ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ସପ୍ତପଂଚାଶସ୍ସର୍ଗଃ ।
ଅକଂପନଵଧଂଶ୍ରୁତ୍ଵାକ୍ରୁଦ୍ଧୋଵୈରାକ୍ଷସେଶ୍ଵରଃ ।
କିଂଚିଦଦୀନମୁଖଶ୍ଚାପିସଚିଵାଂସ୍ତାନୁଦୈକ୍ଷତ ॥ 1 ॥
ସତୁଧ୍ୟାତ୍ଵାମୁହୂର୍ତଂତୁମଂତ୍ରିଭିସ୍ସଂଵିଚାର୍ୟଚ ।
ତତସ୍ତୁରାଵଣଃପୂର୍ଵଦିଵସେରାକ୍ଷସାଧିପଃ ॥ 2 ॥
ପୁରୀଂପରିୟୟୌଲଂକାଂସର୍ଵଗୁଲ୍ମାନଵେକ୍ଷିତୁମ୍ ।
ତାଂରାକ୍ଷସଗଣୈର୍ଗୁପ୍ତାଂଗୁଲ୍ମୈର୍ବହୁଭିରାଵୃତାମ୍ ॥ 3 ॥
ଦଦର୍ଶନଗରୀଂଲଂକାଂପତାକାଧ୍ଵଜମାଲିନୀମ୍ ।
ରୁଦ୍ଧାଂତୁନଗରୀଂଦୃଷ୍ଟଵାରାଵଣୋରାକ୍ଷସେଶ୍ଵରଃ ॥ 4 ॥
ଉଵାଚାତ୍ମହିତଂକାଲେପ୍ରହସ୍ତଂୟୁଦ୍ଧକୋଵିଦମ୍ ।
ପୁରସ୍ୟୋପନିଵିଷ୍ଟସ୍ୟସହସାପୀଡିତସ୍ୟଵା ॥ 5 ॥
ନାନ୍ୟଂୟୁଦ୍ଧାତ୍ପ୍ରପଶ୍ୟାମିମୋକ୍ଷଂୟୁଦ୍ଧଵିଶାରଦ ।
ଅହଂଵାକୁଂଭକର୍ଣୋଵାତ୍ଵଂଵାସେନାପତିର୍ମମ ॥ 6 ॥
ଇଂଦ୍ରଜିଦ୍ଵାନିକୁଂଭୋଵାଵହେୟୁର୍ଭାରମୀଦୃଶମ୍ ।
ସତ୍ଵଂବଲମତଶ୍ଶୀଘ୍ରମାଦାୟପରିଗୃହ୍ୟଚ ॥ 7 ॥
ଵିଜୟାୟାଭିନିର୍ୟାହିୟତ୍ରସର୍ଵେଵନୌକସଃ ।
ନିର୍ୟାଣାୟାଦେଵତେନୂନଂଚପଲାହରିଵାହିନୀ ॥ 8 ॥
ନର୍ଦତାଂରାକ୍ଷସେଂଦ୍ରାଣାଂଶ୍ରୁତ୍ଵାନାଦଂଦ୍ରଵିଷ୍ୟତି ।
ଚପଲାହ୍ୟଵିନୀତାଶ୍ଚଚଲଚିତ୍ତାଶ୍ଚଵାନରାଃ ॥ 9 ॥
ନସହିଷ୍ୟଂତିତେନାଦଂସିଂହନାଦମିଵଦ୍ଵିପାଃ ।
ଵିଦ୍ରୁତେଚବଲେତସ୍ମିନ୍ ରାମଃସୌମିତ୍ରିଣାସହ ॥ 10 ॥
ଅଵଶସ୍ତେନିରାଲଂବଃପ୍ରହସ୍ତଵଶମେଷ୍ୟତି ।
ଆପତ୍ସଂଶୟିତାଶ୍ରେୟୋନାତ୍ରନିସ୍ସଂଶୟୀକୃତା ॥ 11 ॥
ପ୍ରତିଲୋମାନୁଲୋମଂଵାୟଦ୍ଵାନୋମନ୍ୟସେହିତମ୍ ।
ରାଵଣେନୈଵମୁକ୍ତସ୍ତୁପ୍ରହସ୍ତୋଵାହିନୀପତିଃ ॥ 12 ॥
ରାକ୍ଷସେଂଦ୍ରମୁଵାଚେଦମସୁରେଂଦ୍ରମିଵୋଶନା ।
ରାଜନ୍ମଂତ୍ରିତପୂର୍ଵଂନଃକୁଶଲୈସ୍ସହମଂତ୍ରିଭିଃ ॥ 13 ॥
ଵିଵାଦଶ୍ଚାପିନୋଵୃତ୍ତସ୍ସମଵେକ୍ଷ୍ୟପରସ୍ପରମ୍ ।
ପ୍ରଦାନେନତୁସୀତାୟାଃଶ୍ରେୟୋଵ୍ୟଵସିତଂମୟା ॥ 14 ॥
ଅପ୍ରଦାନେପୁନର୍ୟୁଦ୍ଧଂଦୃଷ୍ଟମେତ୍ତଥୈଵନଃ ।
ସୋଽହଂଦାନୈଶ୍ଚମାନୈଶ୍ଚସତତଂପୂଜିତସ୍ତ୍ଵୟା ॥ 15 ॥
ସାଂତ୍ଵୈଶ୍ଚଵିଵିଧୈଃକାଲେକିଂନକୁର୍ୟାଂହିତଂତଵ ।
ନହିମେଜୀଵିତଂରକ୍ଷ୍ୟଂପୁତ୍ରଦାରଧନାନିଚ ॥ 16 ॥
ତ୍ଵଂପଶ୍ୟମାଂଜୁହୂଷଂତଂତ୍ଵଦର୍ଥେଜୀଵିତଂୟୁଧି ।
ଏଵମୁକ୍ତ୍ଵାତୁଭର୍ତାରଂରାଵଣଂଵାହିନୀପତିଃ ॥ 17 ॥
ଉଵାଚେଦଂବଲାଧ୍ୟକ୍ଷାନ୍ପ୍ରହସ୍ତଃପୁରତଃସ୍ଥିତାନ୍ ।
ମେଶୀଘ୍ରଂରାକ୍ଷସାନାଂମହାଦ୍ବଲମ୍ ॥ 18 ॥
ମଦ୍ଭାଣାବ୍ଦାଵେଗେନହତାନାଂଶନିଚରଣାଜିରେ ।
ଅଦ୍ୟହୃଷ୍ୟଂତୁମାଂସାଦାଃପକ୍ଷିଣଃକାନନୌକସାମ୍ ॥ 19 ॥
ଇତ୍ୟୁକ୍ତାସ୍ତେପ୍ରହସ୍ତେନବଲାଧ୍ୟକ୍ଷାଃ କୃତତ୍ଵରାଃ ।
ବଲମୁଦ୍ୟୋଜୟାମାସୁସ୍ତସ୍ମିନ୍ରାକ୍ଷସମଂଦିରେ ॥ 20 ॥
ସାବଭୂଵମୁହୂର୍ତେନନିଗ୍ମର୍ନାନାଵିଧାୟୁଧୈଃ ।
ଲଂକାରାକ୍ଷସଵୀରୈସ୍ତୈର୍ଗଜୈରିଵସମାକୁଲା ॥ 21 ॥
ହୁତାଶନଂତର୍ପୟତାଂବ୍ରାହ୍ମଣାଂଶ୍ଚନମସ୍ୟତାମ୍ ।
ଆଜ୍ୟଗଂଧପ୍ରତିଵହଃସୁରଭିର୍ମାରୁତୋଵଵୌ ॥ 22 ॥
ସ୍ରଜଶ୍ଚଵିଵିଧାକାରାଜଗୃହୁସ୍ତ୍ଵଭିମଂତ୍ରିତାଃ ।
ସଂଗ୍ରାମସଜ୍ଜାଃସମ୍ହୃଷ୍ଟାଧରାୟନ୍ରାକ୍ଷସାସ୍ତଦା ॥ 23 ॥
ସଧନୁଷ୍କାଃକଵଚିନୋଵେଗାଦାପ୍ଲୁତ୍ୟରାକ୍ଷସାଃ ।
ରାଵଣଂପ୍ରେକ୍ଷ୍ୟରାଜାନଂପ୍ରହସ୍ତଂପର୍ୟଵାରୟନ୍ ॥ 24 ॥
ଅଥାମଂତ୍୍ୟତୁରାଜାନଂଭେରୀମାହତ୍ୟଭୈରଵାମ୍ ।
ଆରୁରୋହରଥଂୟୁକ୍ତଃପ୍ରହସ୍ତସ୍ସଜ୍ଜକଲ୍ପିତମ୍ ॥ 25 ॥
ହୟୈର୍ମହାଜଵୈର୍ୟୁକ୍ତଂସମ୍ୟକ୍ସୂତସୁସଂୟତମ୍ ।
ମହାଜଲଦନିର୍ଘୋଷଂସାକ୍ଷାଚ୍ଚଂଦ୍ରାର୍କଭାସ୍ଵରମ୍ ॥ 26 ॥
ଉରଗଧ୍ଵଜଦୁର୍ଧର୍ଷଂସୁଵରୂଥଂସ୍ଵଵସ୍କରମ୍ ।
ସୁଵର୍ଣଜାଲସଂୟୁକ୍ତଂପ୍ରହସଂତମିଵଶ୍ରିୟା ॥ 27 ॥
ତତସ୍ତଂରଥମାସ୍ଥାୟରାଵଣାର୍ପିତଶାସନଃ ।
ଲଂକାୟାନିର୍ୟୟୌତୂର୍ଣଂବଲେନମହତାଵୃତଃ ॥ 28 ॥
ତତୋଦୁଂଧୁଭିନିର୍ଘୋଷଃପର୍ଜନ୍ୟନିନଦୋପମଃ ।
ଵାଦିତ୍ରାଣାଂଚନିନଦଃପୂରୟନ୍ନିଵମେଦିନୀମ୍ ॥ 29 ॥
ଶୁଶ୍ରୁଵେଶଂଖଶବ୍ଦଶ୍ଚପ୍ରୟାତେଵାହିନୀପତୌ ।
ନିନଦଂତସ୍ସ୍ଵରାନ୍ଘୋରାନ୍ରାକ୍ଷସାଜଗ୍ମୁରଗ୍ରତଃ ॥ 30 ॥
ଭୀମରୂପାମହାକାୟାଃପ୍ରହସ୍ତସ୍ୟପୁରସ୍ସରାଃ ।
ନରାଂତକଃକୁଂଭହନୁର୍ମହାନାଦସ୍ସମୁନ୍ନତଃ ॥ 31 ॥
ପ୍ରହସ୍ତସଚିଵାହ୍ୟେତେନିର୍ୟୟୁଃପରିଵାର୍ୟତମ୍ ।
ଵ୍ୟୂଢେନେଵସୁଘୋରେଣପୂର୍ଵଦ୍ଵାରାତ୍ସନିର୍ୟୟୌ ॥ 32 ॥
ଗଜୟୂଥନିକାଶେନବଲେନମହତାଵୃତଃ ।
ସାଗରପ୍ରତିମୌଘେନଵୃତସ୍ତେନବଲେନସଃ ॥ 33 ॥
ପ୍ରହସ୍ତୋନିର୍ୟୟୌକ୍ରୁଦ୍ଧଃକାଲାଂତକୟମୋପମଃ ।
ତସ୍ୟନିର୍ୟାଣଘୋଷେଣରାକ୍ଷସାନାଂଚନର୍ଦତାମ୍ ॥ 34 ॥
ଲଂକାୟାଂସର୍ଵଭୂତାନିଵିନେଦୁର୍ଵିକୃତୈସ୍ସ୍ଵରୈଃ ।
ଵ୍ୟଭ୍ରମାକାଶମାଵିଶ୍ୟମାଂସଶୋଣିତଭୋଜନାଃ ॥ 35 ॥
ମଂଡଲାନ୍ୟପସଵ୍ୟାନିଖଗାଶ୍ଚକ୍ରୂରଥଂପ୍ରତି ।
ସମ୍ନତ୍ୟଃପାଵକଜ୍ଵାଲାଃଶିଵାଘୋରାଵଵାଶିରେ ॥ 36 ॥
ଅଂତରିକ୍ଷାତ୍ପପାତୋଲ୍କାଵାୟୁଶ୍ଚପରୁଷଂଵନୌ ।
ଅନ୍ୟୋନ୍ୟମଭିସଂରବ୍ଧାଗ୍ରହାଶ୍ଚନଚକାଶିରେ ॥ 37 ॥
ମେଘାଶ୍ଚଖରନିର୍ଘୋଷାରଥସ୍ୟୋପରିରକ୍ଷସଃ ।
ଵଵୃଷଂରୁଧିରଂଚାସ୍ୟସିଷିଚୁଶ୍ଚପୁରସ୍ସରାନ୍ ॥ 38 ॥
କେତୁର୍ମୂର୍ଧନିଗୃଧ୍ରୋଽସ୍ୟନିଲୀନୋଦକ୍ଷିଣାମୁଖଃ ।
ତୁଦନ୍ନୁଭୟତଃପାର୍ଶ୍ଵଂସମଗ୍ରାମହରତ୍ପ୍ରଭାମ୍ ॥ 39 ॥
ସାରଥେର୍ଭହୁଶଶ୍ଚାସ୍ୟସଂଗ୍ରାମମଵଗାହତଃ ।
ପ୍ରତୋଦୋନ୍ୟପତଦ୍ଧସ୍ତାତ୍ସୂତସ୍ୟହୟସାଦିନଃ ॥ 40 ॥
ନିର୍ୟାଣଶ୍ରୀଶ୍ଚୟାଽସ୍ୟାସୀଦ୍ଭାସ୍ଵରାଵସୁଦୁର୍ଲଭାଃ ।
ସାନନାଶମୁହୂର୍ତେନସମେଚସ୍ଖଲିତାହୟାଃ ॥ 41 ॥
ପ୍ରହସ୍ତଂତ୍ଵଭିନିର୍ୟାଂତଂପ୍ରଖ୍ୟାତବଲପୌରୁଷମ୍ ।
ୟୁଧିନାନାପ୍ରହରଣାକପିସେନାଽଭ୍ୟଵର୍ତତ ॥ 42 ॥
ଅଥଘୋଷସ୍ସୁତୁମୁଲୋହରୀଣାଂସମଜାୟତ ।
ଵୃକ୍ଷାନାରୁଜତାଂଚୈଵଗୁର୍ଵୀରାଗୃହ୍ଣତାଂଶିଲାଃ ॥ 43 ॥
ନଦତାଂରାକ୍ଷସାନାଂଚଵାନରାଣାଂଚଗର୍ଜତାମ୍ ।
ଉଭେପ୍ରମୁଦିତେସୈନ୍ୟେରକ୍ଷୋଗଣଵନୌକସାମ୍ ॥ 44 ॥
ଵେଗିତାନାଂସମର୍ଥାନାମନ୍ୟୋନ୍ୟଵଧକାଙ୍ କ୍ଷିଣାମ୍ ।
ପରସ୍ପରଂଚାହ୍ଵୟତାଂନିନାଦ୍ଶୂୟତେମହାନ୍ ॥ 45 ॥
ତତଃପ୍ରହସ୍ତଃକପିରାଜଵାହିନୀମଭିପ୍ରତସ୍ଥେଵିଜୟାୟଦୁର୍ମତିଃ ।
ଵିଵୃଦ୍ଧଵେଗଂଶ୍ଚଵିଵେଶତାଂଚମୂଂୟଥାମୁମୂର୍ଷୁଶ୍ଶଲଭୋଵିଭାଵସୁମ୍ ॥ 46 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ସପ୍ତପଂଚାଶସ୍ସର୍ଗଃ ॥
