભાસ્કરસ્યાત્મસંભવૌ ।
વરુણસ્યચપુત્ત્રોઽન્યોઃહેમકૂટઃપ્લવંગમઃ ॥ 32 ॥
વિશ્વકર્મસુતોવીરોનલઃપ્લવગસત્તમઃ ।
વિક્રાંતોબલવાનત્રવસુપુત્રસ્સદુર્ધરઃ ॥ 33 ॥
રાક્ષસાનાંવરિષ્ઠશ્ચતવભ્રાતાવીભીષણઃ ।
પ્રતિગૃહ્યપુરીંલંકાંરાઘવસ્યહિતેરતઃ ॥ 34 ॥
ઇતિસર્વંસમાખ્યાતંતવેદંવાનરંબલમ્ ।
સુવેલેઽધિષ્ઠિતંશૈલેશેષકાર્યેભવાન્ગતિઃ ॥ 35 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે યુદ્ધકાંડે ત્રિંશસ્સર્ગઃ ॥
