śrīmadvālmīkīya rāmāyaṇē yuddhakāṇḍam ।
atha dvāviṃśatyadhikaśatatamassargaḥ ।
ētachChrutvāśubhaṃvākyaṃrāghavēṇānubhāṣitam ।
tataśśubhataraṃvākyaṃvyājahāramahēśvaraḥ ॥ 1 ॥
puṣkarākṣa mahābāhō mahāvakṣa parantapa ।
diṣṭyākṛtamidaṅkarmatvayādharmabhṛtāṃvara ॥ 2 ॥
diṣṭyāsarvasyalōkasyapravṛddhandāruṇantamaḥ ।
apāvṛttantvayāsaṅkhyērāmarāvaṇajambhayam ॥ 3 ॥
āśvāsyabharatandīnaṅkausalyāṃ cha yaśasvinīm ।
kaikēyīṃ cha sumitrāṃ cha dṛṣṭavālakṣmaṇamātaram ॥ 4 ॥
prāpyarājyamayōdhyāyānnandayitvāsuhṛjjanam ।
ikṣvākūṇāṅkulēvaṃśaṃsthāpayitvāmahābala ॥ 5 ॥
iṣṭavāturagamēdhēnaprāpyachānuttamaṃyaśaḥ ।
brāhmaṇēbhyōdhanandattvātridivaṅgantumarhasi ॥ 6 ॥
ēṣarājādaśarathōvimānasthaḥpitātava ।
kākutsthamānuṣēlōkēgurustavamahāyaśāḥ ॥ 7 ॥
indralōkaṅgataḥśrīmāṃstvayāputrēṇatāritaḥ ।
lakṣmaṇēnasahabhrātrātvamēmamabhivādaya ॥ 8 ॥
mahadēvavachśrutvārāghavaḥsahalakṣmaṇaḥ ।
lakṣmaṇēnasahabhrātrādadarśapitaramprabhuḥ ॥ 9 ॥
dīpyamānaṃsvayālakṣmavirajō'mbharadhāriṇam ।
lakṣmaṇēnasahabhrātrādadarśapitaramprabhuḥ ॥ 10 ॥
harṣēṇamahatāviṣṭōvimanasthōmahīpatiḥ ।
prāṇaiḥpriyatarandṛṣṭavāputrandaśarathastadā ॥ 11 ॥
ārōpyāṅkēmahabāhurvarāsanagataḥprabhuḥ ।
bāhubhyāṃsampariṣvajyatatōvākyaṃsamādadē ॥ 12 ॥
na mēsvargōbahumatassammānaśchasurarṣabhaiḥ ।
tvayārāmavihīnasyasatyampratiśṛṇōmitē ॥ 13 ॥
adyatvānnihatāmitrandṛṣṭavāsampūrṇamānasam ।
nistīrṇavanavāsaṃ cha prītirāsītparāmama ॥ 14 ॥
kaikēyyāyānichōktānivākyānivadatāṃvara ।
tavapravrājanārthānisthitānihṛdayēmama ॥ 15 ॥
tvāntudṛṣṭavākuśalinampariṣvajyasalakṣmaṇam ।
adyaduḥkhādvimuktō'sminīhārādivabhāskaraḥ ॥ 16 ॥
tāritō'hantvayāputra suputrēṇamahātmanā ।
aṣṭāvakrēṇadharmātmākahōlōbrāhmaṇōyathā ॥ 17 ॥
idānīṃ cha vijānāmiyathāsaumya surēśvaraiḥ ।
vadhārthaṃrāvaṇasyēhavihitampuruṣōttama ॥ 18 ॥
siddhārthākhalukausalyāyātvāṃrāma gṛhaṅgatam ।
vanānnivṛttaṃsaṃhṛṣṭādrakṣyatēśatrusūdanam ॥ 19 ॥
siddhārthāḥkhalutērāma narāyētvāmpurīṅgatam ।
rājyēchāvābhiṣiktaṃ cha drakṣyantēvasudhādhipam ॥ 20 ॥
anuraktēnabalināśuchinādharmachāriṇā ।
ichChēyantvāmahandraṣṭumbharatēnasamāgatam ॥ 21 ॥
chaturdaśasamāssaumyavanēniryātitāstvayā ।
vasatāsītayāsārdhaṃlakṣmaṇēna cha dhīmatā ॥ 22 ॥
nivṛttavanavāsō'sipratijñāpūritātvayā ।
rāvaṇaṃ cha raṇēhatvādēvatāḥparitōṣitāḥ ॥ 23 ॥
kṛtaṅkarmayaśaśślāghyamprāptantēśatrusūdana ।
bhrātṛbhiḥsaharājyasthōdīrghamāyuravāpnuhi ॥ 24 ॥
itibruvāṇaṃrājānaṃrāmaḥprāñjalirabravīt ।
kuruprasādandharmajñakaikēyyābharatasya cha ॥ 25 ॥
saputrāntvāntyajāmītiyaduktākēkayītvayā ।
sa śāpaḥkēkayīṅghōrassaputrāṃ na spṛśētprabhō ॥ 26 ॥
tathēti sa mahārājōrāmamuktvākṛtāñjalim ।
lakṣmaṇaṃ cha pariṣvajyapunarvākyamuvācha ha ॥ 27 ॥
rāmaṃśuśrūṣatābhaktyāvaidēhyāsahasītayā ।
kṛtamamamahāprītiḥprāptandharmaphalaṃ cha tē ॥ 28 ॥
dharmamprāpsyasidharmajña yaśaśchavipulambhuvi ।
rāmēprasannēsvargaṃ cha mahimānantathōttamām ॥ 29 ॥
rāmaṃśuśrūṣabhadrantēsumitrānandavardhana ।
rāmassarvasyalōkasyasubhēṣvabhirataḥsadā ॥ 30 ॥
ētēsēndrāstrayōlōkāssiddhāśchaparamarṣayaḥ ।
abhigamyamahātmānamarchantipuruṣōttamam ॥ 31 ॥
ētattaduktamavyaktamakṣarambrahmanirmitam ।
dēvānāṃhṛdayaṃsaumya guhyaṃrāmaḥparantapa ॥ 32 ॥
avāptandharmacharaṇaṃyaśaśchavipulantvayā ।
ēnaṃśuśrūṣatābhaktyāvaidēhyāsahasītayā ॥ 33 ॥
ityuktvālakṣmaṇaṃrājāsnuṣāmbaddhāñjaliṃsthitām ।
putrītyābhāṣyamadhuraṃśanairēnāmuvācha ha ॥ 34 ॥
kartavyō na tuvaidēhīmanyustyāgamimamprati ।
rāmēṇētvadviśudhyarthaṅkṛtamētaddhitaiṣiṇā ॥ 35 ॥
suduṣkaramidamputritavachāritralakṣaṇam ।
kṛtaṃyattē'nyanārīṇāṃyaśōhyabhibhaviṣyati ॥ 36 ॥
na tvaṅkāmaṃsamādhēyābhartṛśuśrūṣaṇamprati ।
avaśyantumayāvāchyamēṣatēdaivatamparam ॥ 37 ॥
itipratisamādiśyaputrausītāṃ cha rāghavaḥ ।
indralōkaṃvimānēnayayaudaśarathōjvalan ॥ 38 ॥
vimānamāsthāyamahānubhāvaḥśriyā cha samhṛṣṭatannurnṛpōttamaḥ ।
āmantyaputrausahasītayā cha jagāmadēvapravarasyalōkam ॥ 39 ॥
ityārṣē śrīmadrāmāyaṇē vālmīkīya ādikāvyē yuddhakāṇḍē dvāviṃśatyadhikaśatatamassargaḥ ॥
