ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ତ୍ରୟସ୍ତ୍ରିଂଶସ୍ସର୍ଗଃ ।
ଅଥ ପ୍ରତିସମାଦିଷ୍ଟୋ ଲକ୍ଷ୍ମଣଃ ପରଵୀରହା ।
ପ୍ରଵିଵେଶ ଗୁହାଂ ଘୋରାଂ କିଷ୍କିଂଧାଂ ରାମଶାସନାତ୍ ॥ 1 ॥
ଦ୍ଵାରସ୍ଥା ହରୟସ୍ତତ୍ର ମହାକାୟା ମହାବଲାଃ ।
ବଭୂଵୁର୍ଲକ୍ଷ୍ମଣଂ ଦୃଷ୍ଟ୍ଵା ସର୍ଵେ ପ୍ରାଂଜଲୟ ସ୍ଥିତାଃ ॥ 2 ॥
ନିଶ୍ଵସଂତଂ ତୁ ତଂ ଦୃଷ୍ଟ୍ଵା କ୍ରୁଦ୍ଧଂ ଦଶରଥାତ୍ମଜମ୍ ।
ବଭୂଵୁର୍ହରୟସ୍ତ୍ରସ୍ତା ନ ଚୈନଂ ପର୍ୟଵାରୟନ୍ ॥ 3 ॥
ସ ତାଂ ରତ୍ନମୟୀଂ ଶ୍ରୀମାଂଦିଵ୍ୟାଂ ପୁଷ୍ପିତକାନନାମ୍ ।
ରମ୍ୟାଂ ରତ୍ନସମାକୀର୍ଣାଂ ଦଦର୍ଶ ମହତୀଂ ଗୁହାମ୍ ॥ 4 ॥
ହର୍ମ୍ୟପ୍ରାସାଦସଂବାଧାଂ ନାନାପଣ୍ୟୋପଶୋଭିତାମ୍ ।
ସର୍ଵକାମଫଲୈର୍ଵୃକ୍ଷୈଃ ପୁଷ୍ପିତୈରୁପଶୋଭିତାମ୍ ॥ 5 ॥
ଦେଵଗଂଧର୍ଵପୁତ୍ରୈଶ୍ଚ ଵାନରୈଃ କାମରୂପିଭିଃ ।
ଦିଵ୍ୟମାଲ୍ୟାଂବରଧରୈ ଶ୍ଶୋଭିତାଂ ପ୍ରିୟଦର୍ଶନୈଃ ॥ 6 ॥
ଚଂଦନାଗରୁପଦ୍ମାନାଂ ଗଂଧୈସ୍ସୁରଭିଗଂଧିନାମ୍ ।
ମୈରେୟାଣାଂ ମଧୂନାଂ ଚ ସମ୍ମୋଦିତମହାପଥାମ୍ ॥ 7 ॥
ଵିଂଧ୍ୟମେରୁଗିରିପ୍ରଖ୍ୟୈଃ ପ୍ରାସାଦୈର୍ନୈକଭୂମିଭିଃ ।
ଦଦର୍ଶ ଗିରିନଦ୍ୟଶ୍ଚ ଵିମଲାସ୍ତତ୍ର ରାଘଵଃ ॥ 8 ॥
ଅଂଗଦସ୍ୟ ଗୃହଂ ରମ୍ୟଂ ମୈଂଦସ୍ୟ ଦ୍ଵିଵିଧସ୍ୟ ଚ ।
ଗଵୟସ୍ୟ ଗଵାକ୍ଷସ୍ୟ ଗଜସ୍ୟ ଶରଭସ୍ୟ ଚ ॥ 9 ॥
ଵିଦ୍ୟୁନ୍ମାଲେଶ୍ଚ ସଂପାତେ ସ୍ସୂର୍ୟାକ୍ଷସ୍ୟ ହନୂମତଃ ।
ଵୀରବାହୋ ସ୍ସୁବାହୋଶ୍ଚ ନଲସ୍ୟ ଚ ମହାତ୍ମନଃ ॥ 10 ॥
କୁମୁଦସ୍ୟ ସୁଷେଣସ୍ୟ ତାରଜାଂବଵତୋସ୍ତଥା ।
ଦଧିଵକ୍ତ୍ରସ୍ୟ ନୀଲସ୍ୟ ସୁପାଟଲସୁନେତ୍ରୟୋଃ ॥ 11 ॥
ଏତେଷାଂ କପିମୁଖ୍ୟାନାଂ ରାଜମାର୍ଗେ ମହାତ୍ମନାମ୍ ।
ଦଦର୍ଶ ଗୃହମୁଖ୍ୟାନି ମହାସାରାଣି ଲକ୍ଷ୍ମଣଃ ॥ 12 ॥
ପାଂଡୁରାଭ୍ରପ୍ରକାଶାନି ଦିଵ୍ୟମାଲ୍ୟୟୁତାନି ଚ ।
ପ୍ରଭୂତଧନଧାନ୍ୟାନି ସ୍ତ୍ରୀରତ୍ନୈ ଶ୍ଶୋଭିତାନି ଚ ॥ 13 ॥
ପାଂଡୁରେଣ ତୁ ସାଲେନ ପରିକ୍ଷିପ୍ତଂ ଦୁରାସଦମ୍ ।
ଵାନରେଂଦ୍ରଗୃହଂ ରମ୍ୟଂ ମହେଂଦ୍ରସଦନୋପମମ୍ ॥ 14 ॥
ଶୁକ୍ଲୈଃ ପ୍ରାସାଦଶିଖରୈଃ କୈଲାସଶିଖରୋପମୈଃ ।
ସର୍ଵକାମଫଲୈର୍ଵୃକ୍ଷୈଃ ପୁଷ୍ପିତୈରୁପଶୋଭିତମ୍ ॥ 15 ॥
ମହେଂଦ୍ରଦତ୍ତୈଶ୍ଶ୍ରୀମଦ୍ଭିର୍ନୀଲଜୀମୂତସନ୍ନିଭୈଃ ।
ଦିଵ୍ୟପୁଷ୍ପଫଲୈର୍ଵୃକ୍ଷୈଶୀତଚ୍ଛାୟୈର୍ମନୋରମୈଃ ॥ 16 ॥
ହରିଭିସ୍ସଂଵୃତଦ୍ଵାରଂ ବଲିଭିଶ୍ଶସ୍ତ୍ରପାଣିଭିଃ ।
ଦିଵ୍ୟମାଲ୍ୟାଵୃତଂ ଶୁଭ୍ରଂ ତପ୍ତକାଂଚନତୋରଣମ୍ ॥ 17 ॥
ସୁଗ୍ରୀଵସ୍ୟ ଗୃହଂ ରମ୍ୟଂ ପ୍ରଵିଵେଶ ମହାବଲଃ ।
ଅଵାର୍ୟମାଣସ୍ସୌମିତ୍ରିର୍ମହାଭ୍ରମିଵ ଭାସ୍କରଃ ॥ 18 ॥
ସ ସପ୍ତ କକ୍ଷ୍ୟା ଧର୍ମାତ୍ମା ନାନାଜନସମାକୁଲାଃ ।
ପ୍ରଵିଶ୍ୟ ସୁମହଦ୍ଗଗୁପ୍ତଂ ଦଦର୍ଶାଂତଃପୁରଂ ମହତ୍ ॥ 19 ॥
ହୈମରାଜତପର୍ୟଂକୈର୍ବହୁଭିଶ୍ଚ ଵରାସନୈଃ ।
ମହାର୍ହାସ୍ତରଣୋପେତୈସ୍ତତ୍ର ତତ୍ରୋପଶୋଭିତମ୍ ॥ 20 ॥
ପ୍ରଵିଶନ୍ନେଵ ସତତଂ ଶୁଶ୍ରାଵ ମଧୁରସ୍ଵରମ୍ ।
ତଂତ୍ରୀଗୀତସମାକୀର୍ଣଂ ସମଗୀତପଦାକ୍ଷରମ୍ ॥ 21 ॥
ବହ୍ଵୀଶ୍ଚ ଵିଵିଧାକାରା ରୂପୟୌଵନଗର୍ଵିତାଃ ।
ସ୍ତ୍ରିୟସ୍ସୁଗ୍ରୀଵଭଵନେ ଦଦର୍ଶ ସୁମହାବଲଃ ॥ 22 ॥
ଦୃଷ୍ଟ୍ଵାଽଭିଜନସଂପନ୍ନାଶ୍ଚିତ୍ରମାଲ୍ୟକୃତସ୍ରଜଃ ।
ଫଲମାଲ୍ୟକୃତଵ୍ୟଗ୍ରା ଭୂଷଣୋତ୍ତମଭୂଷିତାଃ ॥ 23 ॥
ନାତୃପ୍ତାନ୍ନାପି ଚାଵ୍ୟଗ୍ରାନ୍ନାନୁଦାତ୍ତପରିଚ୍ଛଦାନ୍ ।
ସୁଗ୍ରୀଵାନୁଚରାଂଶ୍ଚାପି ଲକ୍ଷୟାମାସ ଲକ୍ଷ୍ମଣଃ ॥ 24 ॥
କୂଜିତଂ ନୂପୁରାଣାଂ ଚ କାଂଚୀନାଂ ନିନଦଂ ତଥା ।
ସନ୍ନିଶମ୍ୟ ତତ ଶ୍ରୀମାନ୍ସୌମିତ୍ରିର୍ଲଜ୍ଜିତୋଽଭଵତ୍ ॥ 25 ॥
ରୋଷଵେଗପ୍ରକୁପିତଶଶ୍ରୁତ୍ଵା ଚାଭରଣସ୍ଵନମ୍ ।
ଚକାର ଜ୍ୟାସ୍ଵନଂ ଵୀରୋ ଦିଶଶ୍ଶବ୍ଦେନ ପୂରୟନ୍ ॥ 26 ॥
ଚାରିତ୍ରେଣ ମହାବାହୁରପକୃଷ୍ଟ ସ୍ସଲକ୍ଷ୍ମଣଃ ।
ତସ୍ଥାଵେକାଂତମାଶ୍ରିତ୍ୟ ରାମକୋପସମନ୍ଵିତଃ ॥ 27 ॥
ତେନ ଚାପସ୍ଵନେନାଥ ସୁଗ୍ରୀଵଃ ପ୍ଲଵଗାଧିପଃ ।
ଵିଜ୍ଞାୟାଽଗମନଂ ତ୍ରସ୍ତ ସ୍ସଂଚଚାଲ ଵରାସନାତ୍ ॥ 28 ॥
ଅଂଗଦେନ ୟଥା ମହ୍ୟଂ ପୁରସ୍ତାତ୍ପ୍ରତିଵେଦିତମ୍ ।
ସୁଵ୍ୟକ୍ତମେଷ ସଂପ୍ରାପ୍ତ ସ୍ସୌମିତ୍ରିର୍ଭ୍ରାତୃଵତ୍ସଲଃ ॥ 29 ॥
ଅଂଗଦେନ ସମାଖ୍ୟାତଂ ଜ୍ୟାସ୍ଵନେନ ଚ ଵାନରଃ ।
ବୁବୁଧେ ଲକ୍ଷ୍ମଣଂ ପ୍ରାପ୍ତଂ ମୁଖଂ ଚାସ୍ୟଵ୍ୟଶୁଷ୍ୟତ ॥ 30 ॥
ତତସ୍ତାରାଂ ହରିଶ୍ରେଷ୍ଠସ୍ସୁଗ୍ରୀଵଃ ପ୍ରିୟଦର୍ଶନାମ୍ ।
ଉଵାଚ ହିତମଵ୍ୟଗ୍ରସ୍ତ୍ରାସ ସଂଭ୍ରାଂତମାନସଃ ॥ 31 ॥
କିନ୍ନୁ ତତ୍କାରଣଂ ସୁଭ୍ରୁ ପ୍ରକୃତ୍ୟା ମୃଦୁମାନସଃ ।
ସରୋଷ ଇଵ ସଂପ୍ରାପ୍ତୋ ୟେନାୟଂ ରାଘଵାନୁଜଃ ॥ 32 ॥
କିଂ ପଶ୍ୟସି କୁମାରସ୍ୟ ରୋଷସ୍ଥାନମନିଂଦିତେ ।
ନ ଖଲ୍ଵକାରଣେ କୋପମାହରେନ୍ନରସତ୍ତମଃ ॥ 33 ॥
ୟଦସ୍ୟ କୃତମସ୍ମାଭିର୍ବୁଧ୍ୟସେ କିଂଚିଦପ୍ରିୟମ୍ ।
ତଦବୁଦ୍ଧ୍ୟା ସଂପ୍ରଧାର୍ୟାଶୁ କ୍ଷିପ୍ରମର୍ହସି ଭାଷିତୁମ୍ ॥ 34 ॥
ଅଥଵା ସ୍ଵୟମେଵୈନଂ ଦ୍ରଷ୍ଟୁମର୍ହସି ଭାମିନି ।
ଵଚନୈ ସ୍ସାଂତ୍ଵୟୁକ୍ତୈଶ୍ଚ ପ୍ରସାଦୟିତୁମର୍ହସି ॥ 35 ॥
ତ୍ଵଦ୍ଦର୍ଶନ ଵିଶୁଦ୍ଧାତ୍ମା ନ ସ କୋପଂ କରିଷ୍ୟତି ।
ନ ହି ସ୍ତ୍ରୀଷୁ ମହାତ୍ମାନଃ କ୍ଵଚିତ୍କୁର୍ଵଂତି ଦାରୁଣମ୍ ॥ 36 ॥
ତ୍ଵୟା ସାଂତ୍ଵୈରୁପକ୍ରାଂତଂ ପ୍ରସନ୍ନେଂଦ୍ରିୟମାନସମ୍ ।
ତତଃ କମଲପତ୍ରାକ୍ଷଂ ଦ୍ରକ୍ଷ୍ୟାମ୍ୟହମରିଂଦମମ୍ ॥ 37 ॥
ସା ପ୍ରସ୍ଖଲଂତୀ ମଦଵିହ୍ଵଲାକ୍ଷୀ ପ୍ରଲଂବକାଂଚୀଗୁଣ ହେମସୂତ୍ରା ।
ସଲକ୍ଷଣା ଲକ୍ଷ୍ମଣସନ୍ନିଧାନଂ ଜଗାମ ତାରା ନମିତାଂଗୟଷ୍ଟିଃ ॥ 38 ॥
ସ ତାଂ ସମୀକ୍ଷ୍ୟୈଵ ହରୀଶପଂତୀଂ ତସ୍ଥାଵୁଦାସୀନତୟା ମହାତ୍ମା ।
ଅଵାଙ୍ମୁଖୋଽଭୂନ୍ମନୁଜେଂଦ୍ରପୁତ୍ରଃ ସ୍ତ୍ରୀସନ୍ନିକର୍ଷାଦ୍ଵିନିଵୃତ୍ତକୋପଃ ॥ 39 ॥
ସା ପାନୟୋଗାଦ୍ଵିନିଵୃତ୍ତଲଜ୍ଜା ଦୃଷ୍ଟିପ୍ରସାଦାଚ୍ଚ ନରେଂଦ୍ରସୂନୋଃ ।
ଉଵାଚ ତାରା ପ୍ରଣୟପ୍ରଗଲ୍ଭଂ ଵାକ୍ୟଂ ମହାର୍ଥଂ ପରିସାଂତ୍ଵପୂର୍ଵମ୍ ॥ 40 ॥
କିଂ କୋପମୂଲଂ ମନୁଜେଂଦ୍ରପୁତ୍ର କସ୍ତେ ନ ସଂତିଷ୍ଠତି ଵାଙ୍ନିଦେଶେ ।
କ ଶ୍ଶୁଷ୍କଵୃକ୍ଷଂ ଵନମାପତଂତଂ ଦଵାଗ୍ନିମାସୀଦତି ନିର୍ଵିଶଂକଃ ॥ 41 ॥
ସ ତସ୍ୟା ଵଚନଂ ଶ୍ରୁତ୍ଵା ସାଂତ୍ଵପୂର୍ଵମଶଂକିତମ୍ ।
ଭୂୟଃ ପ୍ରଣୟଦୃଷ୍ଟାର୍ଥଂ ଲକ୍ଷ୍ମଣୋ ଵାକ୍ୟମବ୍ରଵୀତ୍ ॥ 42 ॥
କିମୟଂ କାମଵୃତ୍ତସ୍ତେ ଲୁପ୍ତଧର୍ମାର୍ଥସଂଗ୍ରହଃ ।
ଭର୍ତା ଭର୍ତୃହିତେ ୟୁକ୍ତେ ନ ଚୈନମଵବୁଦ୍ଧ୍ୟସେ ॥ 43 ॥
ନ ଚିଂତୟତି ରାଜ୍ୟାର୍ଥଂ ନାସ୍ମାନ୍ ଶୋକପରାୟଣାନ୍ ।
ସାମାତ୍ୟପରିଷତ୍ତାରେ ପାନମେଵୋପସେଵତେ ॥ 44 ॥
ସ ମାସାଂଶ୍ଚତୁରଃ କୃତ୍ଵା ପ୍ରମାଣଂ ପ୍ଲଵଗେଶ୍ଵରଃ ।
ଵ୍ୟତୀତାଂ ସ୍ତାନ୍ମଦଵ୍ୟଗ୍ରୋ ଵିହରନ୍ନାଵବୁଧ୍ୟତେ ॥ 45 ॥
ନ ହି ଧର୍ମାର୍ଥସିଦ୍ଧ୍ୟର୍ଥଂ ପାନମେଵଂ ପ୍ରଶସ୍ୟତେ ।
ପାନାଦର୍ଥଶ୍ଚ ଧର୍ମଶ୍ଚ କାମଶ୍ଚ ପରିହୀୟତେ ॥ 46 ॥
ଧର୍ମଲୋପୋ ମହାଂସ୍ତାଵତ୍କୃତେ ହ୍ୟପ୍ରତିକୁର୍ଵତଃ ।
ଅର୍ଥଲୋପଶ୍ଚ ମିତ୍ରସ୍ୟ ନାଶେ ଗୁଣଵତୋ ମହାନ୍ ॥ 47 ॥
ମିତ୍ରଂ ହ୍ୟର୍ଥଗୁଣଶ୍ରେଷ୍ଠଂ ସତ୍ୟଧର୍ମପରାୟଣମ୍ ।
ତଦ୍ଦ୍ଵୟଂ ତୁ ପରିତ୍ୟକ୍ତଂ ନ ତୁ ଧର୍ମେ ଵ୍ୟଵସ୍ଥିତମ୍ ॥ 48 ॥
ତଦେଵଂ ପ୍ରସ୍ତୁତେ କାର୍ୟେ କାର୍ୟମସ୍ମାଭିରୁତ୍ତରମ୍ ।
ୟତ୍କାର୍ୟଂ କାର୍ୟତତ୍ତ୍ଵଜ୍ଞେ ତଦୁଦାହର୍ତୁମର୍ହସି ॥ 49 ॥
ସା ତସ୍ୟ ଧର୍ମାର୍ଥସମାଧିୟୁକ୍ତଂ ନିଶମ୍ୟ ଵାକ୍ୟଂ ମଧୁରସ୍ଵଭାଵମ୍ ।
ତାରା ଗତାର୍ଥେ ମନୁଜେଂଦ୍ରକାର୍ୟେ ଵିଶ୍ଵାସୟୁକ୍ତଂ ତମୁଵାଚ ଭୂୟଃ ॥ 50 ॥
ନ କୋପକାଲଃ କ୍ଷିତିପାଲପୁତ୍ର ନ ଚାତି କୋପ ସ୍ସ୍ଵଜନେ ଵିଧେୟଃ ।
ତ୍ଵଦର୍ଥକାମସ୍ୟ ଜନସ୍ୟ ତସ୍ୟ ପ୍ରମାଦମପ୍ୟର୍ହସି ଵୀର ସୋଢୁମ୍ ॥ 51 ॥
କୋପଂ କଥଂ ନାମ ଗୁଣପ୍ରକୃଷ୍ଟଃ କୁମାର କୁର୍ୟାଦପକୃଷ୍ଟସତ୍ତ୍ଵେ ।
କସ୍ତ୍ଵଦ୍ଵିଧଃ କୋପଵଶଂ ହି ଗଚ୍ଛେ ତ୍ସତ୍ତ୍ଵାଵରୁଦ୍ଧସ୍ତପସଃ ପ୍ରସୂତିଃ ॥ 52 ॥
ଜାନାମି ରୋଷଂ ହରିଵୀରବଂଧୋ ର୍ଜାନାମି କାର୍ୟସ୍ୟ ଚ କାଲସଂଗମ୍ ।
ଜାନାମି କାର୍ୟଂ ତ୍ଵୟି ୟତ୍କୃତଂ ନ ସ୍ତଚ୍ଚାପି ଜାନାମି ୟଦତ୍ର କାର୍ୟମ୍ ॥ 53 ॥
ତଚ୍ଚାପି ଜାନାମି ୟଥଵିଷହ୍ୟଂ ବଲଂ ନରଶ୍ରେଷ୍ଠ ଶରୀରଜସ୍ୟ ।
ଜାନାମି ୟସ୍ମିଂଶ୍ଚ ଜନେଽଵବଦ୍ଧଂ କାମେନ ସୁଗ୍ରୀଵମସକ୍ତମଦ୍ୟ ॥ 54 ॥
ନ କାମତଂତ୍ରେ ତଵ ବୁଦ୍ଧିରସ୍ତି ତ୍ଵଂ ଵୈ ୟଥା ମନ୍ୟୁଵଶଂ ପ୍ରପନ୍ନଃ ।
ନ ଦେଶକାଲୌ ହି ନ ଚାର୍ଥଧର୍ମା ଵଵେକ୍ଷତେ କାମରତିର୍ମନୁଷ୍ୟଃ ॥ 55 ॥
ତଂ କାମଵୃତ୍ତଂ ମମ ସନ୍ନିକୃଷ୍ଟଂ କାମାଭିୟୋଗାଚ୍ଚ ନିଵୃତ୍ତଲଜ୍ଜମ୍ ।
କ୍ଷମସ୍ଵ ତାଵତ୍ପରଵୀରହଂତ ସ୍ତ୍ଵଦ୍ଭ୍ରାତରଂ ଵାନରଵଂଶନାଥମ୍ ॥ 56 ॥
ମହର୍ଷୟୋ ଧର୍ମତପୋଽଭିକାମାଃ କାମାନୁକାମାଃ ପ୍ରତିବଦ୍ଧମୋହାଃ ।
ଅୟଂ ପ୍ରକୃତ୍ୟା ଚପଲଃ କପିସ୍ତୁ କଥଂ ନ ସଜ୍ଜେତ ସୁଖେଷୁ ରାଜା ॥ 57 ॥
ଇତ୍ୟେଵମୁକ୍ତ୍ଵା ଵଚନଂ ମହାର୍ଥଂ ସା ଵାନରୀ ଲକ୍ଷ୍ମଣମପ୍ରମେୟମ୍ ।
ପୁନ ସ୍ସଖେଦଂ ମଦଵିହ୍ଵଲଂଚ ଭର୍ତୁର୍ହିତଂ ଵାକ୍ୟମିଦଂ ବଭାଷେ ॥ 58 ॥
ଉଦ୍ୟୋଗସ୍ତୁ ଚିରାଜ୍ଞପ୍ତ ସ୍ସୁଗ୍ରୀଵେଣ ନରୋତ୍ତମ ।
କାମସ୍ୟାପି ଵିଧେୟେନ ତଵାର୍ଥପ୍ରତିସାଧନେ ॥ 59 ॥
ଆଗତା ହି ମହାଵୀର୍ୟା ହରୟଃ କାମରୂପିଣଃ ।
କୋଟୀଶତସହସ୍ରାଣି ନାନାନଗନିଵାସିନଃ ॥ 60 ॥
ତଦାଗଚ୍ଛ ମହାବାହୋ ଚାରିତ୍ରଂ ରକ୍ଷିତଂ ତ୍ଵୟା ।
ଅଚ୍ଛଲଂ ମିତ୍ରଭାଵେନ ସତାଂ ଦାରାଵଲୋକନମ୍ ॥ 61 ॥
ତାରୟା ଚାଭ୍ୟନୁଜ୍ଞାତସ୍ତ୍ଵରୟା ଚାପି ଚୋଦିତଃ ।
ପ୍ରଵିଵେଶ ମହାବାହୁରଭ୍ୟଂତରମରିଂଦମଃ ॥ 62 ॥
ତତ ସ୍ସୁଗ୍ରୀଵମାସୀନଂ କାଂଚନେ ପରମାସନେ ।
ମହାର୍ହାସ୍ତରଣୋପେତେ ଦଦର୍ଶାଦିତ୍ୟସନ୍ନିଭମ୍ ॥ 63 ॥
ଦିଵ୍ୟାଭଣଚିତ୍ରାଂଗଂ ଦିଵ୍ୟରୂପଂ ୟଶସ୍ଵିନମ୍ ।
ଦିଵ୍ୟମାଲ୍ୟାଂବରଧରଂ ମହେଂଦ୍ରମିଵ ଦୁର୍ଜୟମ୍ ॥ 64 ॥
ଦିଵ୍ୟାଭରଣମାଲାଭିଃ ପ୍ରମଦାଭି ସ୍ସମାଵୃତମ୍ ।
ସଂରବ୍ଧତରରକ୍ତାକ୍ଷୋ ବଭୂଵାଂତକସନ୍ନିଭଃ ॥ 65 ॥
ରୁମାଂ ତୁ ଵୀର ପରିରଭ୍ୟ ଗାଢଂ ଵରାସନସ୍ଥୋ ଵରହେମଵର୍ଣଃ ।
ଦଦର୍ଶ ସୌମିତ୍ରିମଦୀନସତ୍ତ୍ଵଂ ଵିଶାଲନେତ୍ରସ୍ସୁଵିଶାଲନେତ୍ରମ୍ ॥ 66 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ତ୍ରୟସ୍ତ୍ରିଂଶସ୍ସର୍ଗଃ ॥
