ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ସପ୍ତସପ୍ତତିତମସ୍ସର୍ଗଃ ।
ନିକୁଂଭୋଭ୍ରାତରଂଦୃଷ୍ଟଵାସୁଗ୍ରୀଵେଣନିପାତିତମ୍ ।
ପ୍ରଦହନ୍ନିଵକୋପେନଵାନରେଂଦ୍ରମଵୈକ୍ଷତ ॥ 1 ॥
ତତସ୍ସ୍ରଗ୍ଦାମସନ୍ନଦ୍ଧଂଦତ୍ତପଂଚାଂଗୁଲଂଶୁଭମ୍ ।
ଆଦଦେପରିଘଂଵୀରୋମହେଂଦ୍ରଶିଖରୋପମମ୍ ॥ 2 ॥
ହେମପଟ୍ଟପରିକ୍ଷିପ୍ତଂଵଜ୍ରଵିଦ୍ରୁମଭୂଷିତମ୍ ।
ୟମଦଂଡୋପମଂଭୀମଂରକ୍ଷସାଂଭୟନାଶନମ୍ ॥ 3 ॥
ତମାଵିଧ୍ୟମହାତେଜାଶ୍ଶକ୍ରଧ୍ଵଜସମଂତଦା ।
ନିନନାଦଵିଵୃତ୍ତାସ୍ୟୋନିକୁଂଭୋଭୀମଵିକ୍ରମଃ ॥ 4 ॥
ଉରୋଗତେନନିଷ୍କେଣଭୁଜସ୍ଥୈରଂଗଦୈରପି ।
କୁଂଡଲାଭ୍ୟାଂ ଚ ଚିତ୍ରାଭ୍ୟାଂମାଲୟା ଚ ଵିଚିତ୍ରୟା ॥ 5 ॥
ନିକୁଂଭୋଭୂଷଣୈର୍ଭାତିତେନସ୍ମପରିଘେଣ ଚ ।
ୟଥେଂଦ୍ରଧନୁଷାମେଘସ୍ସଵିଦ୍ୟୁତ୍ସ୍ତନୟିତ୍ନୁମାନ୍ ॥ 6 ॥
ପରିଘାଗ୍ରେଣ ପୁସ୍ଫୋଟ ଵାତଗ୍ରଂଥିର୍ମହାତ୍ମନଃ ।
ପ୍ରଜଜ୍ଵାଲ ସଘୋଷଶ୍ଚ ଵିଧୂମ ଇଵ ପାଵକଃ ॥ 7 ॥
ନଗର୍ୟାଵିଟପାଵତ୍ୟାଗଂଧର୍ଵଭଵନୋତ୍ତମୈଃ ।
ସତାରଗ୍ରହନକ୍ଷତ୍ରଂସଚଂଦ୍ରଂସମହାଗ୍ରହମ୍ ॥ 8 ॥
ନିକୁଂଭପରିଘାଘୂର୍ଣଂଭ୍ରମତୀଵନଭସ୍ଥ୍ସଲମ୍ ।
ଦୁରାସଦଶ୍ଚସଂଜଜ୍ଞେପରିଘାଭରଣପ୍ରଭଃ ॥ 9 ॥
କପୀନାଂସନିକୁଂଭାଗ୍ନିର୍ୟୁଗାଂତାଗ୍ନିରିଵୋତ୍ଥିତଃ ।
ରାକ୍ଷସାଵାନରାଶ୍ଚାପି ନ ଶେକୁସ୍ସ୍ପଂଦିତୁଂଭୟାତ୍ ॥ 10 ॥
ହନୂମାଂସ୍ତୁଵିଵୃତ୍ୟୋରସ୍ତସ୍ଥୌତସ୍ୟାଗ୍ରତୋବଲୀ ।
ପରିଘୋପମବାହୁସ୍ତୁପରିଘଂଭାସ୍କରପ୍ରଭମ୍ ॥ 11 ॥
ବଲୀବଲଵତସ୍ତସ୍ୟପାତୟାମାସଵକ୍ଷସି ।
ସ୍ଥିରେତସ୍ୟୋରସିଵ୍ୟୂଢେପରିଘଶ୍ଶତଧାକୃତଃ ॥ 12 ॥
ଵିକୀର୍ୟମାଣସ୍ସହସାଉଲ୍କାଶତମିଵାଂବରେ ।
ସ ତୁତେନପ୍ରହାରେଣଵିଚଚାଲମହାକପିଃ ॥ 13 ॥
ପରିଘେଣସମାଧୂତୋୟଥାଭୂମିଚଲେଽଚଲଃ ।
ତଥାଭିହତସ୍ତେନହନୁମାନ୍ ପ୍ଲଵଗୋତ୍ତମଃ ॥ 14 ॥
ମୁଷ୍ଟିଂସମ୍ଵର୍ତୟାମାସବଲେନାତିମହାବଲଃ ।
ତମୁଦ୍ୟମ୍ୟମହାତେଜାନିକୁଂଭୋରସିଵୀର୍ୟଵାନ୍ ॥ 15 ॥
ଅଭିଚିକ୍ଷେପଵେଗେନଵେଗଵାନ୍ ଵାୟୁଵିକ୍ରମଃ ।
ତତଃପୁସ୍ଫୋଟଚର୍ମାସ୍ୟପ୍ରସୁସ୍ରାଵ ଚ ଶୋଣିତମ୍ ॥ 16 ॥
ମୁଷ୍ଟିନାତେନସଂଜଜ୍ଞେମେଘେଵିଦ୍ୟୁଦିଵୋତ୍ଥିତା ।
ସଃତୁତେନପ୍ରହାରେଣନିକୁଂଭୋଵିଚଚାଲ ହ ॥ 17 ॥
ସ୍ଵସ୍ଥଶ୍ଚାପିନିଜଗ୍ରାହହନୂମଂତଂମହାବଲମ୍ ।
ଚୁକ୍ରୁଶୁସ୍ତଦାସଂଖ୍ୟେଭୀମଂଲଂକାନିଵାସିନଃ ॥ 18 ॥
ନିକୁଂଭେନୋଦ୍ୟତଂଦୃଷ୍ଟଵାହନୂମଂତଂମହାବଲମ୍ ।
ତଦାହ୍ରିୟମାଣୋଽପିକୁଂଭକର୍ଣାତ୍ମଜେନ ହ ॥ 19 ॥
ଆଜଘାନାନିଲସୁତୋଵଜ୍ରକଲ୍ପେନମୁଷ୍ଟିନା ।
ଆତ୍ମାନଂମୋକ୍ଷୟିତ୍ଵାଥକ୍ଷିତାଵଭ୍ୟଵପଦ୍ୟତ ॥ 20 ॥
ହନୂମାନୁନ୍ମମାଥାଶୁନିକୁଂଭଂମାରୁତାତ୍ମଜଃ ।
ନିକ୍ଷିପ୍ୟପରମାୟତ୍ତୋନିକୁଂଭଂନିଷ୍ପିପେଷ ହ ॥ 21 ॥
ଉତ୍ପତ୍ୟଚାସ୍ୟଵେଗେନପପାତୋରସିଵୀର୍ୟଵାନ୍ ।
ପରିଗୃହ୍ୟ ଚ ବାହୁଭ୍ୟାଂପରିଵୃତ୍ୟଶିରୋଧରାମ୍ ॥ 22 ॥
ଉତ୍ପାଟୟାମାନଶିରୋଭୈରଵଂନଦତୋମହତ୍ ।
ଅଥନିନଦତିସାଦିତେନିକୁଂଭେପଵନସୁତେନରଣେବଭୂଵୟୁଦ୍ଧମ୍ ।
ଦଶରଥସୁତରାକ୍ଷସେଂଦ୍ରସୂନ୍ଵୋର୍ଭୃଶତରମାଗତରୋଷୟୋସ୍ସୁଭୀମମ୍ ॥ 23 ॥
ଵ୍ୟପେତେତୁଜୀଵେନିକୁଂଭସ୍ୟହୃଷ୍ଟାଵିନେଦୁଃପ୍ଲଵଂଗାଦିଶସ୍ସସ୍ଵନୁଶ୍ଚ ।
ଚଚାଲେଵଚୋର୍ଵୀପଫାଲେଵଚଦ୍ୟୌର୍ଭୟଂରାକ୍ଷସାନାଂବଲଂଚାଵିଵେଶ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ସପ୍ତସପ୍ତତିତମସ୍ସର୍ଗଃ ॥
