ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ଚତୁଶ୍ଚତ୍ଵାରିଂଶସ୍ସର୍ଗଃ ।
ୟୁଧ୍ୟତାମେନତେଷାଂତୁତଦାଵାନରରାକ୍ଷସାମ୍ ।
ରଵିରସ୍ତଂଗତୋରାତ୍ରିଃପ୍ରଵୃତ୍ତାପ୍ରାଣହାରିଣୀ ॥ 1 ॥
ଅନ୍ୟୋନ୍ୟଂବଦ୍ଧଵୈରାଣାଂଘୋରାଣାଂଜୟମିଚ୍ଛତାମ୍ ।
ସଂପ୍ରଵୃତ୍ତଂନିଶାୟୁଦ୍ଧଂତଦାଵାନରରକ୍ଷସାମ୍ ॥ 2 ॥
ରାକ୍ଷସୋଽସୀତିହରୟୋହରିଶ୍ଚାଽସୀତିରାକ୍ଷସାଃ ।
ଅନ୍ୟୋନ୍ୟଂସମରେଜଘ୍ନୁସ୍ତସ୍ମିଂସ୍ତମସିଦାରୁଣେ ॥ 3 ॥
ଜହିଦାରୟଚୈହୀତିକଥଂଵିଦ୍ରଵସୀତିଚ ।
ଏଵଂସୁତୁମୁଲଶ୍ଶବ୍ଦସ୍ତସ୍ମିଂସ୍ତମସିଶୁଶ୍ରୁଵେ ॥ 4 ॥
କାଲାଃକାଂଚନସନ୍ନାହାସ୍ତସ୍ମିଂସ୍ତମସିରାକ୍ଷସାଃ ।
ସଂପ୍ରଦୃଶ୍ୟଂତଶୈଲେଂଦ୍ରାଦୀପ୍ତୌଷଧିଵନାଇଵ ॥ 5 ॥
ତସ୍ମିଂସ୍ତମସିଦୁଷ୍ପାରେରାକ୍ଷସାଃକ୍ରୋଧମୂର୍ଛିତାଃ ।
ପରିପେତୁର୍ମହାଵେଗାଭକ୍ଷୟଂତଃପ୍ଲଵଂଗମାନ୍ ॥ 6 ॥
ତେହୟାନ୍ କାଂଚନାପୀଡାନ୍ ଧ୍ଵଜାଂଶ୍ଚାଶୀଵିଷୋପମାନ୍ ।
ଆପ୍ଲୁତ୍ୟଦଶନୈସ୍ତୀକ୍ଷ୍ଣୈର୍ଭୀମକୋପାଵ୍ୟଦାରୟନ୍ ॥ 7 ॥
ଵାନରାବଲିନୋୟୁଦ୍ଧେଽକ୍ଷୋଭୟନ୍ ରାକ୍ଷସୀଂଚମୂମ୍ ।
କୁଂଜରାନ୍ କୁଂଜରାରୋହାନ୍ ପତାକାଧ୍ଵଜିନୋରଥାନ୍ ॥ 8 ॥
କର୍ଷୁଶ୍ଚଦଦଂଶୁଶ୍ଚଦଶନୈଃକ୍ରୋଧମୂର୍ଛିତାଃ ।
ଲକ୍ଷ୍ମଣଶ୍ଚାପିରାମଶ୍ଚଶରୈରାଶୀଵିଷୋପମୈଃ ॥ 9 ॥
ଦୃଶ୍ୟାଦୃଶ୍ୟାନିରକ୍ଷାଂସିପ୍ରଵରାଣିନିଜଘ୍ନତୁଃ ।
ତୁରଂଗଖୁରଵିଧ୍ଵସ୍ତଂରଥନେମିସମୁତ୍ଥିତମ୍ ॥ 10 ॥
ରୁରୋଧକର୍ଣନେତ୍ରାଣିୟୁଧ୍ୟତାଂଧରଣୀରଜଃ ।
ଵର୍ତମାନେତଥାଘୋରେସଂଗ୍ରାମେରୋମହର୍ଷଣେ ॥ 11 ॥
ରୁଧିରୋଧାମହାଘୋରାନଦ୍ୟସ୍ତତ୍ରପ୍ରସୁସ୍ରୁଵୁଃ ।
ତତୋଭେରୀମୃଦଂଗାନାଂପଣଵାନାଂଚନିସ୍ସ୍ଵନଃ ॥ 12 ॥
ଶଂଖଵେଣୁସ୍ଵନୋନ୍ମିଶ୍ରସ୍ସଂଭୂଵାଦ୍ଭୁତୋପମଃ ।
ହତାନାଂସ୍ତନମାନାନାଂରାକ୍ଷସାନାଂଚନିଃସ୍ଵନଃ ॥ 13 ॥
ଶସ୍ତାନାଂଵାନରାଣାଂଚସଂବଭୂଵାତିଦାରୁଣଃ ।
ହତୈର୍ଵାନରଵୀରୈଶ୍ଚଶକ୍ତିଶୂଲପରଶ୍ଵଧୈଃ ॥ 14 ॥
ନିହତୈଃପର୍ଵତାକାରୈରାକ୍ଷସୈଃକାମରୂପିଭିଃ ।
ଶସ୍ତ୍ରପୁଷ୍ପୋପହାରାଚତତ୍ରାସୀଦ୍ୟୁଦ୍ଧମେଦିନୀ ॥ 15 ॥
ଦୁର୍ ଜ୍ଞେୟାଦୁର୍ନିଵେଶାଚଶୋଣିତାସ୍ରାଵକର୍ଦମା ।
ସାବଭୂଵନିଶାଘୋରାହରିରାକ୍ଷସହାରିଣୀ ॥ 16 ॥
କାଲରାତ୍ରୀଵଭୂତାନାଂସର୍ଵେଷାଂଦୁରତିକ୍ରମା ।
ତତସ୍ତେରାକ୍ଷସାସ୍ତତ୍ରତସ୍ମିଂସ୍ତମସିଦାରୁଣେ ॥ 17 ॥
ରାମମେଵାଭ୍ୟଵର୍ତଂତସମ୍ହୃଷ୍ଟାଶ୍ଶରଵୃଷ୍ଟିଭିଃ ।
ତେଷାମାପତତାଂଶବ୍ଦଃକ୍ରୁଦ୍ଧାନାମପିଗର୍ଜତାମ୍ ॥ 18 ॥
ଉଦ୍ଵର୍ତ;ଇଵ ସପ୍ତାନାଂ ସମୁଦ୍ରାଣାଂ ଅଭୂତ୍ ସ୍ଵନଃ ।
ତେଷାଂ ରାମହ୍ ଶାରୈହ୍ ଷଡ୍ଭିହ୍ ଷଡ୍ ଜଘାନ ନିଶାଅ ଚରାନ୍ ॥ 19 ॥
ନିମେଷାଂତରମାତ୍ରେଣଶିତୈରଗ୍ନିଶିଖୋପମୈଃ ।
ୟମଶତ୍ରୁଶ୍ଚଦୁର୍ଧର୍ଷୋମହାପାର୍ଶ୍ଵମହୋଦରୌ ॥ 20 ॥
ଵଜ୍ରଦଂଷ୍ଟ୍ରୋମହାକାୟସ୍ତୌଚୋଭୌଶୁକସାରଣୌ ।
ତେତୁରାମେଣବାଣୌଘୈସ୍ସର୍ଵେମର୍ମସୁତାଡିତାଃ ॥ 21 ॥
ୟୁଦ୍ଧାଦପସୃତାସ୍ତତ୍ରସାଵଶେଷାୟୁଷୋଽଭଵନ୍ ।
ତତ୍ରକାଂଚନଚିତ୍ରାଂଗୈଶ୍ଶରୈରଗ୍ନିଶିଖୋପମୈଃ ॥ 22 ॥
ଦିଶଶ୍ଚକାରଵିମଲାଃପ୍ରଦିଶଶ୍ଚମହାରଥଃ ।
ୟେତ୍ଵନ୍ୟେରାକ୍ଷସାଭୀମାରାମସ୍ୟାଭିମୁଖେସ୍ଥିତାଃ ॥ 23 ॥
ତେଽପିନଷ୍ଟାଃସମାସାଦ୍ୟପତଂଗାଇଵପାଵକମ୍ ।
ସୁଵର୍ଣପୁଂଖୈର୍ଵିଶିଖୈସ୍ସପତଦ୍ଭିସ୍ସହସ୍ରଶଃ ॥ 24 ॥
ବଭୂଵରଜନୀଚିତ୍ରାଖଦ୍ୟୋତୈରିଵଶାରଦୀ ।
ରାକ୍ଷସାନାଂଚନିନଦୈର୍ହରୀଣାଂଚାପିନିସ୍ସ୍ଵନୈଃ ॥ 25 ॥
ସାବଭୂଵନିଶାଘୋରାଭୂୟୋଘୋରତରାତଦା ।
ତେନଶବ୍ଦେନମହତାପ୍ରଵୃଦ୍ଧେନସମଂତତଃ ॥ 26 ॥
ତ୍ରିକୂଟଃକଂଦରାକୀର୍ଣଃପ୍ରଵ୍ୟାହରଦିଵାଚଲଃ ।
ଗୋଲାଂଗୂଲାମହାକାୟାସ୍ତମସାତୁଲ୍ୟଵର୍ଚସଃ ॥ 27 ॥
ସଂପରିଷ୍ଵଜ୍ୟବାହୁଭ୍ୟାଂଭକ୍ଷୟନ୍ରଜନୀଚରାନ୍ ।
ଅଂଗଦସ୍ତୁରଣେଶତ୍ରୂନନିହଂତୁଂସମୁପସ୍ଥିତଃ ॥ 28 ॥
ରାଵଣିଂନିଜଘାନାଶୁସାରଥିଂଚହୟାନପି ।
ଵର୍ତମାନେତଦାଘୋରେସଂଗ୍ରାମେଭୃଶଦାରୁଣେ ॥ 29 ॥
ଇଂଦ୍ରଜିତ୍ତୁରଥଂତ୍ୟକ୍ତ୍ଵାହତାଶ୍ଵୋହତସାରଥିଃ ।
ଅଂଗଦେନମହାମାୟସ୍ତତ୍ରୈଵାଂତରଧୀୟତ ॥ 30 ॥
ତତ୍କର୍ମଵାଲିପୁତ୍ରସ୍ୟସର୍ଵେଦେଵାସ୍ସହର୍ଷିଭିଃ ।
ତୁଷ୍ଟୁଵୁଃପୂଜନାର୍ହସ୍ୟତୌଚୋଭୌରାମଲକ୍ଷ୍ମଣୌ ॥ 31 ॥
ପ୍ରଭାଵଂସର୍ଵଭୂତାନିଵିଦୁରିଂଦ୍ରଜିତୋୟୁଧି ।
ତେନତେତଂମହାତ୍ମାନଂତୁଷ୍ଟାଃଦୃଷ୍ଟଵାପ୍ରଧର୍ଷିତମ୍ ॥ 32 ॥
ତତଃପ୍ରହୃଷ୍ଟାଃକପୟସ୍ସସୁଗ୍ରୀଵଵିଭୀଷଣାଃ ।
ସାଧୁସାଧ୍ଵିତିନେଦୁଶ୍ଚଦୃଷ୍ଟଵାଶତ୍ରୁଂପ୍ରଧର୍ଷିତମ୍ ॥ 33 ॥
ଇଂଦ୍ରଜିତ୍ତୁତଦାତେନନିର୍ଜିତୋଭୀମକର୍ମଣା ।
ସଂୟୁଗେଵାଲିପୁତ୍ରେଣକ୍ରୋଧଂଚକ୍ରେସୁଦାରୁଣମ୍ ॥ 34 ॥
ସୋଽଂତର୍ଧାନଗତଃପାପୋରାଵଣୀରଣକର୍କଶଃ ।
ଅଦୃଶ୍ୟୋନିଶିତାନ୍ବାଣାନ୍ମୁମୋଚାଶନିଵର୍ଚସଃ ॥ 35 ॥
ସରାମଂଲକ୍ଷ୍ମଣଂଚୈଵଘୋରୈର୍ନାଗମୟୈଶ୍ଶରୈଃ ।
ବିଭେଦସମରେକ୍ରୁଦ୍ଧଃସର୍ଵଗାତ୍ରେଷୁରାକ୍ଷସଃ ॥ 36 ॥
ମାୟୟାସମ୍ଵୃତସ୍ତତ୍ରମୋହୟନ୍ରାଘଵୌୟୁଧି ।
ଅଦୃଶ୍ୟସ୍ସର୍ଵଭୂତାନାଂକୂଟୟୋଧୀନିଶାଚରଃ ॥ 37 ॥
ବବଂଧଶରବଂଧେନଭ୍ରାତରୌରାମଲକ୍ଷ୍ମଣୌ ।
ତେନତୌପୁରୁଷଵ୍ୟାଘ୍ରୌକ୍ରୁଦ୍ଧେନାଶୀଵିଷୈଶ୍ଶରୈଃ ॥ 38 ॥
ସହସାନିହତୌଵୀରୌତଦାପ୍ରୈକ୍ଷଂତଵାନରାଃ ।
ପ୍ରକାଶରୂପସ୍ତୁତଦାନଶକ୍ତସ୍ତୌବାଧିତୁଂରାକ୍ଷସରାଜପୁତ୍ରଃ ।
ମାୟାଂପ୍ରୟୋକ୍ତୁଂସମୁପାଜଗାମବବଂଧତୌରାଜସୁତୌଦୁରାତ୍ମା ॥ 39 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ଚତୁଶ୍ଚତ୍ଵାରିଂଶସ୍ସର୍ଗଃ ॥
