ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ଷଡଧିକଶତତମସ୍ସର୍ଗଃ ।
ସତୁମୋହାତ୍ସୁସଂକ୍ରୁଦ୍ଧଃକୃତାଂତବଲଚୋଦିତଃ ।
କ୍ରୋଧସଂରକ୍ତନୟନୋରାଵଣଂସୂତମବ୍ରଵୀତ୍ ॥ 1 ॥
ହୀନଵୀର୍ୟମିଵାଶକ୍ତଂପୌରୁଷେଣଵିଵର୍ଜିତମ୍ ।
ଭୀରୁଂଲଘୁମିଵାସତ୍ତ୍ଵଂଵିହୀନମିଵତେଜସା ॥ 2 ॥
ଵିମୁକ୍ତମିଵମାୟାଭିରସ୍ତ୍ରୈରିଵବହିଷ୍କୃତମ୍ ।
ମାମଵଜ୍ଞାୟଦୁର୍ବୁଦ୍ଧେସ୍ଵୟାବୁଦ୍ଧ୍ୟାଵିଚେଷ୍ଟସେ ॥ 3 ॥
କିମର୍ଥଂମାମଵଜ୍ଞାୟମଚ୍ଛଂଦମନଵେକ୍ଷ୍ୟ ଚ ।
ତ୍ଵୟାଶତ୍ରୁସମକ୍ଷଂମେରଥୋଽୟମପଵାହିତଃ ॥ 4 ॥
ତ୍ଵୟାଦ୍ୟହିମମାନାର୍ୟ ଚିରକାଲସମାର୍ଜିତମ୍ ।
ୟଶୋଵୀର୍ୟଂ ଚ ତେଜଶ୍ଚପ୍ରତ୍ୟୟଶ୍ଚଵିନାଶିତଃ ॥ 5 ॥
ପ୍ରଖ୍ୟାତଵୀର୍ୟସ୍ୟରଂଜନୀୟସ୍ୟଵିକ୍ରମୈଃ ।
ପଶ୍ୟତୋୟୁଦ୍ଧଲୁବ୍ଧୋଽହଂକୃତଂକାପୁରୁଷସ୍ତ୍ଵୟା ॥ 6 ॥
ୟସ୍ତ୍ଵଂରଥମିଦଂମୋହାନ୍ନଚେଦ୍ଵହସିଦୁର୍ମତେ ।
ସତ୍ୟୋଽପ୍ରତିତର୍କୋମେପରେଣତ୍ଵମୁପସ୍କୃତଃ ॥ 7 ॥
ନ ହିତଦ୍ଵିଦ୍ୟତେକର୍ମସୁହୃଦୋହିତକାଂକ୍ଷିଣଃ ।
ରିପୂଣାଂସଦୃଶଂତ୍ଵେତଦ୍ୟତତ୍ତ୍ଵୟୈତଦନୁଷ୍ଠିତମ୍ ॥ 8 ॥
ନିଵର୍ତୟରଥଂଶୀଘ୍ରଂୟାଵନ୍ନାପୈତିମେରିପୁଃ ।
ୟଦିଵାଧ୍ୟୁଷିତୋଽସିତ୍ଵଂସ୍ମର୍ୟତେୟଦିମେଗୁଣଃ ॥ 9 ॥
ଏଵଂପୁରୁଷମୁକ୍ତସ୍ତୁହିତବୁଦ୍ଧିବୁଦ୍ଧିନା ।
ଅବ୍ରଵୀଦ୍ରାଵଣଂସୂତୋହିତଂସାନୁନୟଂଵଚଃ ॥ 10 ॥
ନ ଭୀତୋଽସ୍ମି ନ ମୂଢୋଽସ୍ମିନୋପଜପ୍ତୋଽସ୍ମିଶତ୍ରୁଭିଃ ।
ନ ପ୍ରମତ୍ତୋ ନ ନିଃସ୍ନେହୋଵିସ୍ମୃତା ନ ଚ ସତ୍କ୍ରିୟା ॥ 11 ॥
ମୟାତୁହିତକାମେଵୟଶଶ୍ଚପରିରକ୍ଷତା ।
ସ୍ନେହପ୍ରସନ୍ନମନସାହିତମିତ୍ୟପ୍ରିୟଂକୃତମ୍ ॥ 12 ॥
ନାସ୍ମିନ୍ନର୍ଥେମହାରାଜ ତ୍ଵଂମାଂପ୍ରିୟହିତେରତମ୍ ।
କଶ୍ଚିଲ୍ଲଘୁରିଵାନାର୍ୟୋଦୋଷତୋଗଂତୁମର୍ହସି ॥ 13 ॥
ପରିତୁଷ୍ଟଃ ସ ରାମସ୍ୟ ତେନ ଵାକ୍ୟେନ ମାତଲିଃ ।
ପ୍ରଚୋଦୟାମାସ ରଥନ୍ ସୁରସାରଥିସତ୍ତମଃ ॥ 14 ॥
ଶ୍ରମଂତଵାଵଗଚ୍ଛାମିମହତାରଣକର୍ମଣା ।
ନ ହିତେଵୀର୍ୟସୌମୁଖ୍ୟଂପ୍ରକର୍ଷଂଵୋପଧାରୟେ ॥ 15 ॥
ରଥୋଦ୍ଵହନଖିନ୍ନାଶ୍ଚଭଗ୍ନାମେରଥଵାଜିନଃ ।
ଦୀନାଘର୍ମପରିଶ୍ରାଂତାଗାଵୋଵର୍ଷହତାଇଵ ॥ 16 ॥
ନିମିତ୍ତାନି ଚ ଭୂୟିଷ୍ଠଂୟାନିପ୍ରାଦୁର୍ଭଵଂତିନଃ ।
ତେଷୁତେଷ୍ଵଭିପନ୍ନେଷୁଲକ୍ଷ୍ୟାମ୍ୟପ୍ରଦକ୍ଷିଣମ୍ ॥ 17 ॥
ଦେଶକାଲୌ ଚ ଵିଜ୍ଞେୟୌଲକ୍ଷଣାନୀଂଗିତାନି ଚ ।
ଦୈନ୍ୟଂହର୍ଷଶ୍ଚଖେଦଶ୍ଚରଥିନଶ୍ଚବଲାବଲମ୍ ॥ 18 ॥
ସ୍ଥଲନିମ୍ନାନିଭୂମେଶ୍ଚସମାନିଵିଷମାଣି ଚ ।
ୟୁଦ୍ଧକାଲଶ୍ଚଵିଜ୍ଞେୟଃପରସ୍ୟାଂତରଦର୍ଶନମ୍ ॥ 19 ॥
ଉପୟାନାପୟାନେ ଚ ସ୍ଥାନଂପ୍ରତ୍ୟପସର୍ପଣମ୍ ।
ସର୍ଵମେତଦ୍ରଥସ୍ଥେନଜ୍ଞେୟଂରଥକୁଟୁଂଭିନା ॥ 20 ॥
ତଵଵିଶ୍ରାମହେତୋସ୍ତୁତଥୈଷାଂରଥଵାଜିନାମ୍ ।
ରୌଦ୍ରଂଵର୍ଜୟତାଖେଦଂକ୍ଷମଂକୃତମିଦଂମୟା ॥ 21 ॥
ସ୍ଵେଚ୍ଛୟାନ ମୟାଵୀରରଥୋଽୟମପଵାହିତଃ ।
ଭର୍ତୃସ୍ନେହପରୀତେନମୟେଦଂୟତ୍କୃତଂପ୍ରଭୋ ॥ 22 ॥
ଆଜ୍ଞାପୟୟଥାତତ୍ତ୍ଵଂଵକ୍ଷ୍ୟସ୍ୟରିନିଷୂଦନ ।
ତତ୍କରିଷ୍ୟାମ୍ୟହଂଵୀରଗତାନୃଣ୍ୟେନଚେତସା ॥ 23 ॥
ସଂତୁଷ୍ଟସ୍ତେନଵାକ୍ୟେନରାଵଣସ୍ତସ୍ୟସାରଥେଃ ।
ପ୍ରଶସ୍ୟୈନଂବହୁଵିଧଂୟୁଦ୍ଧଲୁବ୍ଧୋଽବ୍ରଵୀଦିଦମ୍ ॥ 24 ॥
ରଥଂଶୀଘ୍ରମିଦଂସୂତରାଘଵାଭିମୁଖଂନୟ ।
ନାହତ୍ଵାସମରେଶତ୍ରୂନ୍ନିଵର୍ତିଷ୍ୟତିରାଵଣଃ ॥ 25 ॥
ଏଵମୁକ୍ତ୍ଵାତତସ୍ତୁଷ୍ଟୋରାଵଣୋରାକ୍ଷସେଶ୍ଵରଃ ।
ଦଦୌତସ୍ୟଶୁଭଂହ୍ୟେକଂହସ୍ତାଭରଣମୁତ୍ତମମ୍ ॥ 26 ॥
ଶ୍ରୁତ୍ଵାରାଵଣଵାକ୍ୟାନିସାରଥିସ୍ସନ୍ୟଵର୍ତତ ।
ତତୋଦ୍ରୁତଂରାଵଣଵାକ୍ୟଚୋଦିତଃପ୍ରଚୋଦୟାମାସହୟାନ୍ସସାରଥିଃ ।
ସ ରାକ୍ଷସେଂଦ୍ରସ୍ୟ ତତୋ ମହାରଥଃକ୍ଷଣେନରାମସ୍ୟରଥାଗ୍ରତୋଽଭଵତ୍ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ଷଡଧିକଶତତମସ୍ସର୍ଗଃ ॥
