ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଅଷ୍ଟାଵିଂଶସ୍ସର୍ଗଃ ।
ସା ରାକ୍ଷସେଂଦ୍ରସ୍ୟ ଵଚୋ ନିଶମ୍ୟ ତଦ୍ରାଵଣସ୍ୟାପ୍ରିୟମପ୍ରିୟାର୍ତା ।
ସୀତା ଵିତତ୍ରାସ ୟଥା ଵନାଂତେ ସିଂହାଭିପନ୍ନା ଗଜରାଜକନ୍ୟା ॥ 1 ॥
ସା ରାକ୍ଷସୀମଧ୍ୟଗତା ଚ ଭୀରୁ ର୍ଵାଗ୍ଭିର୍ଭୃଶଂ ରାଵଣତର୍ଜିତା ଚ ।
କାଂତାରମଧ୍ୟେ ଵିଜନେ ଵିସୃଷ୍ଟା ବାଲେଵ କନ୍ୟା ଵିଲଲାପ ସୀତା ॥ 2 ॥
ସତ୍ୟଂ ବତେଦଂ ପ୍ରଵଦଂତି ଲୋକେ ନାକାଲମୃତ୍ୟୁର୍ଭଵତୀତି ସଂତଃ ।
ୟତ୍ରାହମେଵଂ ପରିଭର୍ତ୍ସ୍ୟମାନା ଜୀଵାମି ଦୀନା କ୍ଷଣମପ୍ୟପୁଣ୍ୟା ॥ 3 ॥
ସୁଖାଦ୍ଵିହୀନଂ ବହୁଦୁଃଖପୂର୍ଣ ମିଦଂ ତୁ ନୂନଂ ହୃଦୟଂ ସ୍ଥିରଂ ମେ ।
ଵିଶୀର୍ୟତେ ୟନ୍ନ ସହସ୍ରଧାଽଦ୍ୟ ଵଜ୍ରାହତଂ ଶୃଂଗମିଵାଚଲସ୍ୟ ॥ 4 ॥
ନୈଵାସ୍ତି ଦୋଷୋ ମମ ନୂନମତ୍ର ଵଧ୍ୟାହମସ୍ୟାପ୍ରିୟଦର୍ଶନସ୍ୟ ।
ଭାଵଂ ନ ଚାସ୍ୟାହମନୁପ୍ରଦାତୁ ମଲଂ ଦ୍ଵିଜୋ ମଂତ୍ରମିଵାଦ୍ଵିଜାୟ ॥ 5 ॥
ନୂନଂ ମମାଂଗାନ୍ୟଚିରାଦନାର୍ୟଃ ଶସ୍ତ୍ରୈଶ୍ଶିତୈଶ୍ଛେତ୍ସ୍ୟତି ରାକ୍ଷସେଂଦ୍ରଃ ।
ତସ୍ମିନନାଗଚ୍ଛତି ଲୋକନାଥେ ଗର୍ଭସ୍ଥଜଂତୋରିଵ ଶଲ୍ୟକୃଂତଃ ॥ 6 ॥
ଦୁଃଖଂ ବତେଦଂ ମମ ଦୁଃଖିତାୟା ମାସୌ ଚିରାୟାଧିଗମିଷ୍ୟତୋ ଦ୍ଵୌ ।
ବଦ୍ଧସ୍ୟ ଵଧ୍ୟସ୍ୟ ତଥା ନିଶାଂତେ ରାଜାପରାଧାଦିଵ ତସ୍କରସ୍ୟ ॥ 7 ॥
ହା ରାମ ହା ଲକ୍ଷ୍ମଣ ହା ସୁମିତ୍ରେ ହା ରାମମାତଃ ସହ ମେ ଜନନ୍ୟା ।
ଏଷା ଵିପଦ୍ୟାମ୍ୟହମଲ୍ପଭାଗ୍ୟା ମହାର୍ଣଵେ ନୌରିଵ ମୂଢଵାତା ॥ 8 ॥
ତରସ୍ଵିନୌ ଧାରୟତା ମୃଗସ୍ୟ ସତ୍ତ୍ଵେନ ରୂପଂ ମନୁଜେଂଦ୍ରପୁତ୍ରୌ ।
ନୂନଂ ଵିଶସ୍ତୌ ମମ କାରଣାତ୍ତୌ ସିଂହର୍ଷଭୌ ଦ୍ଵାଵିଵ ଵୈଦ୍ୟୁତେନ ॥ 9 ॥
ନୂନଂ ସ କାଲୋ ମୃଗରୂପଧାରୀ ମାମଲ୍ପଭାଗ୍ୟାଂ ଲୁଲୁଭେ ତଦାନୀମ୍ ।
ୟତ୍ରାର୍ୟପୁତ୍ରଂ ଵିସସର୍ଜ ମୂଢା ରାମାନୁଜଂ ଲକ୍ଷ୍ମଣପୂର୍ଵଜଂ ଚ ॥ 10 ॥
ହା ରାମ ସତ୍ୟଵ୍ରତ ଦୀର୍ଘବାହୋ ହା ପୂର୍ଣଚଂଦ୍ରପ୍ରତିମାନଵକ୍ତ୍ର ।
ହା ଜୀଵଲୋକସ୍ୟ ହିତଃ ପ୍ରିୟଶ୍ଚ ଵଧ୍ୟାଂ ନ ମାଂ ଵେତ୍ସି ହି ରାକ୍ଷସାନାମ୍ ॥ 11 ॥
ଅନନ୍ୟ ଦୈଵତ୍ଵମିୟଂ କ୍ଷମା ଚ ଭୂମୌ ଚ ଶୟ୍ୟା ନିୟମଶ୍ଚ ଧର୍ମେ ।
ପତିଵ୍ରତାତ୍ଵଂ ଵିଫଲଂ ମମେଦଂ କୃତଂ କୃତଘ୍ନେଷ୍ଵିଵ ମାନୁଷାଣାମ୍ ॥ 12 ॥
ମୋଘୋ ହି ଧର୍ମଶ୍ଚରିତୋ ମୟାୟଂ ତଥୈକପତ୍ନୀତ୍ଵାମିଦଂ ନିରର୍ଥମ୍ ।
ୟା ତ୍ଵାଂ ନ ପଶ୍ୟାମି କୃଶା ଵିଵର୍ଣା ହୀନା ତ୍ଵୟା ସଂଗମନେ ନିରାଶା ॥ 13 ॥
ପିତୁର୍ନିଦେଶଂ ନିୟମେନ କୃତ୍ଵା ଵନାନ୍ନିଵୃତ୍ତଶ୍ଚରିତଵ୍ରତଶ୍ଚ ।
ସ୍ତ୍ରୀଭିସ୍ତୁ ମନ୍ୟେ ଵିପୁଲେକ୍ଷଣାଭିସ୍ତ୍ଵଂ ରଂସ୍ୟସେ ଵୀତଭୟଃ କୃତାର୍ଥଃ ॥ 14 ॥
ଅହଂ ତୁ ରାମ ତ୍ଵୟି ଜାତକାମା ଚିରଂ ଵିନାଶାୟ ନିବଦ୍ଧଭାଵା ।
ମୋଘଂ ଚରିତ୍ଵାଥ ତପୋ ଵ୍ରତଂଚ ତ୍ୟକ୍ଷ୍ୟାମି ଧିଗ୍ଜୀଵିତମଲ୍ପଭାଗ୍ୟାମ୍ ॥ 15 ॥
ସା ଜୀଵିତଂ କ୍ଷିପ୍ରମହଂ ତ୍ୟଜେୟଂ ଵିଷେଣ ଶସ୍ତ୍ରେଣ ଶିତେନ ଵାପି ।
ଵିଷସ୍ୟ ଦାତା ନ ହି ମେଽସ୍ତି କଶ୍ଚି ଚ୍ଛସ୍ତ୍ରସ୍ୟ ଵା ଵେଶ୍ମନି ରାକ୍ଷସସ୍ୟ ॥ 16 ॥
ଇତୀଵ ଦେଵୀ ବହୁଧା ଵିଲପ୍ୟ ସର୍ଵାତ୍ମନା ରାମମନୁସ୍ମରଂତୀ ।
ପ୍ରଵେପମାନା ପରିଶୁଷ୍କଵକ୍ତ୍ରା ନଗୋତ୍ତମଂ ପୁଷ୍ପିତମାସସାଦ ॥ 17 ॥
ସା ଶୋକତପ୍ତା ବହୁଧା ଵିଚିଂତ୍ୟ ସୀତାଽଥ ଵେଣ୍ୟୁଦ୍ଗ୍ରଥନଂ ଗୃହୀତ୍ଵା ।
ଉଦ୍ବୁଧ୍ୟ ଵେଣ୍ୟୁଦ୍ଗ୍ରଥନେନ ଶୀଘ୍ରମହଂ ଗମିଷ୍ୟାମି ୟମସ୍ୟ ମୂଲମ୍ ॥ 18 ॥
ଉପସ୍ଥିତା ସା ମୃଦୁସର୍ଵଗାତ୍ରୀ ଶାଖାଂ ଗୃହତ୍ଵାଽଧ ନଗସ୍ୟ ତସ୍ୟ ।
ତସ୍ୟାସ୍ତୁ ରାମଂ ପ୍ରଵିଚିଂତୟଂତ୍ୟା ରାମାନୁଜଂ ସ୍ଵଂ ଚ କୁଲଂ ଶୁଭାଂଗ୍ୟାଃ ॥ 19 ॥
ଶେକାନିମିତ୍ତାନି ତଥା ବହୂନି ଧୈର୍ୟାର୍ଜିତାନି ପ୍ରଵରାଣି ଲୋକେ ।
ପ୍ରାଦୁର୍ନିମିତ୍ତାନି ତଦା ବଭୂଵୁଃ ପୁରାପି ସିଦ୍ଧାନ୍ୟୁପଲକ୍ଷିତାନି ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଅଷ୍ଟାଵିଂଶସ୍ସର୍ଗଃ ॥
