ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ପଂଚମସ୍ସର୍ଗଃ ।
ସାତୁନୀଲେନଵିଧିଵତ୍ସ୍ଵାରକ୍ଷାସୁସମାହିତା ।
ସାଗରସ୍ୟୋତ୍ତରେତୀରେସାଧୁସେନାନିଵେଶିତା ॥ 1 ॥
ମୈଂଦଶ୍ଚଦ୍ଵିଵିଦଶ୍ଚୋଭୌତତ୍ରଵାନରପୁଂଗଵୌ ।
ଵିଚେରତୁଶ୍ଚତାଂସେନାଂରକ୍ଷାର୍ଥଂସର୍ଵତୋଦିଶମ୍ ॥ 2 ॥
ନିଵିଷ୍ଟାୟାଂତୁସେନାୟାଂତୀରେନଦନଦୀପତେଃ ।
ପାର୍ଶ୍ଵସ୍ଥଂଲକ୍ଷ୍ମଣଂଦୃଷ୍ଟଵାରାମୋଵଚନମବ୍ରଵୀତ୍ ॥ 3 ॥
ଶୋକଶ୍ଚକିଲକାଲେନଗଚ୍ଛତାହ୍ୟପଗଚ୍ଛତି ।
ମମଚାପଶ୍ୟତଃକାଂତାମହନ୍ୟହନିଵର୍ଧତେ ॥ 4 ॥
ନମେଦୁଃଖଂପ୍ରିୟାଦୂରେନମେଦୁଃଖଂହୃତେତିଵା ।
ଏତଦେଵାନୁଶୋଚାମିଵୟୋସ୍ୟାହ୍ୟତିଵର୍ତତେ ॥ 5 ॥
ଵାହିଵାତୟତଃକାଂତାତାଂସ୍ପୃଷ୍ଟଵାମାମପିସ୍ପୃଶ ।
ତ୍ଵୟିମେଗାତ୍ରସଂସ୍ପର୍ଶଶ୍ଚଂଦ୍ରେଦୃଷ୍ଟିସମାଗମଃ ॥ 6 ॥
ତନ୍ମେଦହତିଗାତ୍ରାଣିଵିଷଂପୀତମିଵାଶୟେ ।
ହାନାଥେତିପ୍ରିୟାସାମାଂହ୍ରିୟମାଣାୟଦବ୍ରଵୀତ୍ ॥ 7 ॥
ତଦ୍ଵିୟୋଗେଂଧନଵତାତଚ୍ଚିଂତାଵିପୁଲାର୍ଚିଷା ।
ରାତ୍ରିଂଦିଵଂଶରୀରଂମେଦହ୍ୟତେମଦନାଗ୍ନିନା ॥ 8 ॥
ଅଵଗାହ୍ୟର୍ଣଵଂସ୍ଵପ୍ସ୍ୟେସୌମିତ୍ରେଭଵତାଵିନା ।
କଥଂଚିତ୍ପ୍ରଜ୍ଵଲନ୍କାମସ୍ସମାଂସୁପ୍ତଂଜଲେଦହେତ୍ ॥ 9 ॥
ବହ୍ଵେତତ୍କାମୟାନସ୍ୟଶକ୍ୟମେତେନଜୀଵିତୁମ୍ ।
ୟଦହଂସାଚଵାମୋରୂରେକାଂଧରଣିମାଶ୍ରିତୌ ॥ 10 ॥
କେଦାରସ୍ୟେଵକେଦାରସ୍ସୋଦକସ୍ୟନିରୂଦକଃ ।
ଉପସ୍ନେହେନଜୀଵାମିଜୀଵଂତୀଂୟଚ୍ଛୃଣୋମିତାମ୍ ॥ 11 ॥
କଦାନୁଖଲୁସୁଶ୍ରୋଣୀଂଶତପତ୍ତ୍ରାୟତେକ୍ଷଣାମ୍ ।
ଵିଜିତ୍ୟଶତ୍ରୂଂଦ୍ରକ୍ଷ୍ୟାମିସୀତାସ୍ଫୀତାମିଵଶ୍ରିୟମ୍ ॥ 12 ॥
କଦାନୁଚାରୁବିଂବୋଷ୍ଠଂତସ୍ୟାଃପଦ୍ମମିଵାନନମ୍ ।
ଈଷଦୁନ୍ନମ୍ୟପାସ୍ୟାମିରସାୟନମିଵାତୁରଃ ॥ 13 ॥
ତସ୍ୟାତ୍ତୁସଂହିତୌପୀନୌସ୍ତନୌତାଲଫଲୋପମୌ ।
କଦାନୁଖଲୁସୋତ୍କଂପୌଶ୍ଲିଷ୍ୟଂତ୍ୟାମାଂଭଜିଷ୍ୟତଃ ॥ 14 ॥
ସାନୂନମସିତାପାଂଗୀରକ୍ଷୋମଧ୍ୟଗତାସତୀ ।
ମନ୍ନାଥାନାଥହୀନେଵତ୍ରାତାରଂନାଧିଗଚ୍ଛତି ॥ 15 ॥
କଥଂଜନକରଜସ୍ୟଦୁହିତାମମଚପ୍ରିୟା ।
ରାକ୍ଷସୀମଧ୍ୟଗାଶେତେସ୍ନୁଷାଦଶରଥସ୍ୟଚ ॥ 16 ॥
କଦାଽଵିକ୍ଷୋଭ୍ୟରକ୍ଷାଂସିସାଵିଧୂୟୋତ୍ପତିଷ୍ୟତି ।
ଵିଧୂୟଜଲଦାନ୍ନୀଲାନ୍ ଶଶିରେଖାଶରତ୍ସ୍ଵିଵ ॥ 17 ॥
ସ୍ଵଭାଵତନୁକାନୂନଂଶୋକେନାନଶନେନଚ ।
ଭୂୟସ୍ତନୁତରାସୀତାଦେଶକାଲଵିପର୍ୟୟାତ୍ ॥ 18 ॥
କଦାନୁରାକ୍ଷସେଂଦ୍ରସ୍ୟନିଧାୟୋରସିସାୟକାନ୍ ।
ସୀତାଂପ୍ରତ୍ୟାହରିଷ୍ୟାମିଶୋକମୁତ୍ସୃଜ୍ୟମାନସମ୍ ॥ 19 ॥
କଦାନୁଖଲୁମାଂସାଧ୍ଵୀସୀତାସୁରସୁତୋପମା ।
ସୋତ୍କଂଠାକଂଠମାଲଂବ୍ୟମୋକ୍ଷ୍ୟତ୍ୟାନଂଦଜଂଜଲମ୍ ॥ 20 ॥
କଦାଶୋକମିମଂଘୋରଂମୈଥିଲୀଵିପ୍ରୟୋଗଜମ୍ ।
ସହସାଵିପ୍ରମୋକ୍ଷ୍ୟାମିଵାସଶ୍ଶୁକ୍ଲେତରଂୟଥା ॥ 21 ॥
ଏଵଂଵିଲପତସ୍ତସ୍ୟତତ୍ରରାମସ୍ୟଧୀମତଃ ।
ଦିନକ୍ଷୟାନ୍ମଂଦଵପୁର୍ଭାସ୍କରୋଽସ୍ତମୁପାଗତଃ ॥ 22 ॥
ଆଶ୍ଵାସିତୋଲକ୍ଷ୍ମଣେନରାମସ୍ସଂଧ୍ୟାମୁପାସତ ।
ସ୍ମରନ୍କମଲପତ୍ରାକ୍ଷୀଂସୀତାଂଶୋକାକୁଲୀକୃତଃ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ପଂଚମସ୍ସର୍ଗଃ ॥
