śrīmadvālmīkīya rāmāyaṇē ayōdhyākāṇḍam ।
atha daśādhikaśatatamassargaḥ ।
kruddhamājñāya rāmaṃ tu vasiṣṭhaḥ pratyuvācha ha ।
jābālirapi jānītē lōkasyāsya gatāgatim ॥ 1 ॥
nivartayitukāmastu tvāmētadvākyamabravīt ।
imāṃ lōkasamutpattiṃ lōkanātha nibōdha mē ॥ 2 ॥
sarvaṃ salilamēvāsītpṛthivī yatra nirmitā ।
tataḥ samabhavadbrahmā svayambhūrdaivataiḥ saha ॥ 3 ॥
sa varāhastatō bhūtvā prōjjahāra vasundharām ।
asṛjachcha jagatsarvaṃ saha putraiḥ kṛtātmabhiḥ ॥ 4 ॥
ākāśaprabhavō brahmā śāśvatō nitya avyayaḥ ।
tasmānmarīchiḥ sañjajñē marīchēḥ kaśyapaḥ sutaḥ ॥ 5 ॥
vivasvānkāśyapāt jajñē manurvaivasvataḥ svayam ।
sa tu prajāpatiḥ pūrvamikṣvākustu manōḥ sutaḥ ॥ 6 ॥
yasyēyaṃ prathamaṃ dattā samṛddhā manunā mahī ।
tamikṣvākumayōdhyāyāṃ rājānaṃ viddhi pūrvakam ॥ 7 ॥
ikṣvākōstu suta śrīmānkukṣirēvēti viśrutaḥ ।
kukṣērathātmajō vīrō vikukṣirudapadyata ॥ 8 ॥
vikukṣēstu mahātējā bāṇaḥ putra pratāpavān ।
bāṇasya tu mahābāhuranaraṇyō mahātapāḥ ॥ 9 ॥
nānāvṛṣṭirbabhūvāsminnadurbhikṣaṃ satāṃ varē ।
anaraṇyē mahārājē taskarō nāpi kaśchana ॥ 10 ॥
anaraṇyānmahābāhuḥ pṛthu rājā babhūva ha ।
tasmātpṛthōmēhārājastriśaṅkurudapadyata ॥ 11 ॥
sa satyavachanād vīraḥ saśarīrō divaṃ gataḥ ।
triśaṅkōrabhavatsūnurdundhumārō mahāyaśāḥ ॥ 12 ॥
dundhumārānmahātējā yuvanāśvō vyajāyata ।
yuvanāśvasuta śśrīmānmāndhātā samapadyata ॥ 13 ॥
māndhātusta mahātējāḥ susandhirudapadyata ।
susandhērapi putrau dvau dhruvasandhiḥ prasēnajit ॥ 14 ॥
yaśasvī dhruvasandhēstu bharatō ripusūdanaḥ ।
yuvanāśvasuta śśrīmānmāndhātā samapadyata ॥ 15 ॥
māndhātusta mahātējā ssusandhirudapadyata ।
susandhērapi putrau dvau dhruvasandhiḥ prasēnajit ॥ 16 ॥
yaśasvī dhruvasandhēstu bharatō ripusūdanaḥ ।
bharatāttu mahābāhōrasitō nāma jāyata ॥ 17 ॥
yasyaitē pratirājāna udapadyanta śatravaḥ ।
haihayāstālajaṅghāścha śūrāścha śaśibindavaḥ ॥ 18 ॥
tāṃstu sarvānprativyūhya yuddhē rājā pravāsitaḥ ।
sa cha śailavarē ramyē babhūvābhiratō muniḥ ॥ 19 ॥
dvē chāsya bhāryē garbhiṇyau babhūvaturiti śrutiḥ ।
ēkā garbhavināśāya sapatnyai garalaṃ dadau ॥ 20 ॥
bhārgavaśchyavanō nāma himavantamupāśritaḥ ।
tamṛṣiṃ samupāgamya kālindī tvabhyavādayat ॥ 21 ॥
sa tāmabhyavadadviprō varēpsuṃ putrajanmani ।
putrastē bhavitā dēvi mahātmā lōkaviśrutaḥ ॥ 22 ॥
dhārmikaścha suśīlaścha vaṃśakartā'risūdanaḥ ।
kṛtvā pradakṣiṇaṃ hṛṣṭā munintamanumānya cha ॥ 23 ॥
padmapatrasamānākṣaṃ padmagarbhasamaprabham ।
tataḥ sā gṛhamāgamya dēvī putraṃ vyajāyata ॥ 24 ॥
sapatnyā tu garastasyai dattō garbhajighāṃsayā ।
garēṇa saha tēnaiva jāta ssa sagarō'bhavat ॥ 25 ॥
sa rājā sagarō nāma yaḥ samudramakhānayat ।
iṣṭvā parvaṇi vēgēna trāsayana imāḥ prajāḥ ॥ 26 ॥
asamañjastu putrō'bhūtsagarasyēti na śśrutam ।
jīvannēva sa pitrā tu nirastaḥ pāpakarmakṛt ॥ 27 ॥
aṃśumāniti putrō'bhūdasamañjasya vīryavān ।
dilīpōṃśumataḥ putrō dilīpasya bhagīrathaḥ ॥ 28 ॥
bhagīrathātkakutsthastu kākutsthā yēna viśrutāḥ ।
kakutsthasya cha putrō'bhūdraghuryēna cha rāghavāḥ ॥ 29 ॥
raghōstu putrastējasvī pravṛddhaḥ puruṣādakaḥ ।
kalmāṣapāda ssaudāsa ityēvaṃ prathitō bhuvi ॥ 30 ॥
kalmāṣapādaputrō'bhūchChaṅkhaṇastviti viśrutaḥ ।
yastu tadvīryamāsādya sahasainyō vyanīnaśat ॥ 31 ॥
śaṅkhaṇasya cha putrō'bhūchChūra śrīmānsudarśanaḥ ।
sudarśanasyāgnivarṇaḥ agnivarṇasya śīghragaḥ ॥ 32 ॥
śīghragasya maruḥ putrō marōḥ putraḥ praśuśruvaḥ ।
praśuśruvasya putrōbhūdambarīṣō mahādyutiḥ ॥ 33 ॥
ambarīṣasya putrōbhūnnahuṣaḥ satyavikramaḥ ।
nahuṣasya cha nābhāgaḥ putraḥ paramadhārmikaḥ ॥ 34 ॥
ajaścha suvrataśchaiva nābhāgasya sutāvubhau ।
ajasyaiva cha dharmātmā rājā daśarathassutaḥ ॥ 35 ॥
tasya jyēṣṭhō'si dāyādō rāma ityabhiviśrutaḥ ।
tadgṛhāṇa svakaṃ rājyamavēkṣasva janaṃ nṛpa ॥ 36 ॥
ikṣvākūṇāṃ hi sarvēṣāṃ rājā bhavati pūrvajaḥ ।
pūrvajē nāparaḥ putrō jyēṣṭhō rājyē'bhiṣichyatē ॥ 37 ॥
sa rāghavāṇāṃ kuladharmamātmanaḥ sanātanaṃ nādya vihantumarhasi ।
prabhūtaratnāmanuśādhi mēdinīṃ prabhūtarāṣṭrāṃ pitṛvanmahāyaśaḥ ॥ 38 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē daśādhikaśatatamassargaḥ ॥
