ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ଦ୍ଵିଷଷ୍ଟିତମସ୍ସର୍ଗଃ ।
ସ ତୁରାକ୍ଷସଶାର୍ଦୂଲୋନିଦ୍ରାମଦସମାକୁଲଃ ।
ରାଜମାର୍ଗଂଶ୍ରିୟାଜୁଷ୍ଟଂୟୟୌଵିପୁଲଵିକ୍ରମଃ ॥ 1 ॥
ରାକ୍ଷସାନାଂସହସ୍ରୈଶ୍ଚଵୃତଃପରମଦୁର୍ଜୟଃ ।
ଗୃହେଭ୍ୟଃପୁଷ୍ପଵର୍ଷେଣକୀର୍ୟମାଣସ୍ତଦାୟୟୌ ॥ 2 ॥
ସ ହେମଜାଲଵିତତଂଭାନୁଭାସ୍ଵରଦର୍ଶନମ୍ ।
ଦଦର୍ଶଵିପୁଲଂରମ୍ୟଂରାକ୍ଷସେଂଦ୍ରନିଵେଶନମ୍ ॥ 3 ॥
ସ ତତ୍ତଦା ସୂର୍ୟ ଇଵାଭ୍ରଜାଲମ୍ ।
ପ୍ରଵିଶ୍ୟ ରକ୍ଷୋଧିପତେର୍ନିଵେଶନମ୍ ।
ଦଦର୍ଶ ଦୂରେଽଗ୍ରଜମାସନସ୍ଥମ୍ ।
ସ୍ଵୟଂଭୁଵଂ ଶକ୍ର ଇଵାସନସ୍ଥମ୍ ॥ 4 ॥
ଭ୍ରାତୁସ୍ସଭଵନଂଗଚ୍ଛନ୍ରକ୍ଷୋଗଣସମନ୍ଵିମ୍ ।
କୁଂଭକର୍ଣଃପଦନ୍ୟାସୈରକଂପୟତମେଦିନୀମ୍ ॥ 5 ॥
ସୋଽଭିଗମ୍ୟଗୃହଂଭ୍ରାତୁଃକକ୍ଷ୍ୟାମଭିଵିଗାହ୍ୟ ଚ ।
ଦଦର୍ଶୋଦ୍ଵିଗନ୍ନମାସୀନଂଵିମାନେପୁଷ୍ପକେଗୁରୁମ୍ ॥ 6 ॥
ଅଥଦୃଷ୍ଟଵାଦଶଗ୍ରୀଵଃକୁଂଭକର୍ଣମୁପସ୍ଥିତମ୍ ।
ତୂର୍ଣମୁତ୍ଥାୟସଂହୃଷ୍ଟଃସନ୍ନିକର୍ଷମୁପାନୟତ୍ ॥ 7 ॥
ଅଥାସୀନସ୍ୟପର୍ୟଂକେକୁଂଭକର୍ଣୋମହାବଲଃ ।
ଭ୍ରାତୁର୍ଵଵଂଦେଚରଣୌକିଂକୃତ୍ୟମିତିଚାବ୍ରଵୀତ୍ ॥ 8 ॥
ଉତ୍ପତ୍ୟଚୈନଂମୁଦିତୋରାଵଣଃପରିଷସ୍ଵଜେ ।
ସ ଭ୍ରାତ୍ରାସଂପରିଷ୍ଵକ୍ତୋୟଥାଵଚ୍ଛାଭିନଂଦିତଃ ॥ 9 ॥
କୁଂଭକର୍ଣଶ୍ଶୁଭଂଦିଵ୍ୟଂପ୍ରତିପେଦେଵରାସନମ୍ ।
ସ ତଦାସନମାଶ୍ରିତ୍ୟକୁଂଭକର୍ଣୋମହାବଲଃ ॥ 10 ॥
ସଂରକ୍ତନୟନଃକ୍ରୋଧାଦ୍ରାଵଣଂଵାକ୍ୟମବ୍ରଵୀତ୍ ।
କିମର୍ଥମହମାଦୃତ୍ୟତ୍ଵୟାରାଜନ୍ଵିବୋଧିତଃ ॥ 11 ॥
ଶଂସକସ୍ମାଦ୍ଭୟଂତେଽତ୍ରକୋଽଦ୍ୟପ୍ରେତୋଭଵିଷ୍ୟତି ।
ଭ୍ରାତରଂରାଵଣଃକ୍ରୁଦ୍ଧଂକୁଂଭକର୍ଣମଵସ୍ଥିତମ୍ ॥ 12 ॥
ଈଷତ୍ତୁପରିଵୃତ୍ତାଭ୍ୟାଂନେତ୍ରାଭ୍ୟାଂଵାକ୍ୟମବ୍ରଵୀତ୍ ।
ଅଦ୍ୟତେସୁମହାନ୍କାଲଶ୍ଶୟାନସ୍ୟମହାବଲ ॥ 13 ॥
ସୁଖିତସ୍ତ୍ଵଂ ନ ଜାନୀଷେମମରାମକୃତଂଭୟମ୍ ।
ଏଷଦାଶରଥୀରାମଃସୁଗ୍ରୀଵସହିତୋବଲୀ ॥ 14 ॥
ସମୁଦ୍ରଂସବଲସ୍ତୀର୍ତ୍ଵାମୂଲଂନଃପରିକୃଂତତି ।
ହଂତପଶ୍ୟସ୍ଵଲଂକାୟାଵନାନ୍ୟୁପଵନାନି ଚ ॥ 15 ॥
ସେତୁନାସୁଖମାଗମ୍ୟଵାନରୈକାର୍ଣଵୀକୃତମ୍ ।
ୟେରାକ୍ଷସାମୁଖ୍ୟତମାହତାସ୍ତେଵାନରୈର୍ୟୁଧି ॥ 16 ॥
ଵାନରାଣାଂକ୍ଷୟଂୟୁଦ୍ଧେ ନ ପଶ୍ୟାମିକଦାଚନ ।
ନଚାପିଵାନରାୟୁଦ୍ଧେଜିତପୂର୍ଵାଃକଦାଚନ ॥ 17 ॥
ତଦେତଦ୍ଭୟମୁତ୍ପନ୍ନଂତ୍ରାୟସ୍ଵେମାଂମହବଲ ।
ନାଶୟତ୍ଵମିମାନଦ୍ୟତଦର୍ଥଂବୋଧିତୋଭଵାନ୍ ॥ 18 ॥
ସର୍ଵକ୍ଷପିତକୋଶଂ ଚ ସ ତ୍ଵମଭ୍ୟଵପଦ୍ୟମାମ୍ ।
ତ୍ରାୟସ୍ଵେମାଂପୁରୀଂଲଂକାଂବାଲଵୃଦ୍ଧାଵଶେଷିତାମ୍ ॥ 19 ॥
ଭ୍ରାତୁରର୍ଥେମହାବାହୋ କୁରୁକର୍ମସୁଦୁଷ୍କରମ୍ ।
ମୟୈଵଂନୋକ୍ତପୂର୍ଵୋହିକଶ୍ଚିଦ୍ଭ୍ରାତଃ ପରଂତପ ॥ 20 ॥
ତ୍ଵୟ୍ୟସ୍ତିମମସ୍ନେହଃପରାସଂଭାଵନା ଚ ମେ ।
ଦୈଵାସୁରେଷୁୟୁଦ୍ଧେଷୁବହୁଶୋରାକ୍ଷସର୍ଷଭ ॥ 21 ॥
ତ୍ଵୟାଦେଵାଃପ୍ରତିଵ୍ୟୂହ୍ୟନିର୍ଜିତାଶ୍ଚାସୁରାୟୁଧି ।
ତଦେତତ୍ସର୍ଵମାତିଷ୍ଠଵୀର୍ୟଂଭୀମପରାକ୍ରମ ॥ 22 ॥
ନ ହି ତେ ସର୍ଵଭୂତେଷୁ ଦୃଶ୍ୟତେ ସଦୃଶୋ ବଲୀ ।
କୁରୁଷ୍ଵ ମେ ପ୍ରିୟହିତମେତଦୁତ୍ତମମ୍ ।
ୟଥାପ୍ରିୟଂ ପ୍ରିୟରଣ ବାଂଧଵପ୍ରିୟ ।
ସ୍ଵତେଜସା ଵିଧମ ସପତ୍ନଵାହିନୀମ୍ ।
ଶରଦ୍ଘନଂ ପଵନ ଇଵୋଦ୍ୟତୋ ମହାନ୍ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ଦ୍ଵିଷଷ୍ଟିତମସ୍ସର୍ଗଃ ॥
