ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକଷଷ୍ଟିତମସ୍ସର୍ଗଃ ।
ଵିଶ୍ଵାମିତ୍ରୋ ମହାତ୍ମାଥ ପ୍ରସ୍ଥିତାନ୍ ପ୍ରେକ୍ଷ୍ୟ ତାନୃଷୀନ୍ ।
ଅବ୍ରଵୀନ୍ନରଶାର୍ଦୂଲସ୍ସର୍ଵାଂସ୍ତାନ୍ଵନଵାସିନଃ ॥ 1 ॥
ମହାନ୍ଵିଘ୍ନଃ ପ୍ରଵୃତ୍ତୋଽୟଂ ଦକ୍ଷିଣାମାସ୍ଥିତୋ ଦିଶମ୍ ।
ଦିଶମନ୍ୟାଂ ପ୍ରପତ୍ସ୍ୟାମସ୍ତତ୍ର ତପ୍ସ୍ୟାମହେ ତପଃ ॥ 2 ॥
ପଶ୍ଚିମାୟାଂ ଵିଶାଲାୟାଂ ପୁଷ୍କରେଷୁ ମହାତ୍ମନଃ ।
ସୁଖଂ ତପଶ୍ଚରିଷ୍ୟାମଃ ପରଂ ତଦ୍ଧି ତପୋଵନମ୍ ॥ 3 ॥
ଏଵମୁକ୍ତ୍ଵା ମହାତେଜାଃ ପୁଷ୍କରେଷୁ ମହାମୁନିଃ ।
ତପ ଉଗ୍ରଂ ଦୁରାଧର୍ଷଂ ତେପେ ମୂଲଫଲାଶନଃ ॥ 4 ॥
ଏତସ୍ମିନ୍ନେଵ କାଲେ ତୁ ଅୟୋଧ୍ୟାଧିପତିର୍ନୃପଃ ।
ଅଂବରୀଷ ଇତି ଖ୍ୟାତୋ ୟଷ୍ଟୁଂ ସମୁପଚକ୍ରମେ ॥ 5 ॥
ତସ୍ୟ ଵୈ ୟଜମାନସ୍ୟ ପଶୁମିଂଦ୍ରୋ ଜହାର ହ ।
ପ୍ରଣଷ୍ଟେ ତୁ ପଶୌ ଵିପ୍ରୋ ରାଜାନମିଦମବ୍ରଵୀତ୍ ॥ 6 ॥
ପଶୁରଦ୍ୟ ହୃତୋ ରାଜନ୍ ପ୍ରଣଷ୍ଟସ୍ତଵ ଦୁର୍ନୟାତ୍ ।
ଅରକ୍ଷିତାରଂ ରାଜାନଂ ଘ୍ନଂତି ଦୋଷା ନରେଶ୍ଵର ॥ 7 ॥
ପ୍ରାୟଶ୍ଚିତ୍ତଂ ମହଦ୍ଧ୍ୟେତନ୍ନରଂ ଵା ପୁରୁଷର୍ଷଭ ।
ଆନୟସ୍ଵ ପଶୁଂ ଶୀଘ୍ରଂ ୟାଵତ୍କର୍ମ ପ୍ରଵର୍ତତେ ॥ 8 ॥
ଉପାଧ୍ୟାୟଵଚଶ୍ଶ୍ରୁତ୍ଵା ସ ରାଜା ପୁରୁଷର୍ଷଭ ।
ଅନ୍ଵିୟେଷ ମହାବୁଦ୍ଧିଃ ପଶୁଂ ଗୋଭିସ୍ସହସ୍ରଶଃ ॥ 9 ॥
ଦେଶାନ୍ ଜନପଦାଂସ୍ତାଂ ସ୍ତାନ୍ନଗରାଣି ଵନାନି ଚ ।
ଆଶ୍ରମାଣି ଚ ପୁଣ୍ୟାନି ମାର୍ଗମାଣୋ ମହୀପତିଃ ॥ 10 ॥
ସ ପୁତ୍ରସହିତଂ ତାତ ସଭାର୍ୟଂ ରଘୁନଂଦନ ।
ଭୃଗୁତୁଂଦେ ସମାସୀନମୃଚୀକଂ ସଂଦଦର୍ଶ ହ ॥ 11 ॥
ତମୁଵାଚ ମହାତେଜାଃ ପ୍ରଣମ୍ୟାଭିପ୍ରସାଦ୍ୟ ଚ ।
ବ୍ରହ୍ମର୍ଷିଂ ତପସା ଦୀପ୍ତଂ ରାଜର୍ଷିରମିତପ୍ରଭଃ ॥ 12 ॥
ପୃଷ୍ଟ୍ଵା ସର୍ଵତ୍ର କୁଶଲମୃଚୀକଂ ତମିଦଂ ଵଚଃ ।
ଗଵାଂ ଶତସହସ୍ରେଣ ଵିକ୍ରୀଣୀଷେ ସୁତଂ ୟଦି ॥ 13 ॥
ପଶୋରର୍ଥେ ମହାଭାଗ କୃତକୃତ୍ୟୋଽସ୍ମି ଭାର୍ଗଵ ।
ସର୍ଵେ ପରିସୃତା ଦେଶା ୟାଜ୍ଞୀୟଂ ନ ଲଭେ ପଶୁମ୍ ॥ 14 ॥
ଦାତୁମର୍ହସି ମୂଲ୍ୟେନ ସୁତମେକମିତୋ ମମ ।
4 ଏଵମୁକ୍ତୋ ମହାତେଜା ଋଚୀକସ୍ତ୍ଵବ୍ରଵୀଦ୍ଵଚଃ ॥ 15 ॥
ନାହଂ ଜ୍ୟେଷ୍ଠଂ ନରଶ୍ରେଷ୍ଠ ଵିକ୍ରୀଣୀୟାଂ କଥଂଚନ ।
ଋଚୀକସ୍ୟ ଵଚଶ୍ଶ୍ରୁତ୍ଵା ତେଷାଂ ମାତା ମହାତ୍ମନାମ୍ ॥ 16 ॥
ଉଵାଚ ନରଶାର୍ଦୂଲମଂବରୀଷଂ ତପସ୍ଵିନୀ ।
ଅଵିକ୍ରେୟଂ ସୁତଂ ଜ୍ୟେଷ୍ଠଂ ଭଗଵାନାହ ଭାର୍ଗଵଃ ॥ 17 ॥
ମମାପି ଦୟିତଂ ଵିଦ୍ଧି କନିଷ୍ଠଂ ଶୁନକଂ ନୃପ ।
ତସ୍ମାତ୍କନୀୟସଂ ପୁତ୍ରଂ ନ ଦାସ୍ୟେ ତଵ ପାର୍ଥିଵ ॥ 18 ॥
ପ୍ରାୟେଣ ହି ନରଶ୍ରେଷ୍ଠ ଜ୍ୟେଷ୍ଠାଃ ପିତୃଷୁ ଵଲ୍ଲଭାଃ ।
ମାତୃଣାଂ ତୁ କନୀୟାଂସସ୍ତସ୍ମାଦ୍ରକ୍ଷେ କନୀୟସମ୍ ॥ 19 ॥
ଉକ୍ତଵାକ୍ୟେ ମୁନୌ ତସ୍ମିନ୍ ମୁନିପତ୍ନ୍ୟାଂ ତଥୈଵ ଚ ।
ଶୁନଶ୍ଶେଫସ୍ସ୍ଵୟଂ ରାମ ମଧ୍ୟମୋ ଵାକ୍ୟମବ୍ରଵୀତ୍ ॥ 20 ॥
ପିତା ଜ୍ୟେଷ୍ଠମଵିକ୍ରେୟଂ ମାତା ଚାହ କନୀୟସମ୍ ।
ଵିକ୍ରୀତଂ ମଧ୍ୟମଂ ମନ୍ୟେ ରାଜନ୍ ପୁତ୍ରଂ ନୟସ୍ଵ ମାମ୍ ॥ 21 ॥
ଗଵାଂ ଶତସହସ୍ରେଣ ଶୁନଶ୍ଶେଫଂ ନରେଶ୍ଵରଃ ।
ଗୃହୀତ୍ଵା ପରମପ୍ରୀତୋ ଜଗାମ ରଘୁନଂଦନ ॥ 22 ॥
ଅଂବରୀଷସ୍ତୁ ରାଜର୍ଷୀ ରଥମାରୋପ୍ୟ ସତ୍ଵରଃ ।
ଶୁନଶ୍ଶେଫଂ ମହାତେଜା ଜଗାମାଶୁ ମହାୟଶାଃ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକଷଷ୍ଟିତମସ୍ସର୍ଗଃ ॥
