śrīmadvālmīkīya rāmāyaṇē ayōdhyākāṇḍam ।
atha chaturnavatitamassargaḥ ।
dīrghakālōṣita stasmingirau girivanapriyaḥ ।
vaidēhyāḥ priyamākāṅkṣansvaṃ cha chittaṃ vilōbhayan ॥ 1 ॥
atha dāśarathiśchitraṃ chitrakūṭamadarśayat ।
bhāryāmamarasaṅkāśa śśachīmiva purandaraḥ ॥ 2 ॥
dīrghakālōṣita stasmingirau girivanapriyaḥ ।
vaidēhyāḥ priyamākāṅkṣansvaṃ cha chittaṃ vilōbhayan ॥ 3 ॥
atha dāśarathiśchitraṃ chitrakūṭamadarśayat ।
bhāryāmamarasaṅkāśa śśachīmiva purandaraḥ ॥ 4 ॥
na rājyādbhraṃśanaṃ bhadrē na suhṛdbhirvinābhavaḥ ।
manō mē bādhatē dṛṣṭvā ramaṇīyamimaṃ girim ॥ 5 ॥
paśyēmamachalaṃ bhadrē nānādvijagaṇāyutam ।
śikharaiḥ khamivōdviddhairdhātumadbhirvibhūṣitam ॥ 6 ॥
kēchidrajatasaṅkāśāḥ kēchitkṣatajasannibhāḥ ।
pītamāñjiṣṭavarṇāścha kēchinmaṇivaraprabhāḥ ॥ 7 ॥
puṣyārkakētakābhāścha kēchijjyōtīrasaprabhāḥ ।
virājantē'chalēndrasya dēśā dhātuvibhūṣitāḥ ॥ 8 ॥
nānāmṛgagaṇadvīpitararkṣvṛkṣagaṇairvutaḥ ।
aduṣṭairbhātyayaṃ śailō bahupakṣisamāyutaḥ ॥ 9 ॥
āmrajambvasanairlōdhraiḥ priyālaiḥ panasairdhavaiḥ ।
aṅkōlairbhavyatiniśairbilvatinduka vēṇubhiḥ ॥ 10 ॥
kāśmaryariṣṭavaruṇairmadhūkaistilakaistathā ।
badaryāmalakairnīpairvētradhanvanabījakaiḥ ॥ 11 ॥
puṣpavadbhiḥ phalōpētaiśChāyāvadbhirmanōramaiḥ ।
ēvamādibhirākīrṇaḥ śriyaṃ puṣyatyayaṃ giriḥ ॥ 12 ॥
śailaprasthēṣu ramyēṣu paśyēmān rōmaharṣaṇān ।
kinnarān dvandvaśō bhadrē ramamāṇānmanasvinaḥ ॥ 13 ॥
śākhāvasaktān khaḍgāṃścha pravarāṇyambarāṇi cha ।
paśya vidyādharastrīṇāṃ krīḍōddhēśānmanōramān ॥ 14 ॥
jalaprapātairudbhēdairniṣyandaiścha kvachitkvachit ।
sravadbhirbhātyayaṃ śaila ssravanmada iva dvipaḥ ॥ 15 ॥
guhāsamīraṇō gandhānnānāpuṣpabhavānvahan ।
ghrāṇatarpaṇamabhyētya kaṃ naraṃ na praharṣayēt ॥ 16 ॥
yadīha śaradō'nēkāstvayā sārdhamaninditē ।
lakṣmaṇēna cha vatsyāmi na māṃ śōkaḥ pradhakṣyati ॥ 17 ॥
bahupuṣpaphalē ramyē nānādvijagaṇāyutē ।
vichitraśikharē hyasminratavānasmi bhāmini ॥ 18 ॥
anēna vanavāsēna mayā prāptaṃ phaladvayam ।
pituśchānṛṇatā dharmē bharatasya priyaṃ tathā ॥ 19 ॥
vaidēhi ramasē kachchichchitrakūṭē mayā saha ।
paśyantī vividhānbhāvānmanōvākkāyasammatān ॥ 20 ॥
idamēvāmṛtaṃ prāhū rājñi rājarṣayaḥ parē ।
vanavāsaṃ bhavārthāya prētya mē prapitāmahāḥ ॥ 21 ॥
śilā śśailasya śōbhantē viśālā śśataśō'bhitaḥ ।
bahulā bahulairvarṇairnīlapītasitāruṇaiḥ ॥ 22 ॥
niśibhāntyachalēndrasya hutāśanaśikhā iva ।
ōṣadhyaḥ svaprabhālakṣmyā bhrājamānā ssahasraśaḥ ॥ 23 ॥
kēchit kṣayanibhā dēśāḥ kēchidudyānasannibhāḥ ।
kēchidēkaśilā bhānti parvatasyāsya bhāmini ॥ 24 ॥
bhittvēva vasudhāṃ bhāti chitrakūṭassamutthitaḥ ।
chitrakūṭasya kūṭō'sau dṛśyatē sarvata śśubhaḥ ॥ 25 ॥
kuṣṭhasthagarapunnāga bhūrjapatrōttarachChadān ।
kāmināṃ svāstarānpaśya kuśēśayadalāyutān ॥ 26 ॥
mṛditāśchāpaviddhāścha dṛśyantē kamalasrajaḥ ।
kāmibhirvanitē paśya phalāni vividhāni cha ॥ 27 ॥
vasvaukasārāṃ nalinīmatyētīvōttarānkurūn ।
parvataśchitrakūṭō'sau bahumūlaphalōdakaḥ ॥ 28 ॥
imaṃ tu kālaṃ vanitē vijahrivāṃstvayā cha sītē saha lakṣmaṇēna cha ।
ratiṃ prapatsyē kuladharmavardhanīṃ satāṃ pathi svairniyamaiḥ paraiḥ sthitaḥ ॥ 29 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē chaturnavatitamassargaḥ ॥
