śrīmadvālmīkīya rāmāyaṇē sundarakāṇḍam ।
atha aṣṭāviṃśassargaḥ ।
sā rākṣasēndrasya vachō niśamya tadrāvaṇasyāpriyamapriyārtā ।
sītā vitatrāsa yathā vanāntē siṃhābhipannā gajarājakanyā ॥ 1 ॥
sā rākṣasīmadhyagatā cha bhīru rvāgbhirbhṛśaṃ rāvaṇatarjitā cha ।
kāntāramadhyē vijanē visṛṣṭā bālēva kanyā vilalāpa sītā ॥ 2 ॥
satyaṃ batēdaṃ pravadanti lōkē nākālamṛtyurbhavatīti santaḥ ।
yatrāhamēvaṃ paribhartsyamānā jīvāmi dīnā kṣaṇamapyapuṇyā ॥ 3 ॥
sukhādvihīnaṃ bahuduḥkhapūrṇa midaṃ tu nūnaṃ hṛdayaṃ sthiraṃ mē ।
viśīryatē yanna sahasradhā'dya vajrāhataṃ śṛṅgamivāchalasya ॥ 4 ॥
naivāsti dōṣō mama nūnamatra vadhyāhamasyāpriyadarśanasya ।
bhāvaṃ na chāsyāhamanupradātu malaṃ dvijō mantramivādvijāya ॥ 5 ॥
nūnaṃ mamāṅgānyachirādanāryaḥ śastraiśśitaiśChētsyati rākṣasēndraḥ ।
tasminanāgachChati lōkanāthē garbhasthajantōriva śalyakṛntaḥ ॥ 6 ॥
duḥkhaṃ batēdaṃ mama duḥkhitāyā māsau chirāyādhigamiṣyatō dvau ।
baddhasya vadhyasya tathā niśāntē rājāparādhādiva taskarasya ॥ 7 ॥
hā rāma hā lakṣmaṇa hā sumitrē hā rāmamātaḥ saha mē jananyā ।
ēṣā vipadyāmyahamalpabhāgyā mahārṇavē nauriva mūḍhavātā ॥ 8 ॥
tarasvinau dhārayatā mṛgasya sattvēna rūpaṃ manujēndraputrau ।
nūnaṃ viśastau mama kāraṇāttau siṃharṣabhau dvāviva vaidyutēna ॥ 9 ॥
nūnaṃ sa kālō mṛgarūpadhārī māmalpabhāgyāṃ lulubhē tadānīm ।
yatrāryaputraṃ visasarja mūḍhā rāmānujaṃ lakṣmaṇapūrvajaṃ cha ॥ 10 ॥
hā rāma satyavrata dīrghabāhō hā pūrṇachandrapratimānavaktra ।
hā jīvalōkasya hitaḥ priyaścha vadhyāṃ na māṃ vētsi hi rākṣasānām ॥ 11 ॥
ananya daivatvamiyaṃ kṣamā cha bhūmau cha śayyā niyamaścha dharmē ।
pativratātvaṃ viphalaṃ mamēdaṃ kṛtaṃ kṛtaghnēṣviva mānuṣāṇām ॥ 12 ॥
mōghō hi dharmaścharitō mayāyaṃ tathaikapatnītvāmidaṃ nirartham ।
yā tvāṃ na paśyāmi kṛśā vivarṇā hīnā tvayā saṅgamanē nirāśā ॥ 13 ॥
piturnidēśaṃ niyamēna kṛtvā vanānnivṛttaścharitavrataścha ।
strībhistu manyē vipulēkṣaṇābhistvaṃ raṃsyasē vītabhayaḥ kṛtārthaḥ ॥ 14 ॥
ahaṃ tu rāma tvayi jātakāmā chiraṃ vināśāya nibaddhabhāvā ।
mōghaṃ charitvātha tapō vratañcha tyakṣyāmi dhigjīvitamalpabhāgyām ॥ 15 ॥
sā jīvitaṃ kṣipramahaṃ tyajēyaṃ viṣēṇa śastrēṇa śitēna vāpi ।
viṣasya dātā na hi mē'sti kaśchi chChastrasya vā vēśmani rākṣasasya ॥ 16 ॥
itīva dēvī bahudhā vilapya sarvātmanā rāmamanusmarantī ।
pravēpamānā pariśuṣkavaktrā nagōttamaṃ puṣpitamāsasāda ॥ 17 ॥
sā śōkataptā bahudhā vichintya sītā'tha vēṇyudgrathanaṃ gṛhītvā ।
udbudhya vēṇyudgrathanēna śīghramahaṃ gamiṣyāmi yamasya mūlam ॥ 18 ॥
upasthitā sā mṛdusarvagātrī śākhāṃ gṛhatvā'dha nagasya tasya ।
tasyāstu rāmaṃ pravichintayantyā rāmānujaṃ svaṃ cha kulaṃ śubhāṅgyāḥ ॥ 19 ॥
śēkānimittāni tathā bahūni dhairyārjitāni pravarāṇi lōkē ।
prādurnimittāni tadā babhūvuḥ purāpi siddhānyupalakṣitāni ॥ 20 ॥
ityārṣē śrīmadrāmāyaṇē vālmīkīya ādikāvyē sundarakāṇḍē aṣṭāviṃśassargaḥ ॥
