śrīmadvālmīkīya rāmāyaṇē sundarakāṇḍam ।
atha aṣṭatriṃśassargaḥ ।
tatassa kapiśārdūlastēna vākyēna tōṣitaḥ ।
sītāmuvācha tachChṛtvā vākyaṃ vākyaviśāradaḥ ॥ 1 ॥
yuktarūpaṃ tvayā dēvi bhāṣitaṃ śubhadarśanē ।
sadṛśaṃ strīsvabhāvasya sādhvīnāṃ vinayasya cha ॥ 2 ॥
strītvaṃ na tu samarthaṃ hi sāgaraṃ vyativartitum ।
māmadhiṣṭhāya vistīrṇaṃ śatayōjanamāyatam ॥ 3 ॥
dvitīyaṃ kāraṇaṃ yachcha bravīṣi vinayānvitē ।
rāmādanyasya nārhāmi saṃsparśamiti jānaki ॥ 4 ॥
ētattē sadṛśaṃ dēvi patnyāstasya mahātmanaḥ ।
kā hyanyā tvāmṛtē dēvi brūyādvachanamīdṛśam ॥ 5 ॥
śrōṣyatē chaiva kākutsthaḥ sarvaṃ niravaśēṣataḥ ।
chēṣṭitaṃ yattvayā dēvi bhāṣitaṃ mama chāgrataḥ ॥ 6 ॥
kāraṇairbahubhirdēvi rāmapriyachikīrṣayā ।
snēhapraskannamanasā mayaitatsamudīritam ॥ 7 ॥
laṅkāyā duṣpravēśatvāddustaratvānmahōdadhēḥ ।
sāmarthyādātmanaśchaiva mayaitatsamudīritam ॥ 8 ॥
ichChāmi tvāṃ samānētumadyaiva raghubandhunā ।
gurusnēhēna bhaktyā cha nānyathaitadudāhṛtam ॥ 9 ॥
yadi nōtsahasē yātuṃ mayā sārthamaninditē ।
abhijñānaṃ prayachCha tvaṃ jānīyādrāghavō hi yat ॥ 10 ॥
ēvamuktā hanumatā sītā surasutōpamā ।
uvācha vachanaṃ mandaṃ bāṣpapragrathitākṣaram ॥ 11 ॥
idaṃ śrēṣṭhamabhijñānaṃ brūyāstvaṃ tu mama priyam ।
śailasya chitrakūṭasya pādē pūrvōttarē purā ॥ 12 ॥
tāpasāśramavāsinyāḥ prājyamūlaphalōdakē ।
tasminsiddhāśramē dēśē mandākinyā vidūrataḥ ॥ 13 ॥
tasyōpavanaṣaṇḍēṣu nānāpuṣpasugandhiṣu ।
vihṛtya salilē klinnā mamāṅkē samupāviśamaḥ ॥ 14 ॥
tatō māṃsasamāyuktō vāyasaḥ paryatuṇḍayat ।
tamahaṃ lōṣṭamudyamya vārayāmisma vāyasam ॥ 15 ॥
dārayansa cha māṃ kākastattraiva parilīyatē ।
na chāpyupāramanmāṃsādbhakṣārthi balibhōjanaḥ ॥ 16 ॥
utkarṣantyāṃ cha raśanāṃ kruddhāyāṃ mayi pakṣiṇi ।
srasyamānē cha vasanē tatō dṛṣṭā tvayā hyaham ॥ 17 ॥
tvayā'pahasitā chāhaṃ kruddhā saṃlajjitā tadā ।
bhakṣagṛdhnēna kākēna dāritā tvāmupāgatā ॥ 18 ॥
āsīnasya cha tē śrāntā punarutsaṅgamāviśam ।
krudhyantī cha prahṛṣṭēna tvayā'haṃ parisāntvitā ॥ 19 ॥
bāṣpapūrṇamukhī mandaṃ chakṣuṣī parimārjatī ।
lakṣitā'haṃ tvayā nātha vāyasēna prakōpitā ॥ 20 ॥
pariśramātprasuptā cha rāghavāṅkē'pyahaṃ chiram ।
paryāyēṇa prasuptaścha mamāṅkē bharatāgrajaḥ ॥ 21 ॥
sa tatra punarēvātha vāyasassamupāgamat ।
tatassuptaprabuddhāṃ māṃ rāmasyāṅkātsamutthitām ॥ 22 ॥
vāyasassahasāgamya vidadāra stanāntarē ।
punaḥ punarathōtpatya vidadāra sa māṃ bhṛśam ॥ 23 ॥
tatassamukṣitō rāmō muktaiśśōṇitabindubhiḥ ।
vāyasēna tatastēna balavatkliśyamānayā ॥ 24 ॥
sa mayā bōdhitaśśrīmānsukhasuptaḥ parantapaḥ ।
sa māṃ dṛṣṭvā mahābāhurvitunnāṃ stanayōstadā ॥ 25 ॥
āśīviṣa iva kruddhaśvasanvākyamabhāṣata ।
kēna tē nāganāsōru vikṣataṃ vai stanāntaram ॥ 26 ॥
kaḥ krīḍati sarōṣēṇa pañchavaktrēṇa bhōginā ।
vīkṣamāṇastatastaṃ vai vāyasaṃ samudaikṣata ॥ 27 ॥
nakhaissarudhiraistīkṣṇairmāmēvābhimukhaṃ sthitam ।
puttraḥ kila sa śakrasya vāyasaḥ patatāṃ varaḥ ॥ 28 ॥
dharāntaragataśśīghraṃ pavanasya gatau samaḥ ।
tatastasminmahābāhuḥ kōpasaṃvartitēkṣaṇaḥ ॥ 29 ॥
vāyasē kṛtavānkrūrāṃ matiṃ matimatāṃ varaḥ ।
sa darbhaṃ saṃstarādgṛhya brāhmēṇāstrēṇa yōjayat ॥ 30 ॥
sa dīpta iva kālāgnirjajvālābhimukhō dvijam ।
sa taṃ pradīptaṃ chikṣēpa darbhaṃ taṃ vāyasaṃ prati ॥ 31 ॥
tatastaṃ vāyasaṃ darbhassōmbarē'nujagāma ha ।
anusṛṣṭastadā kākō jagāma vividhāṃ gatim ॥ 32 ॥
lōkakāma imaṃ lōkaṃ sarvaṃ vai vichachāra ha ।
sa pitrā cha parityaktassuraiścha samaharṣibhiḥ ॥ 33 ॥
trīnlōkānsamparikramya tamēva śaraṇaṃ gataḥ ।
sa taṃ nipatitaṃ bhūmau śaraṇyaśśaraṇāgatam ॥ 34 ॥
vadhārhamapi kākutsthaḥ kṛpayā paryapālayat ।
paridyūnaṃ viṣaṇṇaṃ cha sa tamāyāntamabravīt ॥ 35 ॥
mōghaṃ kartuṃ na śakyaṃ tu brāhmamastraṃ taduchyatām ।
hinastu dakṣiṇākṣi tvachChara ityatha sō'bravīt ॥ 36 ॥
tatastasyākṣi kākasya hinasti sma sa dakṣiṇam ।
dattvā sa dakṣiṇaṃ nētraṃ prāṇēbhyaḥ parirakṣitaḥ ॥ 37 ॥
sa rāmāya namaskṛtya rājñē daśarathāya cha ।
visṛṣṭastēna vīrēṇa pratipēdē svamālayam ॥ 38 ॥
matkṛtē kākamātrē tu brahmāstraṃ samudīritam ।
kasmādyō māṃ harēttvattaḥ kṣamasē taṃ mahīpatē ॥ 39 ॥
sa kuruṣva mahōtsāhaḥ kṛpāṃ mayi nararṣabha ।
tvayā nāthavatī nātha hyanāthā iva dṛśyatē ॥ 40 ॥
ānṛśaṃsyaṃ parō dharmastavattta aiva mayā śrutaḥ ।
jānāmi tvāṃ mahāvīryaṃ mahōtsāhaṃ mahābalam ॥ 41 ॥
apārapāramakṣōbhyaṃ gāmbhīryātsāgarōpamam ।
bhartāraṃ sasamudrāyā dharaṇyā vāsavōpamam ॥ 42 ॥
ēvamastravidāṃ śrēṣṭhassatyavānbalavānapi ।
kimarthamastraṃ rakṣassu na yōjayasi rāghava ॥ 43 ॥
na nāgā nā'pi gandharvā nāsurā na marudgaṇāḥ ।
rāmasya samarē vēgaṃ śaktāḥ pratisamādhitum ॥ 44 ॥
tasya vīryavataḥ kaśchidyadyasti mayi sambhramaḥ ।
kimarthaṃ na śaraistīkṣṇaiḥ kṣayaṃ nayati rākṣasān ॥ 45 ॥
bhrāturādēśamādāya lakṣmaṇō vā parantapaḥ ।
kasya hētōrna māṃ vīraḥ paritrāti mahābalaḥ ॥ 46 ॥
yadi tau puruṣavyāghrau vāyvagnisamatējasau ।
surāṇāmapi durdharṣau kimarthaṃ māmupēkṣataḥ ॥ 47 ॥
mamaiva duṣkṛtaṃ kiñchinmahadasti na saṃśayaḥ ।
samarthāvapi tau yanmāṃ nāvēkṣētē parantapau ॥ 48 ॥
vaidēhyā vachanaṃ śrutvā karuṇaṃ sāśrubhāṣitam ।
athābravīnmahātējā hanumānmārutātmajaḥ ॥ 49 ॥
tvachChōkavimukhō rāmō dēvi satyēna tē śapē ।
rāmē duḥkhābhipannē cha lakṣmaṇaḥ paritapyatē ॥ 50 ॥
kathañchidbhavatī dṛṣṭā na kālaḥ paridēvitum ।
imaṃ muhūrtaṃ duḥkhānāṃ drakṣyasyantamaninditē ॥ 51 ॥
tāvubhau puruṣavyāghrau rājaputrau mahābalau ।
tvaddarśanakṛtōtsāhau laṅkāṃ bhasmīkariṣyataḥ ॥ 52 ॥
hattvā cha samarē krūraṃ rāvaṇaṃ sahabāndhavam ।
rāghavastvāṃ viśālākṣi nēṣyati svāṃ purīṃ prati ॥ 53 ॥
brūhi yadrāghavō vāchyō lakṣmaṇaścha mahābalaḥ ।
sugrīvō vāpi tējasvī harayō'pi samāgatāḥ ॥ 54 ॥
ityuktavati tasmiṃstu sītā surasutōpamā ।
uvācha śōkasantaptā hanumantaṃ plavaṅgamam ॥ 55 ॥
kausalyā lōkabhartāraṃ suṣuvē yaṃ manasvinī ।
taṃ mamārthē sukhaṃ pṛchCha śirasā chābhivādaya ॥ 56 ॥
srajaścha sarvaratnāni priyā yāścha varāṅganāḥ ।
aiśvaryaṃ cha viśālāyāṃ pṛthivyāmapi durlabham ॥ 57 ॥
pitaraṃ mātaraṃ chaiva sammānyābhiprasādya cha ।
anupravrajitō rāmaṃ sumitrā yēna suprajāḥ ॥ 58 ॥
ānukūlyēna dharmātmā tyaktvā sukhamanuttamam ।
anugachChati kākutsthaṃ bhrātaraṃ pālayanvanē ॥ 59 ॥
siṃhaskandhō mahābāhurmanasvī priyadarśinaḥ ।
pitṛvadvartatē rāmē mātṛvanmāṃ samācharan ॥ 60 ॥
hriyamāṇāṃ tadā vīrō na tu māṃ vēda lakṣmaṇaḥ ।
vṛddhōpasēvī lakṣmīvān śaktō na bahubhāṣitā ॥ 61 ॥
rājaputraḥ priyaḥ śrēṣṭhaḥ sadṛśaḥ śvaśurasya mē ।
mamaḥ priyatarō nityaṃ bhrātā rāmasya lakṣmaṇaḥ ॥ 62 ॥
niyuktō dhuri yasyāṃ tu tāmudvahati vīryavān ।
yaṃ dṛṣṭvā rāghavō naiva vṛttamāryamanusmarēt ॥ 63 ॥
sa mamārthāya kuśalaṃ vaktavyō vachanānmama ।
mṛdurnityaṃ śuchirdakṣaḥ priyō rāmasya lakṣmaṇaḥ ॥ 64 ॥
yathā hi vānaraśrēṣṭha duḥkhakṣayakarō bhavēt ।
tvamasminkāryaniryōgē pramāṇaṃ harisattamaḥ ॥ 65 ॥
rāghavastvatsamārambhānmayi yatnaparō bhavēt ।
idaṃ brūyāścha mē nāthaṃ śūraṃ rāmaṃ punaḥ punaḥ ॥ 66 ॥
jīvitaṃ dhārayiṣyāmi māsaṃ daśarathātmaja ।
ūrdhvaṃ māsānna jīvēyaṃ satyēnāhaṃ bravīmi tē ॥ 67 ॥
rāvaṇēnōparuddhāṃ māṃ nikṛtya pāpakarmaṇā ।
trātumarhasi vīra tvaṃ pātālādiva kauśikīm ॥ 68 ॥
tatō vastragataṃ muktvā divyaṃ chūḍāmaṇiṃ śubham ।
pradēyō rāghavāyēti sītā hanumatē dadau ॥ 69 ॥
pratigṛhya tatō vīrō maṇiratnamanuttamam ।
aṅgulyā yōjayāmāsa na hyasya prābhavadbhujaḥ ॥ 70 ॥
maṇiratnaṃ kapivaraḥ pratigṛhyābhivādya cha ।
sītāṃ pradakṣiṇaṃ kṛtvā praṇataḥ pārvśataḥ sthitaḥ ॥ 71 ॥
harṣēṇa mahatā yuktaḥ sītādarśanajēna saḥ ।
hṛdayēna gatō rāmaṃ śarīrēṇa tu viṣṭhitaḥ ॥ 72 ॥
maṇivaramupagṛhya taṃ mahārhaṃ janakanṛpātmajayā dhṛtaṃ prabhāvāt ।
giririva pavanāvadhūtamuktaḥ sukhitamanāḥ pratisaṅkramaṃ prapēdē ॥ 73 ॥
ityārṣē śrīmadrāmāyaṇē vālmīkīya ādikāvyē sundarakāṇḍē aṣṭatriṃśassargaḥ ॥
