ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ପଂଚାଶୀତିତମସ୍ସର୍ଗଃ ।
ତ୍ତସ୍ୟତଦ୍ଵଚନଂଶ୍ରୁତ୍ଵାରାଘଵଶ୍ଶୋକକର୍ଶିତଃ ।
ନୋପଧାରୟତେଵ୍ୟକ୍ତଂୟଦୁକ୍ତଂତେନରକ୍ଷସା ॥ 1 ॥
ତତୋଧୈର୍ୟମଵଷ୍ଟଭ୍ୟରାମଃପରପୁରଂଜୟଃ ।
ଵିଭୀଷଣମୁପାସୀନମୁଵାଚକପିସନ୍ନିଧୌ ॥ 2 ॥
ନୈରୃତାଧିପତେଵାକ୍ୟଂୟଦୁକ୍ତଂତେଵିଭୀଷଣ ।
ଭୂୟସ୍ତଚ୍ଛ୍ରୋତୁମିଚ୍ଛାମିବ୍ରୂହିୟତ୍ତେଵିଵକ୍ଷିତମ୍ ॥ 3 ॥
ରାଘଵସ୍ୟଵଚଃଶ୍ରୁତ୍ଵାଵାକ୍ୟଂଵାକ୍ୟଵିଶାରଦ. ।
ୟତ୍ତତ୍ପୁନରିଦଂଵାକ୍ୟଂବଭାଷେ ସ ଵିଭୀଷଣଃ ॥ 4 ॥
ୟଥାଜ୍ଞପ୍ତଂମହାବାହୋତ୍ଵୟାଗୁଲ୍ମନିଵେଶନମ୍ ।
ତତ୍ତଥାଽନୁଷ୍ଠିତଂଵୀରତ୍ଵଦ୍ଵାକ୍ୟସମନଂତରମ୍ ॥ 5 ॥
ତାନ୍ୟନୀକାନିସର୍ଵାଣିଵିଭଗ୍ନାନିସମଂତତଃ ।
ଵିନ୍ୟସ୍ତାୟୂଥପାଶ୍ଚୈଵୟଥାନ୍ୟାୟଂଵିଭାଗଶଃ ॥ 6 ॥
ଭୂୟସ୍ତୁମମଵିଜ୍ଞାପ୍ୟଂତଚ୍ଛ୍ରୁଣୁଷ୍ଵମହାୟଶଃ ।
ତ୍ଵୟ୍ୟକାରଣସଂତପ୍ତେସଂତପ୍ତହୃଦୟାଵୟମ୍ ॥ 7 ॥
ତ୍ୟଜରାଜନ୍ନିମଂଶୋକଂମିଥ୍ୟାସଂତାପମାଗତମ୍ ।
ତଦିୟଂତ୍ୟଜ୍ୟତାଂଚିଂତାଶତ୍ରୁହର୍ଷଵିଵର୍ଧିନୀ ॥ 8 ॥
ଉଦ୍ୟମଃକ୍ରିୟତାଂଵୀରହର୍ଷଃସମୁପସେଵ୍ୟତାମ୍ ।
ପ୍ରାପ୍ତଵ୍ୟାୟଦିତେସୀତାହଂତଵ୍ୟାଶ୍ଚନିଶାଚରାଃ ॥ 9 ॥
ରଘୁନଂଦନଵକ୍ଷ୍ୟାମିଶ୍ରୂୟତାଂମେହିତଂଵଚଃ ।
ସାଧ୍ଵୟଂୟାତୁସୌମିତ୍ରିର୍ବଲେନମହତାଵୃତଃ ॥ 10 ॥
ନିକୁଂଭିଲାୟାଂସଂପ୍ରାପ୍ୟହଂତୁଂରାଵଣିମାହଵେ ।
ଧନୁର୍ମଂଡଲନିର୍ମୁକ୍ତୈରାଶୀଵିଷଵିଷୋପମୈଃ ॥ 11 ॥
ତେନଵୀରେଣତପସାଵରଦାନାତ୍ସ୍ଵୟଂଭୁଵଃ ।
ଅସ୍ତ୍ରଂବ୍ରହ୍ମଶିରଃପ୍ରାପ୍ତଂକାମଗାଶ୍ଚତୁରଂଗମାଃ ॥ 12 ॥
ସ ଏଷସହସୈନ୍ୟେନପ୍ରାପ୍ତଃକିଲନିକୁଂଭିଲାମ୍ ।
ୟଦ୍ୟୁତତିଷ୍ଠେତ୍କୃତଂକର୍ମହତାନ୍ସର୍ଵାଂଶ୍ଚଵିଦ୍ଧିନଃ ॥ 13 ॥
ନିକୁଂଭିଲାମସଂପ୍ରାପ୍ତମହୁତାଗ୍ନିଂ ଚ ୟୋରିପୁଃ ।
ତ୍ଵାମାତାୟିନଂହନ୍ୟାଦିଂଦ୍ରଶତ୍ରୋସ୍ସତେଵଧଃ ॥ 14 ॥
ଵରୋଦତ୍ତୋମହାବାହୋ ସର୍ଵଲୋକେଶ୍ଵରେଣଵୈ ।
ଇତ୍ୟେଵଂଵିହିତୋରାଜନ୍ଵଧସ୍ତସ୍ୟୈଷଧୀମତଃ ॥ 15 ॥
ଵଧାୟେଂଦ୍ରଜିତୋରାମସଂଦିଶସ୍ଵମହାବଲ ।
ହତେତସ୍ମିନ୍ହତଂଵିଦ୍ଧିରାଵଣଂସସୁହୃଜ୍ଜନମ୍ ॥ 16 ॥
ଵିଭୀଷଣଵଚ୍ଶ୍ରୁତ୍ଵାରାମୋଵାକ୍ୟମଥାବ୍ରଵୀତ୍ ।
ଜାନାମିତସ୍ୟରୌଦ୍ରସ୍ୟମାୟାଂସତ୍ୟପରାକ୍ରମଃ ॥ 17 ॥
ସ ହିବ୍ରହ୍ମାସ୍ତ୍ରଵିତ୍ପ୍ରାଜ୍ଞୋମହାମାୟୋମହାବଲ. ।
କରୋତ୍ୟସଂଜ୍ଞାନ୍ ସଂଗ୍ରାମେଦେଵାନ୍ସଵରୁଣାନପି ॥ 18 ॥
ତସ୍ୟାଂତରିକ୍ଷେଚରତଃସରଥସ୍ୟମହାୟଶଃ ।
ନ ଗତିର୍ଜ୍ଞାୟତେଵୀରସୂର୍ୟସ୍ୟେଵାଭ୍ରସମ୍ଲ୍ପଵେ ॥ 19 ॥
ରାଘଵସ୍ତୁରିପୋର୍ଜ୍ଞାତ୍ଵାମାୟାଵୀର୍ୟଂଦୁରାତ୍ମନଃ ।
ଲକ୍ଷ୍ମଣଂକୀର୍ତିସଂପନ୍ନମିଦଂଵଚନମବ୍ରଵୀତ୍ ॥ 20 ॥
ୟଦ୍ଵାନରେଂଦ୍ରସ୍ୟବଲଂତେନସର୍ଵେଣସମ୍ଵୃତଃ ।
ହନୂମତ୍ପ୍ରମୁଖୈଶ୍ଚଵୟୂଥପୈସ୍ସହଲକ୍ଷ୍ମଣ ॥ 21 ॥
ଜାଂବଵେନାର୍କ୍ଷପତିନାସହସୈନ୍ୟେନସମ୍ଵୃତଃ ।
ଜହିତଂରାକ୍ଷସସୁତଂମାୟାବଲଵିଶାରଦମ୍ ॥ 22 ॥
ଅୟଂତ୍ଵାଂସଚିଵୈଃସାର୍ଥଂମହାତ୍ମାରଜନୀଚରଃ ।
ଅଭିଜ୍ଞସ୍ତସ୍ୟମାୟାନାଂପୃଷ୍ଠତୋଽନୁଗମିଷ୍ୟତି ॥ 23 ॥
ରାଘଵସ୍ୟଵଚ୍ଶ୍ରୁତ୍ଵାଲକ୍ଷ୍ମଣସ୍ସଵିଭୀଷଣଃ ।
ଜଗ୍ରାହକାର୍ମୁକଶ୍ରେଷ୍ଠମତ୍ୟଦ୍ଭୁତପରାକ୍ରମଃ ॥ 24 ॥
ସନ୍ନଦ୍ଧଃକଵଚୀଖଂଗୀସଶରୋଵାମଚାପଭୃତ୍ ।
ରାମପାଦାଵୁପସ୍ପୃଶ୍ୟହୃଷ୍ଟଃସୌମିତ୍ରିରବ୍ରଵୀତ୍ ॥ 25 ॥
ଅଦ୍ୟମତ୍କାର୍ମୁକୋନ୍ମୁକ୍ତାଶ୍ଶରାନିର୍ଭିଦ୍ୟରାଵଣିମ୍ ।
ଲଂକାମଭିତିଷ୍ୟଂତିହଂସାଃପୁଷ୍କରିଣୀମିଵ ॥ 26 ॥
ଅଦ୍ୟୈଵତସ୍ୟରୌଦ୍ରସ୍ୟଶରୀରଂମାମକାଶ୍ଶରାଃ ।
ଵିଧମିଷ୍ୟଂତିଭିତ୍ତ୍ଵାତଂମହାଚାପଗୁଣଚ୍ୟୁତାଃ ॥ 27 ॥
ଏଵମୁକ୍ତ୍ଵା ସ ଦ୍ୟୁତିମାନ୍ ଵଚନଂଭ୍ରାତୁରଗ୍ରତଃ ।
ସ ରାଵଣିଵଧାକାଂକ୍ଷୀଲକ୍ଷ୍ମଣସ୍ତ୍ଵରିତୋୟୟୌ ॥ 28 ॥
ସୋଽଭିଵାଦ୍ୟଗୁରୋଃପାଦୌକୃତ୍ଵାଚାପିପ୍ରଦକ୍ଷିଣମ୍ ।
ନିକୁଂଭିଲାମଭିୟୟୌଚୈତ୍ୟଂରାଵଣିପାଲିତମ୍ ॥ 29 ॥
ଵିଭୀଷଣେନସହିତୋରାଜପୁତ୍ରଃପ୍ରତାପଵାନ୍ ।
କୃତସ୍ଵସ୍ତ୍ୟୟନୋଭ୍ରାତ୍ରାଲକ୍ଷ୍ମଣସ୍ତ୍ଵରିତୋୟୟୌ ॥ 30 ॥
ଵାନରାଣାଂସହସ୍ରୈସ୍ତୁହନୂମାନ୍ ବହୁଭିର୍ଵୃତଃ ।
ଵିଭୀଷଣଶ୍ଚସାମାତ୍ୟୋତଦାଲକ୍ଷ୍ମଣମନ୍ଵଗାତ୍ ॥ 31 ॥
ମହତାହରିସୈନ୍ୟେନସଵେଗମଭିସଂଵୃତଃ ।
ଋକ୍ଷରାଜବଲଂଚୈଵଦଦର୍ଶପଥିଵିଷ୍ଠିତମ୍ ॥ 32 ॥
ସ ଗତ୍ଵାଦୂରମଧ୍ଵାନଂସୌମିତ୍ରିର୍ମିତ୍ରନଂଦନଃ ।
ରାକ୍ଷସେଂଦ୍ରବଲଂଦୂରାଦପଶ୍ୟଦ୍ଵ୍ୟୂହମାଶ୍ରିତମ୍ ॥ 33 ॥
ସ ତଂପ୍ରାପ୍ୟଧନୁଷ୍ପାଣିର୍ମାୟାୟୋଗମରିଂଦମଃ ।
ତସ୍ଥୌବ୍ରହ୍ମଵିଧାନେନଵିଜେତୁଂରଘୁନଂଦନଃ ॥ 34 ॥
ଭୀଷଣେନସହିତୋରାଜପୁତ୍ରଃପ୍ରତାପଵାନ୍ ।
ଅଂଗଦେନ ଚ ଵୀରେଣତଥାନିଲସୁତେନ ଚ ॥ 35 ॥
ଵିଵିଧମମଲଶସ୍ତ୍ରଭାସ୍ଵରଂ ତ ଦ୍ଧ୍ଵଜଗହନଂଵିପୁଲଂମହାରଥୈଶ୍ଚ ।
ପ୍ରତିଭୟତମମପ୍ରମେୟଵେଗଂତିମିରମିଵଦ୍ଵିଷତାଂବଲଂଵିଵେଶ ॥ 36 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ପଂଚାଶୀତିତମସ୍ସର୍ଗଃ ॥
