ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଚତୁଃଷଷ୍ଟିତମସ୍ସର୍ଗଃ ।
ସ ଦୀନୋ ଦୀନୟା ଵାଚା ଲକ୍ଷ୍ମଣଂ ଵାକ୍ୟମବ୍ରଵୀତ୍ ।
ଶୀଘ୍ରଂ ଲକ୍ଷ୍ମଣ ଜାନୀହି ଗତ୍ଵା ଗୋଦାଵରୀଂ ନଦୀମ୍ ॥ 1 ॥
ଅପି ଗୋଦାଵରୀଂ ସୀତା ପଦ୍ମାନ୍ୟାନୟିତୁଂ ଗତା ।
ଏଵମୁକ୍ତସ୍ତୁ ରାମେଣ ଲକ୍ଷ୍ମଣଃ ପରଵୀରହା ॥ 2 ॥
ନଦୀଂ ଗୋଦାଵରୀଂ ରମ୍ୟାଂ ଜଗାମ ଲଘୁଵିକ୍ରମଃ ।
ତାଂ ଲକ୍ଷ୍ମଣସ୍ତୀର୍ଥଵତୀ ଵିଚିତ୍ଵା ରାମମବ୍ରଵୀତ୍ ॥ 3 ॥
ନୈନାଂ ପଶ୍ୟାମି ତୀର୍ଥେଷୁ କ୍ରୋଶତୋ ନ ଶୃଣୋତି ମେ ।
କଂ ନୁ ଵା ଦେଶମାପନ୍ନା ଵୈଦେହୀ କ୍ଲେଶନାଶିନୀ ॥ 4 ॥
ନ ହ୍ୟହଂ ଵେଦ ତଂ ଦେଶଂ ୟତ୍ର ସା ଜନକାତ୍ମଜା ।
ଲକ୍ଷ୍ମଣସ୍ୟ ଵଚଶ୍ଶ୍ରୁତ୍ଵା ଦୀନସ୍ସଂତାପମୋହିତଃ ॥ 5 ॥
ରାମସ୍ସମଭିଚକ୍ରାମ ସ୍ଵୟଂ ଗୋଦାଵରୀଂ ନଦୀମ୍ ।
ସ ତାମୁପସ୍ଥିତୋ ରାମଃ କ୍ଵ ସୀତେତ୍ୟେଵମବ୍ରଵୀତ୍ ॥ 6 ॥
ଭୂତାନି ରାକ୍ଷସେଂଦ୍ରେଣ ଵଧାର୍ହେଣ ହୃତାମିତି ।
ନ ତାଂ ଶଶଂସୂ ରାମାୟ ତଥା ଗୋଦାଵରୀ ନଦି ॥ 7 ॥
ତତଃ ପ୍ରଚୋଦିତା ଭୂତୈଶ୍ଶଂସାସ୍ମୈତାଂ ପ୍ରିୟାମିତି ।
ନ ତୁ ସାଭ୍ୟଵଦତସିତାଂ ପୃଷ୍ଟା ରାମେଣ ଶୋଚତା ॥ 8 ॥
ରାଵଣସ୍ୟ ତୁ ତଦ୍ରୂପଂ କର୍ମାଣି ଚ ଦୁରାତ୍ମନଃ ।
ଧ୍ୟାତ୍ଵା ଭୟାତ୍ତୁ ଵୈଦେହୀଂ ସା ନଦୀ ନ ଶଶଂସ ତାମ୍ ॥ 9 ॥
ନିରାଶସ୍ତୁ ତୟା ନଦ୍ୟା ସୀତାୟା ଦର୍ଶନେ କୃତଃ ।
ଉଵାଚ ରାମସ୍ସୌମିତ୍ରିଂ ସୀତାଦର୍ଶନକର୍ଶିତଃ ॥ 10 ॥
ଏଷା ଗୋଦାଵରୀ ସୌମ୍ୟ କିଂଚିନ୍ନ ପ୍ରତି ଭାଷତେ ।
କିଂ ନୁ ଲକ୍ଷ୍ମଣ ଵକ୍ଷ୍ୟାମି ସମେତ୍ୟ ଜନକଂ ଵଚଃ ॥ 11 ॥
ମାତରଂ ଚୈଵ ଵୈଦେହ୍ୟା ଵିନା ତାମହମପ୍ରିୟମ୍ ।
ୟା ମେ ରାଜ୍ୟଵିହୀନସ୍ୟ ଵନେ ଵନ୍ୟେନ ଜୀଵତଃ ॥ 12 ॥
ସର୍ଵଂ ଵ୍ୟପନୟେଚ୍ଛୋକଂ ଵୈଦେହୀ କ୍ଵ ନୁ ସା ଗତା ।
ଜ୍ଞାତିପକ୍ଷଵିହୀନସ୍ୟ ରାଜପୁତ୍ରୀମପଶ୍ୟତଃ ॥ 13 ॥
ମନ୍ୟେ ଦୀର୍ଘା ଭଵିଷ୍ୟଂତି ରାତ୍ରୟୋ ମମ ଜାଗ୍ରତଃ ।
ଗୋଦାଵରୀଂ ଜନସ୍ଥାନମିମଂ ପ୍ରସ୍ରଵଣଂ ଗିରିମ୍ ॥ 14 ॥
ସର୍ଵାଣ୍ୟନୁଗମିଷ୍ୟାମି ୟଦି ସୀତା ହି ଦୃଶ୍ୟତେ ।
ଏତେ ମୃଗା ମହାଵୀର୍ୟ ମାମୀକ୍ଷଂତେ ମୁହୁର୍ମୁହୁଃ ॥ 15 ॥
ଵକ୍ତୁକାମା ଇଵ ହି ମେ ଇଂଗିତାନ୍ୟୁପଲକ୍ଷୟେ ।
ତାଂସ୍ତୁ ଦୃଷ୍ଟ୍ଵା ନରଵ୍ୟାଘ୍ରୋ ରାଘଵଃ ପ୍ରତ୍ୟୁଵାଚ ହ ॥ 16 ॥
କ୍ଵ ସୀତେତି ନିରୀକ୍ଷନ୍ଵୈ ବାଷ୍ପସଂରୁଦ୍ଧୟା ଦୃଶା ।
ଏଵମୁକ୍ତା ନରେଂଦ୍ରେଣ ତେ ମୃଗାସ୍ସହସୋତ୍ଥିତାଃ ॥ 17 ॥
ଦକ୍ଷିଣାଭିମୁଖାସ୍ସର୍ଵେ ଦର୍ଶୟଂତୋ ନଭସ୍ଥଲମ୍ ।
ମୈଥିଲୀ ହ୍ରିୟମାଣା ସା ଦିଶଂ ୟାମନ୍ଵପଦ୍ୟତ ॥ 18 ॥
ତେନ ମାର୍ଗେଣ ଧାଵଂତୋ ନିରୀକ୍ଷଂତେ ନରାଧିପମ୍ ।
ୟେନ ମାର୍ଗଂ ଚ ଭୂମିଂ ଚ ନିରୀକ୍ଷଂତେ ସ୍ମ ତେ ମୃଗାଃ ॥ 19 ॥
ପୁନଶ୍ଚ ମାର୍ଗମିଚ୍ଛଂତି ଲକ୍ଷ୍ମଣେନୋପଲକ୍ଷିତାଃ ।
ତେଷାଂ ଵଚନସର୍ଵସ୍ଵଂ ଲକ୍ଷୟାମାସ ଚେଂଗିତମ୍ ॥ 20 ॥
ଉଵାଚ ଲକ୍ଷ୍ମଣୋ ଜ୍ୟେଷ୍ଠଂ ଧୀମାନ୍ଭ୍ରାତରମାର୍ତଵତ୍ ।
କ୍ଵ ସିତେତି ତ୍ଵୟା ପୃଷ୍ଟା ୟଥେମେ ସହସୋତ୍ଥିତାଃ ॥ 21 ॥
ଦର୍ଶୟଂତି କ୍ଷିତିଂ ଚୈଵ ଦକ୍ଷିଣାଂ ଚ ଦିଶଂ ମୃଗାଃ ।
ସାଧୁ ଗଚ୍ଛାଵହେ ଦେଵ ଦିଶମେତାଂ ହି ନୈଋତିମ୍ ॥ 22 ॥
ୟଦି ସ୍ୟାଦାଗମଃ କଶ୍ଚିଦାର୍ୟା ଵା ସାଽଥ ଲକ୍ଷ୍ୟତେ ।
ବାଢମିତ୍ୟେଵ କାକୁତ୍ସ୍ଥଃ ପ୍ରସ୍ଥିତୋ ଦକ୍ଷିଣାଂ ଦିଶମ୍ ॥ 23 ॥
ଲକ୍ଷ୍ମଣାନୁଗତଶ୍ଶୀମନ୍ଵୀକ୍ଷମାଣୋ ଵସୁଂଧରାମ୍ ।
ଏଵଂ ସଂଭାଷମାଣୌ ତାଵନ୍ୟୋନ୍ୟଂ ଭ୍ରାତରାଵୁଭୌ ॥ 24 ॥
ଵସୁଂଧରାୟାଂ ପତିତଂ ପୁଷ୍ପମାର୍ଗମପଶ୍ୟତାମ୍ ।
ତାଂ ପୁଷ୍ପଵୃଷ୍ଟିଂ ପତିତାଂ ଦୃଷ୍ଟ୍ଵା ରାମୋ ମହୀତଲେ ॥ 25 ॥
ଉଵାଚ ଲକ୍ଷ୍ମଣଂ ଵୀରୋ ଦୁଃଖିତୋ ଦୁଃଖିତଂ ଵଚଃ ।
ଅଭିଜାନାମି ପୁଷ୍ପାଣି ତାନୀମାନୀହ ଲକ୍ଷ୍ମଣ ॥ 26 ॥
ପିନଦ୍ଧାନି ହି ଵୈଦେହ୍ୟା ମୟା ଦତ୍ତାନି କାନନେ ।
ମନ୍ୟେ ସୂର୍ୟଶ୍ଚ ଵାୟୁଶ୍ଚ ମେଦିନୀ ଚ ୟଶସ୍ଵିନୀ ॥ 27 ॥
ଅଭିରକ୍ଷଂତି ପୁଷ୍ପାଣି ପ୍ରକୁର୍ଵଂତୋ ମମ ପ୍ରିୟମ୍ ।
ଏଵମୁକ୍ତ୍ଵା ମହାବାହୁଂ ଲକ୍ଷ୍ମଣଂ ପୁରୁଷର୍ଷଭଃ ॥ 28 ॥
ଉଵାଚ ରାମୋ ଧର୍ମାତ୍ମା ଗିରିଂ ପ୍ରସ୍ରଵଣାକୁଲମ୍ ।
କଚ୍ଚିତ୍ କ୍ଷିତିଭୃତାଂ ନାଥ ଦୃଷ୍ଟା ସର୍ଵାଂଗସୁଂଦରୀ ॥ 29 ॥
ରାମା ରମ୍ୟେ ଵନୋଦ୍ଦେଶେ ମୟା ଵିରହିତା ତ୍ଵୟା ।
କ୍ରୁଦ୍ଧୋଽବ୍ରଵୀଦ୍ଗିରିଂ ତତ୍ର ସିଂହଃ କ୍ଷୁଦ୍ରମୃଗଂ ୟଥା ॥ 30 ॥
ତାଂ ହେମଵର୍ଣାଂ ହେମାଭାଂ ସୀତାଂ ଦର୍ଶୟ ପର୍ଵତ ।
ୟାଵତ୍ସାନୂନି ସର୍ଵାଣି ନ ତେ ଵିଧ୍ଵଂସୟାମ୍ୟହମ୍ ॥ 31 ॥
ଏଵମୁକ୍ତସ୍ତୁ ରାମେଣ ପର୍ଵତୋ ମୈଥିଲୀଂ ପ୍ରତି ।
ଶଂସନ୍ନିଵ ତତସ୍ସୀତାଂ ନାଦର୍ଶୟତ ରାଘଵେ ॥ 32 ॥
ତତୋ ଦାଶରଥୀ ରାମ ଉଵାଚ ଚ ଶିଲୋଚ୍ଚୟମ୍ ।
ମମ ବାଣାଗ୍ନିନିର୍ଦଗ୍ଧୋ ଭସ୍ମୀଭୂତୋ ଭଵିଷ୍ୟସି ॥ 33 ॥
ଅସେଵ୍ୟଃ ସତତଂ ଚୈଵ ନିସ୍ତୃଣଦ୍ରୁମପଲ୍ଲଵଃ ।
ଇମାଂ ଵା ସରିତଂ ଚାଦ୍ୟ ଶୋଷୟିଷ୍ୟାମି ଲକ୍ଷ୍ମଣ ॥ 34 ॥
ୟଦି ନାଖ୍ୟାତି ମେ ସୀତାମାର୍ୟାଂ ଚଂଦ୍ରନିଭାନନାମ୍ ।
ଏଵଂ ସ ରୁଷିତୋ ରାମୋ ଦିଧକ୍ଷନ୍ନିଵ ଚକ୍ଷୁଷା ॥ 35 ॥
ଦଦର୍ଶ ଭୂମୌ ନିଷ୍କ୍ରାଂତଂ ରାକ୍ଷସସ୍ୟ ପଦଂ ମହତ୍ ।
ତ୍ରସ୍ତାୟା ରାମକାଂକ୍ଷିଣ୍ୟାଃ ପ୍ରଧାଵଂତ୍ୟା ଇତସ୍ତତଃ ॥ 36 ॥
ରାକ୍ଷସେନାନୁଵୃତ୍ତାୟା ମୈଥିଲ୍ୟାଶ୍ଚ ପଦାନ୍ୟଥ ।
ସ ସମୀକ୍ଷ୍ୟ ପରିକ୍ରାଂତଂ ସୀତାୟା ରାକ୍ଷସସ୍ୟ ଚ ॥ 37 ॥
ଭଗ୍ନଂ ଧନୁଶ୍ଚ ତୂଣୀ ଚ ଵିକୀର୍ଣଂ ବହୁଧା ରଥମ୍ ।
ସଂଭ୍ରାଂତହୃଦୟୋ ରାମଶ୍ଶଶଂସ ଭ୍ରାତରଂପ୍ରିୟମ୍ ॥ 38 ॥
ପଶ୍ୟ ଲକ୍ଷ୍ମଣ ଵୈଦେହ୍ୟାଶଶୀର୍ଣାଃ କନକବିଂଦଵଃ ।
ଭୂଷଣାନାଂ ହି ସୌମିତ୍ରେ ମାଲ୍ୟାନି ଵିଵିଧାନି ଚ ॥ 39 ॥
ତପ୍ତବିଂଦୁନିକାଶୈଶ୍ଚ ଚିତ୍ରୈଃ କ୍ଷତଜବିଂଦୁଭିଃ ।
ଆଵୃତଂ ପଶ୍ୟ ସୌମିତ୍ରେ ସର୍ଵତୋ ଧରଣୀତଲମ୍ ॥ 40 ॥
ମନ୍ୟେ ଲକ୍ଷ୍ମଣ ଵୈଦେହୀ ରାକ୍ଷସୈଃ କାମରୂପିଭିଃ ।
ଭିତ୍ଵାଭିତ୍ଵା ଵିଭକ୍ତା ଵା ଭକ୍ଷିତା ଵା ଭଵିଷ୍ୟତି ॥ 41 ॥
ତସ୍ୟା ନିମିତ୍ତଂ ଵୈଦେହ୍ୟା ଦ୍ଵୟୋର୍ଵିଵଦମାନୟୋଃ ।
ବଭୂଵ ୟୁଦ୍ଧଂ ସୌମିତ୍ରେ ଘୋରଂ ରାକ୍ଷସୟୋରିହ ॥ 42 ॥
ମୁକ୍ତାମଣିମୟଂ ଚେଦଂ ତପନୀୟଵିଭୂଷିତମ୍ ।
ଧରଣ୍ୟାଂ ପତିତଂ ସୌମ୍ୟ କସ୍ୟ ଭଗ୍ନଂ ମହଦ୍ଧନୁଃ ॥ 43 ॥
ତରୁଣାଦିତ୍ୟସଂକାଶଂ ଵୈଡୂର୍ୟଗୁଲିକାଚିତମ୍ ।
ଵିଶୀର୍ଣଂ ପତିତଂ ଭୂମୌ କଵଚଂ କସ୍ୟ କାଂଚନମ୍ ॥ 44 ॥
ଛତ୍ରଂ ଶତଶଲାକଂ ଚ ଦିଵ୍ୟମାଲ୍ୟୋପଶୋଭିତମ୍ ।
ଭଗ୍ନଦଂଡମିଦଂ କସ୍ୟ ଭୂମୌ ସମ୍ୟଙ୍ନିପାତିତମ୍ ॥ 45 ॥
କାଂଚନୋରଶ୍ଛଦା ଶ୍ଚେମେ ପିଶାଚଵଦନାଃ ଖରାଃ ।
ଭୀମରୂପା ମହାକାୟାଃ କସ୍ୟ ଵା ନିହତା ରଣେ ॥ 46 ॥
ଦୀପ୍ତପାଵକସଂକାଶୋ ଦ୍ୟୁତିମାନ୍ସମରଧ୍ଵଜଃ ।
ଅପଵିଦ୍ଧଶ୍ଚ ଭଗ୍ନଶ୍ଚ କସ୍ୟ ସାଂଗ୍ରାମିକୋ ରଥଃ ॥ 47 ॥
ରଥାକ୍ଷମାତ୍ରା ଵିଶିଖାସ୍ତପନୀୟଵିଭୂଷଣାଃ ।
କସ୍ୟେମେଽଭିହତା ବାଣାଃ ପ୍ରକୀର୍ଣା ଘୋରକର୍ମଣଃ ॥ 48 ॥
ଶରାଵରୌ ଶରୈଃ ପୂର୍ଣୌ ଵିଧ୍ଵସ୍ତୌ ପଶ୍ୟ ଲକ୍ଷ୍ମଣ ।
ପ୍ରତୋଦାଭୀଶୁହସ୍ତୋ ଵୈ କସ୍ୟାୟଂ ସାରଥିର୍ହତଃ ॥ 49 ॥
କସ୍ୟେମୌ ପୁରୁଷଵ୍ୟାଘ୍ର ଶୟାତେ ନିହତୌ ୟୁଧି ।
ଚାମରଗ୍ରାହିଣୌ ସୌମ୍ୟ ସୋଷ୍ଣୀଷମଣିକୁଂଡଲୌ ॥ 50 ॥
ପଦଵୀପୁରୁଷସ୍ୟୈଷା ଵ୍ୟକ୍ତଂ କସ୍ୟାପି ରକ୍ଷସଃ ।
ଵୈରଂ ଶତଗୁଣଂ ପଶ୍ୟ ମମେଦଂ ଜୀଵିତାଂତକମ୍ ॥ 51 ॥
ସୁଘୋରହୃଦୟୈସ୍ସୌମ୍ୟ ରାକ୍ଷସୈଃ କାମରୂପିଭିଃ ।
ହୃତା ମୃତା ଵା ସୀତା ସା ଭକ୍ଷିତା ଵା ତପସ୍ଵିନୀ ॥ 52 ॥
ନଧର୍ମସ୍ତ୍ରାୟତେ ସୀତାଂ ହ୍ରିୟମାଣାଂ ମହାଵନେ ।
ଭକ୍ଷିତାୟାଂ ହି ଵୈଦେହ୍ୟାଂ ହୃତାୟାମପି ଲକ୍ଷ୍ମଣ ॥ 53 ॥
କେ ହି ଲୋକେ ପ୍ରିୟଂ କର୍ତୁଂ ଶକ୍ତାସ୍ସୌମ୍ୟ ମମେଶ୍ଵରାଃ ।
କର୍ତାରମପି ଲୋକାନାଂ ଶୂରଂ କରୁଣଵେଦିନମ୍ ॥ 54 ॥
ଅଜ୍ଞାନାଦଵମନ୍ୟେରତ୍ସର୍ଵଭୂତାନି ଲକ୍ଷ୍ମଣ ।
ମୃଦୁଂ ଲୋକହିତେ ୟୁକ୍ତଂ ଦାଂତଂ କରୁଣଵେଦିନମ୍ ॥ 55 ॥
ନିର୍ଵୀର୍ୟ ଇତି ମନ୍ୟଂତେ ନୂନଂ ମାଂ ତ୍ରିଦଶେଶ୍ଵରାଃ ।
ମାଂ ପ୍ରାପ୍ୟ ହି ଗୁଣୋ ଦୋଷସ୍ସଂଵୃତ୍ତଃ ପଶ୍ୟ ଲକ୍ଷ୍ମଣ ॥ 56 ॥
ଅଦ୍ୟୈଵ ସର୍ଵଭୂତାନାଂ ରକ୍ଷସାମଭଵାୟ ଚ ।
ସଂହୃତ୍ୟୈଵ ଶଶିଜ୍ୟୋତ୍ସ୍ନାଂ ମହାନ୍ସୂର୍ୟ ଇଵୋଦିତଃ ॥ 57 ॥
ସଂହୃତ୍ୟୈଵ ଗୁଣାନ୍ସର୍ଵାନ୍ମମ ତେଜଃ ପ୍ରକାଶତେ ।
ନୈଵ ୟକ୍ଷା ନ ଗଂଧର୍ଵା ନ ପିଶାଚା ନ ରାକ୍ଷସାଃ ॥ 58 ॥
କିନ୍ନରା ଵା ମନୁଷ୍ୟା ଵା ସୁଖଂ ପ୍ରାପ୍ସ୍ୟଂତି ଲିକ୍ଷ୍ମଣ ।
ମମାସ୍ତ୍ରବାଣସଂପୂର୍ଣମାକାଶଂ ପଶ୍ୟ ଲକ୍ଷ୍ମଣ ॥ 59 ॥
ନିସ୍ସଂପାତଂ କରିଷ୍ୟାମି ହ୍ୟଦ୍ୟ ତ୍ରୈଲୋକ୍ୟଚାରିଣାମ୍ ।
ସନ୍ନିରୁଦ୍ଧଗ୍ରହଗଣମାଵାରିତନିଶାକରମ୍ ॥ 60 ॥
ଵିପ୍ରଣଷ୍ଟାନଲମରୁଦ୍ଭାସ୍କରଦ୍ୟୁତିସଂଵୃତମ୍ ।
ଵିନିର୍ମଥିତଶୈଲାଗ୍ରଂ ଶୁଷ୍ୟମାଣଜଲାଶୟମ୍ ॥ 61 ॥
ଧ୍ଵସ୍ତଦ୍ରୁମଲତାଗୁଲ୍ମଂ ଵିପ୍ରଣାଶିତସାଗରମ୍ ।
ତ୍ରୈଲୋକ୍ୟଂ ତୁ କରିଷ୍ୟାମି ସଂୟୁକ୍ତଂ କାଲକର୍ମଣା ॥ 62 ॥
ନ ତାଂ କୁଶଲିନୀଂ ସୀତାଂ ପ୍ରଦାସ୍ୟଂତି ମମେଶ୍ଵରାଃ ।
ଅସ୍ମିନ୍ମୁହୂର୍ତେ ସୌମିତ୍ରେ ମମ ଦ୍ରକ୍ଷ୍ୟଂତି ଵିକ୍ରମମ୍ ॥ 63 ॥
ନାକାଶମୁତ୍ପତିଷ୍ୟଂତି ସର୍ଵଭୂତାନି ଲକ୍ଷ୍ମଣ ।
ମମ ଚାପଗୁଣୋନ୍ମୁକ୍ତୈର୍ବାଣଜାଲୈର୍ନିରଂତରମ୍ ॥ 64 ॥
ଅର୍ଦିତଂ ମମ ନାରାଚୈର୍ଧ୍ଵସ୍ତଭ୍ରାଂତମୃଗଦ୍ଵିଜମ୍ ।
ସମାକୁଲମମର୍ୟାଦଂ ଜଗତ୍ପଶ୍ୟାଦ୍ୟ ଲକ୍ଷ୍ମଣ ॥ 65 ॥
ଆକର୍ଣପୂର୍ଣୈରିଷୁଭିର୍ଜୀଵଲୋକଂ ଦୁରାଵରୈଃ ।
କରିଷ୍ୟେ ମୈଥିଲୀହେତୋରପିଶାଚମରାକ୍ଷସମ୍ ॥ 66 ॥
ମମ ରୋଷପ୍ରୟୁକ୍ତାନାଂ ସାୟକାନାଂ ବଲଂ ସୁରାଃ ।
ଦ୍ରକ୍ଷ୍ୟଂତ୍ୟଦ୍ୟ ଵିମୁକ୍ତାନାମତିଦୂରାତିଗାମିନାମ୍ ॥ 67 ॥
ନୈଵ ଦେଵା ନ ଦୈତେୟା ନ ପିଶାଚା ନ ରାକ୍ଷସାଃ ।
ଭଵିଷ୍ୟଂତି ମମ କ୍ରୋଧାତ୍ତ୍ରୈଲୋକ୍ୟେ ଵିପ୍ରଣାଶିତେ ॥ 68 ॥
ଦେଵଦାନଵୟକ୍ଷାଣାଂ ଲୋକା ୟେ ରକ୍ଷସାମପି ।
ବହୁଧା ନ ଭଵିଷ୍ୟଂତି ବାଣୌଘୈଶ୍ଶକଲୀକୃତାଃ ॥ 69 ॥
ନିର୍ମର୍ୟାଦାନିମାନ୍ଲୋକାନ୍କରିଷ୍ୟାମ୍ୟଦ୍ୟ ସାୟକୈଃ ।
ହୃତାଂ ମୃତାଂ ଵା ସୌମିତ୍ରେ ନ ଦାସ୍ୟଂତି ମମେଶ୍ଵରାଃ ॥ 70 ॥
ତଥାରୁପାଂ ହି ଵୈଦେହୀଂ ନ ଦାସ୍ୟଂତି ୟଦି ପ୍ରିୟାମ୍ ।
ନାଶୟାମି ଜଗତ୍ସର୍ଵଂ ତ୍ରୈଲୋକ୍ୟଂ ସଚରାଚରମ୍ ॥ 71 ॥
ଇତ୍ୟୁକ୍ତ୍ଵା ରୋଷତାମ୍ରାକ୍ଷୋ ରାମୋ ନିଷ୍ପୀଡ୍ୟ କାର୍ମୁକମ୍ ।
ଶରମାଦାୟ ସଂଦୀପ୍ତଂ ଘୋରମାଶୀଵିଷୋପମମ୍ ॥ 72 ॥
ସଂଧାୟ ଧନୁଷି ଶ୍ରୀମାନ୍ରାମଃ ପରପୁରଂଜୟଃ ।
ୟୁଗାଂତାଗ୍ନିରିଵ କ୍ରୁଦ୍ଧ ଇଦଂ ଵଚନମବ୍ରଵୀତ୍ ॥ 73 ॥
ୟଥା ଜରା ୟଥା ମୃତ୍ୟୁର୍ୟଥା କାଲୋ ୟଥା ଵିଧିଃ ।
ନିତ୍ୟଂ ନ ପ୍ରତିହନ୍ୟଂତେ ସର୍ଵଭୂତେଷୁ ଲକ୍ଷ୍ମଣ ॥ 74 ॥
ତଥାହଂ କ୍ରୋଧସଂୟୁକ୍ତୋ ନ ନିଵାର୍ୟୋଽସ୍ମି ସର୍ଵଥା ।
ପୁରେଵ ମେ ଚାରୁଦଂତୀମନିଂଦିତାଂ ଦିଶଂତି ସୀତାଂ ୟଦି ନାଦ୍ୟ ମୈଥିଲୀମ୍ ।
ସଦେଵଗଂଧର୍ଵମନୁଷ୍ୟପନ୍ନଗଂ ଜଗତ୍ସଶୈଲଂ ପରିଵର୍ତୟାମ୍ୟହମ୍ ॥ 75 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଚତୁଃଷଷ୍ଟିତମସ୍ସର୍ଗଃ ॥
