śrīmadvālmīkīya rāmāyaṇē araṇyakāṇḍam ।
atha chatuḥṣaṣṭitamassargaḥ ।
sa dīnō dīnayā vāchā lakṣmaṇaṃ vākyamabravīt ।
śīghraṃ lakṣmaṇa jānīhi gatvā gōdāvarīṃ nadīm ॥ 1 ॥
api gōdāvarīṃ sītā padmānyānayituṃ gatā ।
ēvamuktastu rāmēṇa lakṣmaṇaḥ paravīrahā ॥ 2 ॥
nadīṃ gōdāvarīṃ ramyāṃ jagāma laghuvikramaḥ ।
tāṃ lakṣmaṇastīrthavatī vichitvā rāmamabravīt ॥ 3 ॥
naināṃ paśyāmi tīrthēṣu krōśatō na śṛṇōti mē ।
kaṃ nu vā dēśamāpannā vaidēhī klēśanāśinī ॥ 4 ॥
na hyahaṃ vēda taṃ dēśaṃ yatra sā janakātmajā ।
lakṣmaṇasya vachaśśrutvā dīnassantāpamōhitaḥ ॥ 5 ॥
rāmassamabhichakrāma svayaṃ gōdāvarīṃ nadīm ।
sa tāmupasthitō rāmaḥ kva sītētyēvamabravīt ॥ 6 ॥
bhūtāni rākṣasēndrēṇa vadhārhēṇa hṛtāmiti ।
na tāṃ śaśaṃsū rāmāya tathā gōdāvarī nadi ॥ 7 ॥
tataḥ prachōditā bhūtaiśśaṃsāsmaitāṃ priyāmiti ।
na tu sābhyavadatasitāṃ pṛṣṭā rāmēṇa śōchatā ॥ 8 ॥
rāvaṇasya tu tadrūpaṃ karmāṇi cha durātmanaḥ ।
dhyātvā bhayāttu vaidēhīṃ sā nadī na śaśaṃsa tām ॥ 9 ॥
nirāśastu tayā nadyā sītāyā darśanē kṛtaḥ ।
uvācha rāmassaumitriṃ sītādarśanakarśitaḥ ॥ 10 ॥
ēṣā gōdāvarī saumya kiñchinna prati bhāṣatē ।
kiṃ nu lakṣmaṇa vakṣyāmi samētya janakaṃ vachaḥ ॥ 11 ॥
mātaraṃ chaiva vaidēhyā vinā tāmahamapriyam ।
yā mē rājyavihīnasya vanē vanyēna jīvataḥ ॥ 12 ॥
sarvaṃ vyapanayēchChōkaṃ vaidēhī kva nu sā gatā ।
jñātipakṣavihīnasya rājaputrīmapaśyataḥ ॥ 13 ॥
manyē dīrghā bhaviṣyanti rātrayō mama jāgrataḥ ।
gōdāvarīṃ janasthānamimaṃ prasravaṇaṃ girim ॥ 14 ॥
sarvāṇyanugamiṣyāmi yadi sītā hi dṛśyatē ।
ētē mṛgā mahāvīrya māmīkṣantē muhurmuhuḥ ॥ 15 ॥
vaktukāmā iva hi mē iṅgitānyupalakṣayē ।
tāṃstu dṛṣṭvā naravyāghrō rāghavaḥ pratyuvācha ha ॥ 16 ॥
kva sītēti nirīkṣanvai bāṣpasaṃruddhayā dṛśā ।
ēvamuktā narēndrēṇa tē mṛgāssahasōtthitāḥ ॥ 17 ॥
dakṣiṇābhimukhāssarvē darśayantō nabhasthalam ।
maithilī hriyamāṇā sā diśaṃ yāmanvapadyata ॥ 18 ॥
tēna mārgēṇa dhāvantō nirīkṣantē narādhipam ।
yēna mārgaṃ cha bhūmiṃ cha nirīkṣantē sma tē mṛgāḥ ॥ 19 ॥
punaścha mārgamichChanti lakṣmaṇēnōpalakṣitāḥ ।
tēṣāṃ vachanasarvasvaṃ lakṣayāmāsa chēṅgitam ॥ 20 ॥
uvācha lakṣmaṇō jyēṣṭhaṃ dhīmānbhrātaramārtavat ।
kva sitēti tvayā pṛṣṭā yathēmē sahasōtthitāḥ ॥ 21 ॥
darśayanti kṣitiṃ chaiva dakṣiṇāṃ cha diśaṃ mṛgāḥ ।
sādhu gachChāvahē dēva diśamētāṃ hi naiṛtim ॥ 22 ॥
yadi syādāgamaḥ kaśchidāryā vā sā'tha lakṣyatē ।
bāḍhamityēva kākutsthaḥ prasthitō dakṣiṇāṃ diśam ॥ 23 ॥
lakṣmaṇānugataśśīmanvīkṣamāṇō vasundharām ।
ēvaṃ sambhāṣamāṇau tāvanyōnyaṃ bhrātarāvubhau ॥ 24 ॥
vasundharāyāṃ patitaṃ puṣpamārgamapaśyatām ।
tāṃ puṣpavṛṣṭiṃ patitāṃ dṛṣṭvā rāmō mahītalē ॥ 25 ॥
uvācha lakṣmaṇaṃ vīrō duḥkhitō duḥkhitaṃ vachaḥ ।
abhijānāmi puṣpāṇi tānīmānīha lakṣmaṇa ॥ 26 ॥
pinaddhāni hi vaidēhyā mayā dattāni kānanē ।
manyē sūryaścha vāyuścha mēdinī cha yaśasvinī ॥ 27 ॥
abhirakṣanti puṣpāṇi prakurvantō mama priyam ।
ēvamuktvā mahābāhuṃ lakṣmaṇaṃ puruṣarṣabhaḥ ॥ 28 ॥
uvācha rāmō dharmātmā giriṃ prasravaṇākulam ।
kachchit kṣitibhṛtāṃ nātha dṛṣṭā sarvāṅgasundarī ॥ 29 ॥
rāmā ramyē vanōddēśē mayā virahitā tvayā ।
kruddhō'bravīdgiriṃ tatra siṃhaḥ kṣudramṛgaṃ yathā ॥ 30 ॥
tāṃ hēmavarṇāṃ hēmābhāṃ sītāṃ darśaya parvata ।
yāvatsānūni sarvāṇi na tē vidhvaṃsayāmyaham ॥ 31 ॥
ēvamuktastu rāmēṇa parvatō maithilīṃ prati ।
śaṃsanniva tatassītāṃ nādarśayata rāghavē ॥ 32 ॥
tatō dāśarathī rāma uvācha cha śilōchchayam ।
mama bāṇāgninirdagdhō bhasmībhūtō bhaviṣyasi ॥ 33 ॥
asēvyaḥ satataṃ chaiva nistṛṇadrumapallavaḥ ।
imāṃ vā saritaṃ chādya śōṣayiṣyāmi lakṣmaṇa ॥ 34 ॥
yadi nākhyāti mē sītāmāryāṃ chandranibhānanām ।
ēvaṃ sa ruṣitō rāmō didhakṣanniva chakṣuṣā ॥ 35 ॥
dadarśa bhūmau niṣkrāntaṃ rākṣasasya padaṃ mahat ।
trastāyā rāmakāṅkṣiṇyāḥ pradhāvantyā itastataḥ ॥ 36 ॥
rākṣasēnānuvṛttāyā maithilyāścha padānyatha ।
sa samīkṣya parikrāntaṃ sītāyā rākṣasasya cha ॥ 37 ॥
bhagnaṃ dhanuścha tūṇī cha vikīrṇaṃ bahudhā ratham ।
sambhrāntahṛdayō rāmaśśaśaṃsa bhrātarampriyam ॥ 38 ॥
paśya lakṣmaṇa vaidēhyāśaśīrṇāḥ kanakabindavaḥ ।
bhūṣaṇānāṃ hi saumitrē mālyāni vividhāni cha ॥ 39 ॥
taptabindunikāśaiścha chitraiḥ kṣatajabindubhiḥ ।
āvṛtaṃ paśya saumitrē sarvatō dharaṇītalam ॥ 40 ॥
manyē lakṣmaṇa vaidēhī rākṣasaiḥ kāmarūpibhiḥ ।
bhitvābhitvā vibhaktā vā bhakṣitā vā bhaviṣyati ॥ 41 ॥
tasyā nimittaṃ vaidēhyā dvayōrvivadamānayōḥ ।
babhūva yuddhaṃ saumitrē ghōraṃ rākṣasayōriha ॥ 42 ॥
muktāmaṇimayaṃ chēdaṃ tapanīyavibhūṣitam ।
dharaṇyāṃ patitaṃ saumya kasya bhagnaṃ mahaddhanuḥ ॥ 43 ॥
taruṇādityasaṅkāśaṃ vaiḍūryagulikāchitam ।
viśīrṇaṃ patitaṃ bhūmau kavachaṃ kasya kāñchanam ॥ 44 ॥
Chatraṃ śataśalākaṃ cha divyamālyōpaśōbhitam ।
bhagnadaṇḍamidaṃ kasya bhūmau samyaṅnipātitam ॥ 45 ॥
kāñchanōraśChadā śchēmē piśāchavadanāḥ kharāḥ ।
bhīmarūpā mahākāyāḥ kasya vā nihatā raṇē ॥ 46 ॥
dīptapāvakasaṅkāśō dyutimānsamaradhvajaḥ ।
apaviddhaścha bhagnaścha kasya sāṅgrāmikō rathaḥ ॥ 47 ॥
rathākṣamātrā viśikhāstapanīyavibhūṣaṇāḥ ।
kasyēmē'bhihatā bāṇāḥ prakīrṇā ghōrakarmaṇaḥ ॥ 48 ॥
śarāvarau śaraiḥ pūrṇau vidhvastau paśya lakṣmaṇa ।
pratōdābhīśuhastō vai kasyāyaṃ sārathirhataḥ ॥ 49 ॥
kasyēmau puruṣavyāghra śayātē nihatau yudhi ।
chāmaragrāhiṇau saumya sōṣṇīṣamaṇikuṇḍalau ॥ 50 ॥
padavīpuruṣasyaiṣā vyaktaṃ kasyāpi rakṣasaḥ ।
vairaṃ śataguṇaṃ paśya mamēdaṃ jīvitāntakam ॥ 51 ॥
sughōrahṛdayaissaumya rākṣasaiḥ kāmarūpibhiḥ ।
hṛtā mṛtā vā sītā sā bhakṣitā vā tapasvinī ॥ 52 ॥
nadharmastrāyatē sītāṃ hriyamāṇāṃ mahāvanē ।
bhakṣitāyāṃ hi vaidēhyāṃ hṛtāyāmapi lakṣmaṇa ॥ 53 ॥
kē hi lōkē priyaṃ kartuṃ śaktāssaumya mamēśvarāḥ ।
kartāramapi lōkānāṃ śūraṃ karuṇavēdinam ॥ 54 ॥
ajñānādavamanyēratsarvabhūtāni lakṣmaṇa ।
mṛduṃ lōkahitē yuktaṃ dāntaṃ karuṇavēdinam ॥ 55 ॥
nirvīrya iti manyantē nūnaṃ māṃ tridaśēśvarāḥ ।
māṃ prāpya hi guṇō dōṣassaṃvṛttaḥ paśya lakṣmaṇa ॥ 56 ॥
adyaiva sarvabhūtānāṃ rakṣasāmabhavāya cha ।
saṃhṛtyaiva śaśijyōtsnāṃ mahānsūrya ivōditaḥ ॥ 57 ॥
saṃhṛtyaiva guṇānsarvānmama tējaḥ prakāśatē ।
naiva yakṣā na gandharvā na piśāchā na rākṣasāḥ ॥ 58 ॥
kinnarā vā manuṣyā vā sukhaṃ prāpsyanti likṣmaṇa ।
mamāstrabāṇasampūrṇamākāśaṃ paśya lakṣmaṇa ॥ 59 ॥
nissampātaṃ kariṣyāmi hyadya trailōkyachāriṇām ।
sanniruddhagrahagaṇamāvāritaniśākaram ॥ 60 ॥
vipraṇaṣṭānalamarudbhāskaradyutisaṃvṛtam ।
vinirmathitaśailāgraṃ śuṣyamāṇajalāśayam ॥ 61 ॥
dhvastadrumalatāgulmaṃ vipraṇāśitasāgaram ।
trailōkyaṃ tu kariṣyāmi saṃyuktaṃ kālakarmaṇā ॥ 62 ॥
na tāṃ kuśalinīṃ sītāṃ pradāsyanti mamēśvarāḥ ।
asminmuhūrtē saumitrē mama drakṣyanti vikramam ॥ 63 ॥
nākāśamutpatiṣyanti sarvabhūtāni lakṣmaṇa ।
mama chāpaguṇōnmuktairbāṇajālairnirantaram ॥ 64 ॥
arditaṃ mama nārāchairdhvastabhrāntamṛgadvijam ।
samākulamamaryādaṃ jagatpaśyādya lakṣmaṇa ॥ 65 ॥
ākarṇapūrṇairiṣubhirjīvalōkaṃ durāvaraiḥ ।
kariṣyē maithilīhētōrapiśāchamarākṣasam ॥ 66 ॥
mama rōṣaprayuktānāṃ sāyakānāṃ balaṃ surāḥ ।
drakṣyantyadya vimuktānāmatidūrātigāminām ॥ 67 ॥
naiva dēvā na daitēyā na piśāchā na rākṣasāḥ ।
bhaviṣyanti mama krōdhāttrailōkyē vipraṇāśitē ॥ 68 ॥
dēvadānavayakṣāṇāṃ lōkā yē rakṣasāmapi ।
bahudhā na bhaviṣyanti bāṇaughaiśśakalīkṛtāḥ ॥ 69 ॥
nirmaryādānimānlōkānkariṣyāmyadya sāyakaiḥ ।
hṛtāṃ mṛtāṃ vā saumitrē na dāsyanti mamēśvarāḥ ॥ 70 ॥
tathārupāṃ hi vaidēhīṃ na dāsyanti yadi priyām ।
nāśayāmi jagatsarvaṃ trailōkyaṃ sacharācharam ॥ 71 ॥
ityuktvā rōṣatāmrākṣō rāmō niṣpīḍya kārmukam ।
śaramādāya sandīptaṃ ghōramāśīviṣōpamam ॥ 72 ॥
sandhāya dhanuṣi śrīmānrāmaḥ parapurañjayaḥ ।
yugāntāgniriva kruddha idaṃ vachanamabravīt ॥ 73 ॥
yathā jarā yathā mṛtyuryathā kālō yathā vidhiḥ ।
nityaṃ na pratihanyantē sarvabhūtēṣu lakṣmaṇa ॥ 74 ॥
tathāhaṃ krōdhasaṃyuktō na nivāryō'smi sarvathā ।
purēva mē chārudantīmaninditāṃ diśanti sītāṃ yadi nādya maithilīm ।
sadēvagandharvamanuṣyapannagaṃ jagatsaśailaṃ parivartayāmyaham ॥ 75 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē chatuḥṣaṣṭitamassargaḥ ॥
