ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଅଷ୍ଟତ୍ରିଂଶସ୍ସର୍ଗଃ ।
ତତସ୍ସ କପିଶାର୍ଦୂଲସ୍ତେନ ଵାକ୍ୟେନ ତୋଷିତଃ ।
ସୀତାମୁଵାଚ ତଚ୍ଛୃତ୍ଵା ଵାକ୍ୟଂ ଵାକ୍ୟଵିଶାରଦଃ ॥ 1 ॥
ୟୁକ୍ତରୂପଂ ତ୍ଵୟା ଦେଵି ଭାଷିତଂ ଶୁଭଦର୍ଶନେ ।
ସଦୃଶଂ ସ୍ତ୍ରୀସ୍ଵଭାଵସ୍ୟ ସାଧ୍ଵୀନାଂ ଵିନୟସ୍ୟ ଚ ॥ 2 ॥
ସ୍ତ୍ରୀତ୍ଵଂ ନ ତୁ ସମର୍ଥଂ ହି ସାଗରଂ ଵ୍ୟତିଵର୍ତିତୁମ୍ ।
ମାମଧିଷ୍ଠାୟ ଵିସ୍ତୀର୍ଣଂ ଶତୟୋଜନମାୟତମ୍ ॥ 3 ॥
ଦ୍ଵିତୀୟଂ କାରଣଂ ୟଚ୍ଚ ବ୍ରଵୀଷି ଵିନୟାନ୍ଵିତେ ।
ରାମାଦନ୍ୟସ୍ୟ ନାର୍ହାମି ସଂସ୍ପର୍ଶମିତି ଜାନକି ॥ 4 ॥
ଏତତ୍ତେ ସଦୃଶଂ ଦେଵି ପତ୍ନ୍ୟାସ୍ତସ୍ୟ ମହାତ୍ମନଃ ।
କା ହ୍ୟନ୍ୟା ତ୍ଵାମୃତେ ଦେଵି ବ୍ରୂୟାଦ୍ଵଚନମୀଦୃଶମ୍ ॥ 5 ॥
ଶ୍ରୋଷ୍ୟତେ ଚୈଵ କାକୁତ୍ସ୍ଥଃ ସର୍ଵଂ ନିରଵଶେଷତଃ ।
ଚେଷ୍ଟିତଂ ୟତ୍ତ୍ଵୟା ଦେଵି ଭାଷିତଂ ମମ ଚାଗ୍ରତଃ ॥ 6 ॥
କାରଣୈର୍ବହୁଭିର୍ଦେଵି ରାମପ୍ରିୟଚିକୀର୍ଷୟା ।
ସ୍ନେହପ୍ରସ୍କନ୍ନମନସା ମୟୈତତ୍ସମୁଦୀରିତମ୍ ॥ 7 ॥
ଲଂକାୟା ଦୁଷ୍ପ୍ରଵେଶତ୍ଵାଦ୍ଦୁସ୍ତରତ୍ଵାନ୍ମହୋଦଧେଃ ।
ସାମର୍ଥ୍ୟାଦାତ୍ମନଶ୍ଚୈଵ ମୟୈତତ୍ସମୁଦୀରିତମ୍ ॥ 8 ॥
ଇଚ୍ଛାମି ତ୍ଵାଂ ସମାନେତୁମଦ୍ୟୈଵ ରଘୁବଂଧୁନା ।
ଗୁରୁସ୍ନେହେନ ଭକ୍ତ୍ୟା ଚ ନାନ୍ୟଥୈତଦୁଦାହୃତମ୍ ॥ 9 ॥
ୟଦି ନୋତ୍ସହସେ ୟାତୁଂ ମୟା ସାର୍ଥମନିଂଦିତେ ।
ଅଭିଜ୍ଞାନଂ ପ୍ରୟଚ୍ଛ ତ୍ଵଂ ଜାନୀୟାଦ୍ରାଘଵୋ ହି ୟତ୍ ॥ 10 ॥
ଏଵମୁକ୍ତା ହନୁମତା ସୀତା ସୁରସୁତୋପମା ।
ଉଵାଚ ଵଚନଂ ମଂଦଂ ବାଷ୍ପପ୍ରଗ୍ରଥିତାକ୍ଷରମ୍ ॥ 11 ॥
ଇଦଂ ଶ୍ରେଷ୍ଠମଭିଜ୍ଞାନଂ ବ୍ରୂୟାସ୍ତ୍ଵଂ ତୁ ମମ ପ୍ରିୟମ୍ ।
ଶୈଲସ୍ୟ ଚିତ୍ରକୂଟସ୍ୟ ପାଦେ ପୂର୍ଵୋତ୍ତରେ ପୁରା ॥ 12 ॥
ତାପସାଶ୍ରମଵାସିନ୍ୟାଃ ପ୍ରାଜ୍ୟମୂଲଫଲୋଦକେ ।
ତସ୍ମିନ୍ସିଦ୍ଧାଶ୍ରମେ ଦେଶେ ମଂଦାକିନ୍ୟା ଵିଦୂରତଃ ॥ 13 ॥
ତସ୍ୟୋପଵନଷଂଡେଷୁ ନାନାପୁଷ୍ପସୁଗଂଧିଷୁ ।
ଵିହୃତ୍ୟ ସଲିଲେ କ୍ଲିନ୍ନା ମମାଂକେ ସମୁପାଵିଶମଃ ॥ 14 ॥
ତତୋ ମାଂସସମାୟୁକ୍ତୋ ଵାୟସଃ ପର୍ୟତୁଂଡୟତ୍ ।
ତମହଂ ଲୋଷ୍ଟମୁଦ୍ୟମ୍ୟ ଵାରୟାମିସ୍ମ ଵାୟସମ୍ ॥ 15 ॥
ଦାରୟନ୍ସ ଚ ମାଂ କାକସ୍ତତ୍ତ୍ରୈଵ ପରିଲୀୟତେ ।
ନ ଚାପ୍ୟୁପାରମନ୍ମାଂସାଦ୍ଭକ୍ଷାର୍ଥି ବଲିଭୋଜନଃ ॥ 16 ॥
ଉତ୍କର୍ଷଂତ୍ୟାଂ ଚ ରଶନାଂ କ୍ରୁଦ୍ଧାୟାଂ ମୟି ପକ୍ଷିଣି ।
ସ୍ରସ୍ୟମାନେ ଚ ଵସନେ ତତୋ ଦୃଷ୍ଟା ତ୍ଵୟା ହ୍ୟହମ୍ ॥ 17 ॥
ତ୍ଵୟାଽପହସିତା ଚାହଂ କ୍ରୁଦ୍ଧା ସଂଲଜ୍ଜିତା ତଦା ।
ଭକ୍ଷଗୃଧ୍ନେନ କାକେନ ଦାରିତା ତ୍ଵାମୁପାଗତା ॥ 18 ॥
ଆସୀନସ୍ୟ ଚ ତେ ଶ୍ରାଂତା ପୁନରୁତ୍ସଂଗମାଵିଶମ୍ ।
କ୍ରୁଧ୍ୟଂତୀ ଚ ପ୍ରହୃଷ୍ଟେନ ତ୍ଵୟାଽହଂ ପରିସାଂତ୍ଵିତା ॥ 19 ॥
ବାଷ୍ପପୂର୍ଣମୁଖୀ ମଂଦଂ ଚକ୍ଷୁଷୀ ପରିମାର୍ଜତୀ ।
ଲକ୍ଷିତାଽହଂ ତ୍ଵୟା ନାଥ ଵାୟସେନ ପ୍ରକୋପିତା ॥ 20 ॥
ପରିଶ୍ରମାତ୍ପ୍ରସୁପ୍ତା ଚ ରାଘଵାଂକେଽପ୍ୟହଂ ଚିରମ୍ ।
ପର୍ୟାୟେଣ ପ୍ରସୁପ୍ତଶ୍ଚ ମମାଂକେ ଭରତାଗ୍ରଜଃ ॥ 21 ॥
ସ ତତ୍ର ପୁନରେଵାଥ ଵାୟସସ୍ସମୁପାଗମତ୍ ।
ତତସ୍ସୁପ୍ତପ୍ରବୁଦ୍ଧାଂ ମାଂ ରାମସ୍ୟାଂକାତ୍ସମୁତ୍ଥିତାମ୍ ॥ 22 ॥
ଵାୟସସ୍ସହସାଗମ୍ୟ ଵିଦଦାର ସ୍ତନାଂତରେ ।
ପୁନଃ ପୁନରଥୋତ୍ପତ୍ୟ ଵିଦଦାର ସ ମାଂ ଭୃଶମ୍ ॥ 23 ॥
ତତସ୍ସମୁକ୍ଷିତୋ ରାମୋ ମୁକ୍ତୈଶ୍ଶୋଣିତବିଂଦୁଭିଃ ।
ଵାୟସେନ ତତସ୍ତେନ ବଲଵତ୍କ୍ଲିଶ୍ୟମାନୟା ॥ 24 ॥
ସ ମୟା ବୋଧିତଶ୍ଶ୍ରୀମାନ୍ସୁଖସୁପ୍ତଃ ପରଂତପଃ ।
ସ ମାଂ ଦୃଷ୍ଟ୍ଵା ମହାବାହୁର୍ଵିତୁନ୍ନାଂ ସ୍ତନୟୋସ୍ତଦା ॥ 25 ॥
ଆଶୀଵିଷ ଇଵ କ୍ରୁଦ୍ଧଶ୍ଵସନ୍ଵାକ୍ୟମଭାଷତ ।
କେନ ତେ ନାଗନାସୋରୁ ଵିକ୍ଷତଂ ଵୈ ସ୍ତନାଂତରମ୍ ॥ 26 ॥
କଃ କ୍ରୀଡତି ସରୋଷେଣ ପଂଚଵକ୍ତ୍ରେଣ ଭୋଗିନା ।
ଵୀକ୍ଷମାଣସ୍ତତସ୍ତଂ ଵୈ ଵାୟସଂ ସମୁଦୈକ୍ଷତ ॥ 27 ॥
ନଖୈସ୍ସରୁଧିରୈସ୍ତୀକ୍ଷ୍ଣୈର୍ମାମେଵାଭିମୁଖଂ ସ୍ଥିତମ୍ ।
ପୁତ୍ତ୍ରଃ କିଲ ସ ଶକ୍ରସ୍ୟ ଵାୟସଃ ପତତାଂ ଵରଃ ॥ 28 ॥
ଧରାଂତରଗତଶ୍ଶୀଘ୍ରଂ ପଵନସ୍ୟ ଗତୌ ସମଃ ।
ତତସ୍ତସ୍ମିନ୍ମହାବାହୁଃ କୋପସଂଵର୍ତିତେକ୍ଷଣଃ ॥ 29 ॥
ଵାୟସେ କୃତଵାନ୍କ୍ରୂରାଂ ମତିଂ ମତିମତାଂ ଵରଃ ।
ସ ଦର୍ଭଂ ସଂସ୍ତରାଦ୍ଗୃହ୍ୟ ବ୍ରାହ୍ମେଣାସ୍ତ୍ରେଣ ୟୋଜୟତ୍ ॥ 30 ॥
ସ ଦୀପ୍ତ ଇଵ କାଲାଗ୍ନିର୍ଜଜ୍ଵାଲାଭିମୁଖୋ ଦ୍ଵିଜମ୍ ।
ସ ତଂ ପ୍ରଦୀପ୍ତଂ ଚିକ୍ଷେପ ଦର୍ଭଂ ତଂ ଵାୟସଂ ପ୍ରତି ॥ 31 ॥
ତତସ୍ତଂ ଵାୟସଂ ଦର୍ଭସ୍ସୋଂବରେଽନୁଜଗାମ ହ ।
ଅନୁସୃଷ୍ଟସ୍ତଦା କାକୋ ଜଗାମ ଵିଵିଧାଂ ଗତିମ୍ ॥ 32 ॥
ଲୋକକାମ ଇମଂ ଲୋକଂ ସର୍ଵଂ ଵୈ ଵିଚଚାର ହ ।
ସ ପିତ୍ରା ଚ ପରିତ୍ୟକ୍ତସ୍ସୁରୈଶ୍ଚ ସମହର୍ଷିଭିଃ ॥ 33 ॥
ତ୍ରୀନ୍ଲୋକାନ୍ସଂପରିକ୍ରମ୍ୟ ତମେଵ ଶରଣଂ ଗତଃ ।
ସ ତଂ ନିପତିତଂ ଭୂମୌ ଶରଣ୍ୟଶ୍ଶରଣାଗତମ୍ ॥ 34 ॥
ଵଧାର୍ହମପି କାକୁତ୍ସ୍ଥଃ କୃପୟା ପର୍ୟପାଲୟତ୍ ।
ପରିଦ୍ୟୂନଂ ଵିଷଣ୍ଣଂ ଚ ସ ତମାୟାଂତମବ୍ରଵୀତ୍ ॥ 35 ॥
ମୋଘଂ କର୍ତୁଂ ନ ଶକ୍ୟଂ ତୁ ବ୍ରାହ୍ମମସ୍ତ୍ରଂ ତଦୁଚ୍ୟତାମ୍ ।
ହିନସ୍ତୁ ଦକ୍ଷିଣାକ୍ଷି ତ୍ଵଚ୍ଛର ଇତ୍ୟଥ ସୋଽବ୍ରଵୀତ୍ ॥ 36 ॥
ତତସ୍ତସ୍ୟାକ୍ଷି କାକସ୍ୟ ହିନସ୍ତି ସ୍ମ ସ ଦକ୍ଷିଣମ୍ ।
ଦତ୍ତ୍ଵା ସ ଦକ୍ଷିଣଂ ନେତ୍ରଂ ପ୍ରାଣେଭ୍ୟଃ ପରିରକ୍ଷିତଃ ॥ 37 ॥
ସ ରାମାୟ ନମସ୍କୃତ୍ୟ ରାଜ୍ଞେ ଦଶରଥାୟ ଚ ।
ଵିସୃଷ୍ଟସ୍ତେନ ଵୀରେଣ ପ୍ରତିପେଦେ ସ୍ଵମାଲୟମ୍ ॥ 38 ॥
ମତ୍କୃତେ କାକମାତ୍ରେ ତୁ ବ୍ରହ୍ମାସ୍ତ୍ରଂ ସମୁଦୀରିତମ୍ ।
କସ୍ମାଦ୍ୟୋ ମାଂ ହରେତ୍ତ୍ଵତ୍ତଃ କ୍ଷମସେ ତଂ ମହୀପତେ ॥ 39 ॥
ସ କୁରୁଷ୍ଵ ମହୋତ୍ସାହଃ କୃପାଂ ମୟି ନରର୍ଷଭ ।
ତ୍ଵୟା ନାଥଵତୀ ନାଥ ହ୍ୟନାଥା ଇଵ ଦୃଶ୍ୟତେ ॥ 40 ॥
ଆନୃଶଂସ୍ୟଂ ପରୋ ଧର୍ମସ୍ତଵତ୍ତ୍ତ ଐଵ ମୟା ଶ୍ରୁତଃ ।
ଜାନାମି ତ୍ଵାଂ ମହାଵୀର୍ୟଂ ମହୋତ୍ସାହଂ ମହାବଲମ୍ ॥ 41 ॥
ଅପାରପାରମକ୍ଷୋଭ୍ୟଂ ଗାଂଭୀର୍ୟାତ୍ସାଗରୋପମମ୍ ।
ଭର୍ତାରଂ ସସମୁଦ୍ରାୟା ଧରଣ୍ୟା ଵାସଵୋପମମ୍ ॥ 42 ॥
ଏଵମସ୍ତ୍ରଵିଦାଂ ଶ୍ରେଷ୍ଠସ୍ସତ୍ୟଵାନ୍ବଲଵାନପି ।
କିମର୍ଥମସ୍ତ୍ରଂ ରକ୍ଷସ୍ସୁ ନ ୟୋଜୟସି ରାଘଵ ॥ 43 ॥
ନ ନାଗା ନାଽପି ଗଂଧର୍ଵା ନାସୁରା ନ ମରୁଦ୍ଗଣାଃ ।
ରାମସ୍ୟ ସମରେ ଵେଗଂ ଶକ୍ତାଃ ପ୍ରତିସମାଧିତୁମ୍ ॥ 44 ॥
ତସ୍ୟ ଵୀର୍ୟଵତଃ କଶ୍ଚିଦ୍ୟଦ୍ୟସ୍ତି ମୟି ସଂଭ୍ରମଃ ।
କିମର୍ଥଂ ନ ଶରୈସ୍ତୀକ୍ଷ୍ଣୈଃ କ୍ଷୟଂ ନୟତି ରାକ୍ଷସାନ୍ ॥ 45 ॥
ଭ୍ରାତୁରାଦେଶମାଦାୟ ଲକ୍ଷ୍ମଣୋ ଵା ପରଂତପଃ ।
କସ୍ୟ ହେତୋର୍ନ ମାଂ ଵୀରଃ ପରିତ୍ରାତି ମହାବଲଃ ॥ 46 ॥
ୟଦି ତୌ ପୁରୁଷଵ୍ୟାଘ୍ରୌ ଵାୟ୍ଵଗ୍ନିସମତେଜସୌ ।
ସୁରାଣାମପି ଦୁର୍ଧର୍ଷୌ କିମର୍ଥଂ ମାମୁପେକ୍ଷତଃ ॥ 47 ॥
ମମୈଵ ଦୁଷ୍କୃତଂ କିଂଚିନ୍ମହଦସ୍ତି ନ ସଂଶୟଃ ।
ସମର୍ଥାଵପି ତୌ ୟନ୍ମାଂ ନାଵେକ୍ଷେତେ ପରଂତପୌ ॥ 48 ॥
ଵୈଦେହ୍ୟା ଵଚନଂ ଶ୍ରୁତ୍ଵା କରୁଣଂ ସାଶ୍ରୁଭାଷିତମ୍ ।
ଅଥାବ୍ରଵୀନ୍ମହାତେଜା ହନୁମାନ୍ମାରୁତାତ୍ମଜଃ ॥ 49 ॥
ତ୍ଵଚ୍ଛୋକଵିମୁଖୋ ରାମୋ ଦେଵି ସତ୍ୟେନ ତେ ଶପେ ।
ରାମେ ଦୁଃଖାଭିପନ୍ନେ ଚ ଲକ୍ଷ୍ମଣଃ ପରିତପ୍ୟତେ ॥ 50 ॥
କଥଂଚିଦ୍ଭଵତୀ ଦୃଷ୍ଟା ନ କାଲଃ ପରିଦେଵିତୁମ୍ ।
ଇମଂ ମୁହୂର୍ତଂ ଦୁଃଖାନାଂ ଦ୍ରକ୍ଷ୍ୟସ୍ୟଂତମନିଂଦିତେ ॥ 51 ॥
ତାଵୁଭୌ ପୁରୁଷଵ୍ୟାଘ୍ରୌ ରାଜପୁତ୍ରୌ ମହାବଲୌ ।
ତ୍ଵଦ୍ଦର୍ଶନକୃତୋତ୍ସାହୌ ଲଂକାଂ ଭସ୍ମୀକରିଷ୍ୟତଃ ॥ 52 ॥
ହତ୍ତ୍ଵା ଚ ସମରେ କ୍ରୂରଂ ରାଵଣଂ ସହବାଂଧଵମ୍ ।
ରାଘଵସ୍ତ୍ଵାଂ ଵିଶାଲାକ୍ଷି ନେଷ୍ୟତି ସ୍ଵାଂ ପୁରୀଂ ପ୍ରତି ॥ 53 ॥
ବ୍ରୂହି ୟଦ୍ରାଘଵୋ ଵାଚ୍ୟୋ ଲକ୍ଷ୍ମଣଶ୍ଚ ମହାବଲଃ ।
ସୁଗ୍ରୀଵୋ ଵାପି ତେଜସ୍ଵୀ ହରୟୋଽପି ସମାଗତାଃ ॥ 54 ॥
ଇତ୍ୟୁକ୍ତଵତି ତସ୍ମିଂସ୍ତୁ ସୀତା ସୁରସୁତୋପମା ।
ଉଵାଚ ଶୋକସଂତପ୍ତା ହନୁମଂତଂ ପ୍ଲଵଂଗମମ୍ ॥ 55 ॥
କୌସଲ୍ୟା ଲୋକଭର୍ତାରଂ ସୁଷୁଵେ ୟଂ ମନସ୍ଵିନୀ ।
ତଂ ମମାର୍ଥେ ସୁଖଂ ପୃଚ୍ଛ ଶିରସା ଚାଭିଵାଦୟ ॥ 56 ॥
ସ୍ରଜଶ୍ଚ ସର୍ଵରତ୍ନାନି ପ୍ରିୟା ୟାଶ୍ଚ ଵରାଂଗନାଃ ।
ଐଶ୍ଵର୍ୟଂ ଚ ଵିଶାଲାୟାଂ ପୃଥିଵ୍ୟାମପି ଦୁର୍ଲଭମ୍ ॥ 57 ॥
ପିତରଂ ମାତରଂ ଚୈଵ ସମ୍ମାନ୍ୟାଭିପ୍ରସାଦ୍ୟ ଚ ।
ଅନୁପ୍ରଵ୍ରଜିତୋ ରାମଂ ସୁମିତ୍ରା ୟେନ ସୁପ୍ରଜାଃ ॥ 58 ॥
ଆନୁକୂଲ୍ୟେନ ଧର୍ମାତ୍ମା ତ୍ୟକ୍ତ୍ଵା ସୁଖମନୁତ୍ତମମ୍ ।
ଅନୁଗଚ୍ଛତି କାକୁତ୍ସ୍ଥଂ ଭ୍ରାତରଂ ପାଲୟନ୍ଵନେ ॥ 59 ॥
ସିଂହସ୍କଂଧୋ ମହାବାହୁର୍ମନସ୍ଵୀ ପ୍ରିୟଦର୍ଶିନଃ ।
ପିତୃଵଦ୍ଵର୍ତତେ ରାମେ ମାତୃଵନ୍ମାଂ ସମାଚରନ୍ ॥ 60 ॥
ହ୍ରିୟମାଣାଂ ତଦା ଵୀରୋ ନ ତୁ ମାଂ ଵେଦ ଲକ୍ଷ୍ମଣଃ ।
ଵୃଦ୍ଧୋପସେଵୀ ଲକ୍ଷ୍ମୀଵାନ୍ ଶକ୍ତୋ ନ ବହୁଭାଷିତା ॥ 61 ॥
ରାଜପୁତ୍ରଃ ପ୍ରିୟଃ ଶ୍ରେଷ୍ଠଃ ସଦୃଶଃ ଶ୍ଵଶୁରସ୍ୟ ମେ ।
ମମଃ ପ୍ରିୟତରୋ ନିତ୍ୟଂ ଭ୍ରାତା ରାମସ୍ୟ ଲକ୍ଷ୍ମଣଃ ॥ 62 ॥
ନିୟୁକ୍ତୋ ଧୁରି ୟସ୍ୟାଂ ତୁ ତାମୁଦ୍ଵହତି ଵୀର୍ୟଵାନ୍ ।
ୟଂ ଦୃଷ୍ଟ୍ଵା ରାଘଵୋ ନୈଵ ଵୃତ୍ତମାର୍ୟମନୁସ୍ମରେତ୍ ॥ 63 ॥
ସ ମମାର୍ଥାୟ କୁଶଲଂ ଵକ୍ତଵ୍ୟୋ ଵଚନାନ୍ମମ ।
ମୃଦୁର୍ନିତ୍ୟଂ ଶୁଚିର୍ଦକ୍ଷଃ ପ୍ରିୟୋ ରାମସ୍ୟ ଲକ୍ଷ୍ମଣଃ ॥ 64 ॥
ୟଥା ହି ଵାନରଶ୍ରେଷ୍ଠ ଦୁଃଖକ୍ଷୟକରୋ ଭଵେତ୍ ।
ତ୍ଵମସ୍ମିନ୍କାର୍ୟନିର୍ୟୋଗେ ପ୍ରମାଣଂ ହରିସତ୍ତମଃ ॥ 65 ॥
ରାଘଵସ୍ତ୍ଵତ୍ସମାରଂଭାନ୍ମୟି ୟତ୍ନପରୋ ଭଵେତ୍ ।
ଇଦଂ ବ୍ରୂୟାଶ୍ଚ ମେ ନାଥଂ ଶୂରଂ ରାମଂ ପୁନଃ ପୁନଃ ॥ 66 ॥
ଜୀଵିତଂ ଧାରୟିଷ୍ୟାମି ମାସଂ ଦଶରଥାତ୍ମଜ ।
ଊର୍ଧ୍ଵଂ ମାସାନ୍ନ ଜୀଵେୟଂ ସତ୍ୟେନାହଂ ବ୍ରଵୀମି ତେ ॥ 67 ॥
ରାଵଣେନୋପରୁଦ୍ଧାଂ ମାଂ ନିକୃତ୍ୟ ପାପକର୍ମଣା ।
ତ୍ରାତୁମର୍ହସି ଵୀର ତ୍ଵଂ ପାତାଲାଦିଵ କୌଶିକୀମ୍ ॥ 68 ॥
ତତୋ ଵସ୍ତ୍ରଗତଂ ମୁକ୍ତ୍ଵା ଦିଵ୍ୟଂ ଚୂଡାମଣିଂ ଶୁଭମ୍ ।
ପ୍ରଦେୟୋ ରାଘଵାୟେତି ସୀତା ହନୁମତେ ଦଦୌ ॥ 69 ॥
ପ୍ରତିଗୃହ୍ୟ ତତୋ ଵୀରୋ ମଣିରତ୍ନମନୁତ୍ତମମ୍ ।
ଅଂଗୁଲ୍ୟା ୟୋଜୟାମାସ ନ ହ୍ୟସ୍ୟ ପ୍ରାଭଵଦ୍ଭୁଜଃ ॥ 70 ॥
ମଣିରତ୍ନଂ କପିଵରଃ ପ୍ରତିଗୃହ୍ୟାଭିଵାଦ୍ୟ ଚ ।
ସୀତାଂ ପ୍ରଦକ୍ଷିଣଂ କୃତ୍ଵା ପ୍ରଣତଃ ପାର୍ଵ୍ଶତଃ ସ୍ଥିତଃ ॥ 71 ॥
ହର୍ଷେଣ ମହତା ୟୁକ୍ତଃ ସୀତାଦର୍ଶନଜେନ ସଃ ।
ହୃଦୟେନ ଗତୋ ରାମଂ ଶରୀରେଣ ତୁ ଵିଷ୍ଠିତଃ ॥ 72 ॥
ମଣିଵରମୁପଗୃହ୍ୟ ତଂ ମହାର୍ହଂ ଜନକନୃପାତ୍ମଜୟା ଧୃତଂ ପ୍ରଭାଵାତ୍ ।
ଗିରିରିଵ ପଵନାଵଧୂତମୁକ୍ତଃ ସୁଖିତମନାଃ ପ୍ରତିସଂକ୍ରମଂ ପ୍ରପେଦେ ॥ 73 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଅଷ୍ଟତ୍ରିଂଶସ୍ସର୍ଗଃ ॥
