śrīmadvālmīkīya rāmāyaṇē yuddhakāṇḍam ।
atha ṣaṭtriṃśassargaḥ ।
tattumālyavatōvākyaṃhitamuktandaśānanaḥ ।
namarṣayatiduṣṭātmākālasyavaśamāgataḥ ॥ 1 ॥
nabad dhvābhrukuṭīṃvaktrēkrōdhasyavaśamāgataḥ ।
amarṣātparivṛttākṣōmālyavantamathābravīt ॥ 2 ॥
hitabudhyāyadahitaṃvachaḥparuṣamuchyatē ।
parapakṣampraniśyaivanaitachchrōtragatammama ॥ 3 ॥
mānuṣaṅkṛpaṇaṃrāmamēkaṃśākhāmṛgāśrayam ।
samarthammanyasēkēnatyaktampitrāvanālayam ॥ 4 ॥
rakṣasāmīśvarammāñchadēvānāñchabhayaṅkaram ।
hīnammāmmanyasēkēnahyahīnaṃsarvavikramaiḥ ॥ 5 ॥
vīradvēṣēṇavāśaṅkēpakṣapātēnavāripōḥ ।
tvayāhamparuṣāṇyuktaḥparaprōtsāhanēnavā ॥ 6 ॥
prabhavantampadasthaṃhiparuṣaṅkō'bhibhāṣatē ।
paṇḍitaśśāstratattvajñōvināprōtsāhanādripōḥ ॥ 7 ॥
ānīyachavanāsatītāmpadmahīnāmivaśriyam ।
kimarthampratidāsyāmirāghavasyabhayādaham ॥ 8 ॥
vṛtaṃvānarakōṭībhissasugrīvaṃsalakṣmaṇam ।
paśyakaiśchidahōbhistvaṃrāghavannihatammayā ॥ 9 ॥
dvandvēyasyanatiṣṭhantidaivatānyapisaṃyugē ।
sakasmādrāvaṇōyuddhēbhayamāhārayiṣyati ॥ 10 ॥
dvidhābhajyēyamapyēvannanamēyantukasyachit ।
ēṣamēsahajōdōṣassvabhāvōduratikramaḥ ॥ 11 ॥
yaditāvatsamudrētusēturbaddhōyadṛchChayā ।
rāmēṇavismayaḥkō'trayēvamēbhayamāgatam ॥ 12 ॥
satutīrtvārṇavaṃrāmassahavānarasēnayā ।
pratijānāmitēsatyannajīvanpratiyāsyati ॥ 13 ॥
ēvaṃ bruvāṇaṃ samrabdhaṃ ruṣṭaṃ vijnāya rāvaṇam ।
vrīḍitō mālyavān vākyaṃ na uttaraṃ pratyapadyata ॥ 14 ॥
jayāśiṣācharājānaṃvardhayitvāyathōchitam ।
mālyavānabhyanujñātōjagāmasvannivēśanam ॥ 15 ॥
rāvaṇastusahāmātyōmantrayitvāvimṛśyacha ।
laṅkāyāmatulāṅguptiṅkārayāmāsarākṣasaḥ ॥ 16 ॥
vyādidēśasapūrvasyāmprahastandvārirākṣasam ।
dakṣiṇasyāmmahāvīryaumahāpārśvamahādarau ॥ 17 ॥
paśchimāyāmathōdvāriputramindrajitantadā ।
vyādidēśamayāmāyambahūbhīrākṣasairbhahubhirvṛtam ॥ 18 ॥
utarasyāmpuradvārivyādiśyaśukasāraṇau ।
svayañchātragamiṣyāmimantriṇastānuvāchaha ॥ 19 ॥
rākṣasāntuvirūpākṣammahāvīryaparākramam ।
madhyamē'sthāpayadgulmēbahubhissaharākṣasaiḥ ॥ 20 ॥
ēvaṃvidhānaṃlaṅkāyāṅkṛtvārākṣasapuṅgavaḥ ।
kṛtakṛtyamivātmānammanyatēkālachōditaḥ ॥ 21 ॥
visarjayāmāsatatassamantriṇōvidhānamājñāpyapurasyapuṣkalam ।
jayāśiṣāmantrigaṇēnapūjitōvivēśachā'ntaḥpuramṛddhimanmahat ॥ 22 ॥
ityārṣē śrīmadrāmāyaṇē vālmīkīya ādikāvyē yuddhakāṇḍē ṣaṭtriṃśassargaḥ ॥
